សេដ្ឋកិច្ចពិភពលោក ព្រឹកនេះ (25/12/2020)
បច្ចុប្បន្នភាពផ្សារហ៊ុនអន្តរជាតិ
សហរដ្ឋអាមេរិក - ផ្សារហ៊ុន Wall Street របស់អាមេរិក បិទបញ្ចប់ការជួញដូរនៅល្ងាចថ្ងៃទី២៤ ធ្នូ ជាមួយនឹងការកើនឡើងបន្តិចបន្តួច
សន្ទស្សន៍ហ៊ុនធំៗជាច្រើន នៅលើផ្សារហ៊ុនសហរដ្ឋអាមេរិក មានការកើនឡើងបន្តិចបន្តួច នៅពេលបិទបញ្ចប់ការជួញដូរនៅថ្ងៃទី២៤ ធ្នូ ដោយសារក្ដីសង្ឃឹមទៅលើកញ្ចប់ថវិកាជំនួយសេដ្ឋកិច្ចរបស់អាមេរិក ដែលនឹងកើតមានពេលដ៏ខ្លីខាងមុខ, ការចុះកិច្ចព្រមព្រៀងពាណិជ្ជកម្មរវាងអង់គ្លេស និងក្ដីសង្ឃឹមទៅលើការចែកចាយនិងចាក់វ៉ាក់សាំងទូទាំងសហរដ្ឋអាមេរិក ។ សន្ទស្សន៍ហ៊ុនធំៗទាំងបីរបស់សហរដ្ឋអាមេរិក រួមមាន S&P 500, Dow និង Nasdaq សុទ្ធតែបិទបញ្ចប់ការជួញដូរជាមួយនឹងកំណើនវិជ្ជមាន ។ NASDAQ កើនឡើង ០,២៦% សន្ទស្សន៍ហ៊ុន S&P 500 កើនឡើង ០,៣៥% និងសន្ទស្សន៍ហ៊ុន Dow: កើនឡើង ២៣% ។
អឺរ៉ុប - ផ្សារហ៊ុនអឺរ៉ុប នៅថ្ងៃទី២៤ ធ្នូនេះ បិទបញ្ចប់ដោយមានទាំងកើនឡើង ទាំងធ្លាក់ចុះ ជាមួយនឹងសុទិដ្ឋិនិយមអំពីកិច្ចព្រមព្រៀងពាណិជ្ជកម្មអង់គ្លេស-សហភាពអឺរ៉ុប
ផ្សារហ៊ុនអង់គ្លេស FTSE 100 បិទបញ្ចប់ដោយកើនឡើងតិចតួចពោលគឺកើនឡើង ០,១% ចំណែកឯផ្សារហ៊ុនរបស់បារាំង CAC ធ្លាក់ចុះជិត ០,១% ហើយផ្សារហ៊ុន IBEX របស់អេស្ប៉ាញ ហក់ឡើងបន្តិច គឺ ឡើង ០,៥% ។ ផ្សារហ៊ុនអាល្លឺម៉ង់និងអ៊ីតាលី មិនបើកដំណើរការទេ ព្រោះជាថ្ងៃឈប់សម្រាកមុនបុណ្យគ្រិស្តម៉ាស។
ភាគហ៊ុនរបស់ធនាគារអង់គ្លេសមួយចំនួន មានកំណើនល្អ ខណៈដែលអ្នកជួញដូរហ៊ុនសង្ឃឹមទៅលើកិច្ចព្រមព្រៀងពាណិជ្ជកម្មរវាងអង់គ្លេសនិងសហភាពអឺរ៉ុប ក្នុងនោះហ៊ុនរបស់ធនាគារ Lloyds ហក់ឡើង ៤%, Barclays កើនឡើង ១,៨% និង Natwest ហក់ឡើង ១,២% ។
អាស៊ី - ផ្សារហ៊ុនអាស៊ីសំខាន់ៗ បិទបញ្ចប់ការជួញដូរជាមួយនឹងភាពវិជ្ជមាន
