អាមេរិក និងកូរ៉េខាងត្បូងពង្រឹងកិច្ចសហការយោធាកាន់តែខ្លាំង ក្រោយប្រឈមមុខនឹងនុយក្លេអ៊ែរកូរ៉េខាងជើង

នៅចំពោះមុខបញ្ហានេះ រដ្ឋបាលក្រុងវ៉ាស៊ីនតោន និងសេអ៊ូលបានសម្រេចពង្រឹងកិច្ចសហប្រតិបត្តិការយោធាបន្ថែមទៀត។

នៅក្នុងសេចក្តីថ្លែងការណ៍រួមនៅក្រោយជំនួបកាលពីថ្ងៃសៅរ៍សប្តាហ៍មុន លោកចូ បៃឌិន និងលោកយូនបានបញ្ជាក់ជាថ្មី ពីឆន្ទៈចង់ពង្រឹងកិច្ចសហប្រតិបត្តិការក្នុងវិស័យយោធា និងសេដ្ឋកិច្ច។ នៅក្នុងកិច្ចសហប្រតិបត្តិការយោធាទ្វេភាគី លោកបៃដិន និងលោកយូនចង់ពង្រីក ឲ្យកាន់តែធំ លើការធ្វើសមយុទ្ធប្រចាំឆ្នាំរវាងប្រទេសទាំងពីរ និងដោយបន្ថែមការហ្វឹកហ្វឺនយោធាទាំងនៅក្នុង និងនៅជុំវិញឧបទ្វីបកូរ៉េតែម្តង។

បើតាមទំហំនៃកិច្ចសហការវាងប្រទេសទាំងពីរ ដែលគ្រោងនិងពង្រីកបន្ថែម គួបផ្សំនឹងស្ថានការណ៍ដែលកំពុងកើនកំដៅក្នុងតំបន់ផងនោះ សហរដ្ឋអាមេរិក អាចនឹងដាក់ពង្រាយសព្វាវុធដែលមានសមត្ថភាពប្រើប្រាស់ នុយក្លេអ៊ែររបស់ខ្លួនបន្ថែមទៀតទៅកាន់តំបន់ឧបទ្វីបកូរ៉េ ដើម្បីឆ្លើយជាការឆ្លើយតបទៅនឹងការសាកល្បងអាវុធរបស់កូរ៉េខាងជើង។ នេះបើតាមសេចក្តីរាយការណ៍ដោយ រ៉យទ័រ។

ទោះបីជាសេអ៊ូល និងវ៉ាស៊ីនតោនបានបានបង្ហាញឆន្ទះពង្រីកកិច្ចសហការយោធាខ្លាំងជាមុនយ៉ាងក្តី តែគេក៏មិនភ្លេចឡើយពីការបន្ទន់ឥរិយាបទ សំដែងការអាណិតអាសូរដល់កូរ៉េខាងជើង។ កូរ៉េខាងជើង ដែលកំពុងស្គាល់ពីកំណើនកូវីដ១៩ លានករណីក្នុងមួយថ្ងៃៗ។បើតាមតួលេខផ្លូវការកាលពីចុងសប្តាហ៍មុនមានករណីឆ្លងថ្មីដល់ខ្ទង់២លានករណី និងមានអ្នកស្លាប់ចំនួនជិត១០០សនាក់។

នៅក្នុងសេចក្តីថ្លែងការណ៍រួម លោកបៃឌិន និងលោកយូនបានសម្តែងក្តីបារម្ភ និងបញ្ជាក់ពីការត្រៀមខ្លួនរួចជាស្រេចក្នុងធ្វើការជាមួយសហគមន៍អន្តរជាតិដើម្បីជួយកូរ៉េខាងជើង។ លោកបៃឌិនបានបញ្ជាក់ពីការដែលអាមេរិកត្រៀមខ្លួនផ្តល់វ៉ាក់សាំងឲ្យកូរ៉េខាងជើង។ ចំណែកលោកភាគីកូរ៉េខាងត្បូងបានគូសបញ្ជាក់ថា ជំនួយដល់កូរ៉េខាងជើងក្នុងរឿងកូវីដ១៩ មានលក្ខណៈមនុស្សធម៌សុទ្ធសាធ ពោលគឺគ្មានជាប់ពាក់ព័ន្ធនឹងរឿងនយោបាយ និងយោធាមនោះទេ។

យ៉ាងណាមិញ កូរ៉េខាងជើងមិនបានឆ្លើយតបនឹងការផ្តល់ជំនួយរបស់សហរដ្ឋអាមេរិក រួមទាំងការផ្តល់ថ្នាំបង្ការជំងឺកូវីដ-១៩នោះទេ៕