ផ្សារហ៊ុន Shanghai Composite បានកើនឡើង ០,៩៩%, ផ្សារហ៊ុន Hang Seng កើនឡើង ០,១៦% ផ្សារហ៊ុន Nikkei របស់ជប៉ុន ធ្លាក់ចុះ ០,០៤% ប៉ុន្តែ លេចធ្លោជាងគេគឺផ្សារហ៊ុន KOSPI របស់កូរ៉េខាងត្បូងដែលកើនឡើងជិត ២% ។
សេដ្ឋកិច្ចពិភពលោក
អង់គ្លេស-អឺរ៉ុប (Brexit) - ចក្រភពអង់គ្លេសនិងសហភាពអឺរ៉ុបចុះកិច្ចព្រមព្រៀងពាណិជ្ជកម្មជាមួយគ្នា នៅមុនពេលកំណត់នៃការចាកចេញរបស់អង់គ្លេសពីប្លុកសហភាពអឺរ៉ុប
នៅទីបំផុត ចក្រភពអង់គ្លេសនិងសហភាពអឺរ៉ុប បានឯកភាពគ្នាហើយ លើកិច្ចព្រមព្រៀងពាណិជ្ជកម្មទ្វេភាគី នៅមុនថ្ងៃទី៣១ ខែធ្នូ ដែលជាពេលកំណត់នៃការចាកចេញរបស់អង់គ្លេសពីប្លុកសហភាពអឺរ៉ុប ។ ភាគីទាំងពីរចរចាគ្នាយ៉ាងតឹងតែងតាំងពីខែមីនា មក ហើយកិច្ចព្រមព្រៀងនេះ នឹងត្រូវផ្ដល់សច្ចាប័នដោយសភាអង់គ្លេស និងសភាសហភាពអឺរ៉ុប នៅក្នុងពេលដ៏ខ្លីខាងមុខ ។ < អានលម្អិត >
ពិភពលោក - ADB ព្យាករថា ពិភពលោកអាចនឹងខាតបង់ ៥,៤ ទ្រីលានដុល្លារ នៃ GDP នៅឆ្នាំ២០២១ ដោយសារតែវិបត្តិកូវីដ-១៩
ធនាគារអភិវឌ្ឍន៍អាស៊ី (ADB) បានធ្វើការប៉ាន់ប្រមាណថា ពិភពលោកនឹងអាចខាតបង់ដល់ប្រមាណជាង ៥,៤ ទ្រីលានដុល្លារអាមេរិក នៃ GDP នៅឆ្នាំ២០២១ខាងមុខនេះ។ ការប៉ាន់ស្មាននេះ គឺដោយសារតែធនាគារនេះ ព្យាករថា GDP របស់ពិភពលោកនៅឆ្នាំ២០២១ នឹងធ្លាក់ចុះពី ៣,៦% ទៅ ៦,៣% ទាបជាងសន្ទុះដែលបានរំពឹងទុក ប្រសិនបើគ្មានការរាតត្បាតនៃកូវីដ-១៩។ < អានលម្អិត >
ចិន - Alibaba - តម្លៃហ៊ុនរបស់ក្រុមហ៊ុន អាលីបាបា ធ្លាក់ថ្លៃ បន្ទាប់ពីអាជ្ញាធរចិនបើកការស៊ើបអង្កេតប្រឆាំងការរកស៊ីផ្ដាច់មុខ ទៅលើក្រុមហ៊ុនយក្សមួយនេះ
ដំណឹងនៃការបើកការស៊ើបអង្កេតទៅលើក្រុមហ៊ុនអ៊ិនធើណិតដ៏ធំបំផុតនៅចិន គឺក្រុមហ៊ុន អាលីបាបា បាននាំឲ្យតម្លៃហ៊ុនរបស់ក្រុមហ៊ុននេះធ្លាក់ចុះ ។ អាជ្ញាធរចិនបានផ្សព្វផ្សាយតាមបណ្ដាញព័ត៌មានអនឡាញថា ខ្លួនបានបើកការស៊ើបអង្កេតទៅលើក្រុមហ៊ុន អាលីបាបា ពីបទធ្វើជំនួញផ្ដាច់មុខដែលខុសច្បាប់ ។ < អានលម្អិត >