ការឆ្លងរាលដាលចូលដល់សហគមន៍នៃកូវីត-១៩ ឬដែលរដ្ឋាភិបាលហៅថាជា «ព្រឹត្តិការណ៍សហគមន៍ ២៨ វិច្ឆិកា» បានបណ្តាលឲ្យក្រសួងអប់រំ យុវជន និងកីឡា ផ្អាកដំណើរការសាលារៀនមួយរយៈ ជាថ្មីឡើងវិញ ដើម្បីការពារសុវត្ថិភាពរបស់សិស្សានុសិស្ស ។ សិស្ស-និស្សិតទាំងអស់ត្រូវបន្តការសិក្សាពីចម្ងាយ តាមប្រព័ន្ធអេឡិចត្រូនិច ឬប្រព័ន្ធអនឡាញ ។
ការសិក្សាតាមអនឡាញ ជារឿយៗ ប្រឈមនឹងបញ្ហាមួយចំនួន ដែលទាក់ទងទៅនឹងប្រព័ន្ធអ៊ីនធើណែត និងប្រព័ន្ធបច្ចេកទេស ហើយក៏ដោយសារតែលោកគ្រូ អ្នកគ្រូ និងសិស្សានុសិស្សមិនធ្លាប់បានសិក្សាតាមរយៈអនឡាញពីមុនមក ផងដែរ។ នេះបើយោងតាមកិច្ចសម្ភាសន៍ជាមួយសិស្សានុសិស្សមួយចំនួន ។
កញ្ញា រិន វិនរតនៈលីសា ជាសិស្សថ្នាក់ទី ១២ នៅវិទ្យាល័យព្រះស៊ីសុវត្ថិ បានប្រាប់ Newsroom Cambodia នាដើមសប្ដាហ៍នេះ ថា នៅពេលកំពុងរៀនកញ្ញាតែងតែឮសំឡេងរំខានជានិច្ច ដោយសារផ្ទះរបស់កញ្ញានៅជិតវត្ត និងជិតកន្លែងធ្វើគ្រឿងសង្ហារិម ។ ម្យ៉ាងវិញទៀត កញ្ញាក៏មានបញ្ហាជាមួយនឹងប្រព័ន្ធអ៊ីនធើណែត ពីព្រោះតំបន់ដែលកញ្ញារស់នៅ បច្ចុប្បន្ន មិនសូវមានសេវាទូរសព្ទល្អទេ ។
អត្ថបទទាក់ទង
កញ្ញា គឹមលាន ឃិនសិទ្ធិសីម៉ា ជានិស្សិតឆ្នាំទី២ មុខជំនាញច្បាប់ នៅសាកលវិទ្យាល័យបៀលប្រាយ បានប្រាប់ថា កញ្ញាមានការលំបាកក្នុងការប្រាស្រ័យទាក់ទងជាមួយលោកគ្រូ អ្នកគ្រូ និងមិត្តរួមថ្នាក់ ។
កញ្ញា សីម៉ា និយាយថា ៖ «នៅពេលដែលខ្ញុំមិនសូវយល់មេរៀន ខ្ញុំក៏បើកសំឡេងសួរលោកគ្រូ ពេលខ្លះវាអាចកុងសំឡេងជាមួយមិត្តភក្តិ ហើយនៅពេលខ្លះ អាចនឹងអ៊ីនធើណែតខ្សោយ។ មួយវិញទៀត នៅពេលត្រូវធ្វើកិច្ចការស្រាវជ្រាវជាក្រុម ក្នុងអំឡុងពេលកូវីតអ៊ីចឹង ខ្ញុំពិបាកទាក់ទងទៅសមាជិកក្នុងក្រុមជាខ្លាំង ។»
កញ្ញាបន្ថែមទៀតថា ការបង្រៀនរបស់លោកគ្រូ អ្នកគ្រូ មានការយកចិត្តទុកដាក់ដូចក្នុងថ្នាក់ ហើយលោកគ្រូអ្នកគ្រូក៏បានប្រគល់មេរៀន និងឯកសារបានគ្រប់គ្រាន់ផងដែរ ។
កញ្ញា អេង សិទ្ធិធា អាយុ១៩ឆ្នាំ ជានិស្សិតឆ្នាំទី៣ មុខជំនាញភាសាអង់គ្លេស នៅវិទ្យាស្ថានភាសាបរទេស បាននិយាយថា ការរៀនតាមអនឡាញមានផលវិជ្ជមាន និងអវិជ្ជមាន ។
កញ្ញាបានបញ្ជាក់ថា ផលវិជ្ជមាន គឺកញ្ញាមិនចាំបាច់ត្រូវធ្វើដំណើរទៅសាលារៀន និងអាចគេចផុតពីការឆ្លងជំងឺកូវីត-១៩ ។ ប៉ុន្តែ សម្រាប់ផលអវិជ្ជមាន កញ្ញាមិនសូវបានយកចិត្តទុកដាក់លើការបង្រៀនរបស់លោកគ្រូ អ្នកគ្រូ ដូចនៅក្នុងថ្នាក់ទេ ។
កញ្ញា សិទ្ធិធា បានបន្តថា «ការសិក្សាតាមរយៈអនឡាញបានធ្វើឲ្យខ្ញុំកាន់តែស្គាល់ពីខ្លួនឯងច្បាស់ និងខំរៀនដោយខ្លួនឯងបន្ថែម ហើយវាក៏ជាបទពិសោធន៍ថ្មីមួយ ឲ្យយើងស្គាល់ពីបច្ចេកទេសនេះ ផងដែរ។ ខ្ញុំសង្ឃឹមថា សាលារៀននឹងបើកក្នុងពេលឆាប់ៗ ព្រោះខ្ញុំចង់រៀននៅសាលាជាងរៀនតាមអនឡាញ ។»
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់ Newsroom Cambodia តាមរយៈបណ្តាញសង្គមតេលេក្រាម ថា មាតាបិតា សិស្សានុសិស្ស និងគ្រប់ភាគីពាក់ព័ន្ធ មានការគាំទ្រលើសេវាសិក្សាពីចម្ងាយរបស់ក្រសួង ជាពិសេស ជាមួយនឹងការផ្សាយតាមរយៈទូរទស្សន៍ជាតិ (ទទក២) ដែលអាចបន្តឲ្យមានការរៀន និងបង្រៀននៅទីក្រុង និងជនបទ ទូទាំង ២៥ខេត្ត រាជធានី ។
លោក រស់ សុវាចា បានអះអាងថា លោកគ្រូ អ្នកគ្រូ នៅតាមមូលដ្ឋាន ក៏បានសម្របសម្រួលការរៀនសូត្រតាមក្រុមតូចៗ ដោយប្រើប្រាស់សន្លឹក កិច្ចការជំនួយ និងសៀវភៅសិក្សាគោល ផងដែរ ។
លោកអ្នកនាំពាក្យបានបន្ថែមថា គ្រួសារដែលមិនទាន់មានទូរទស្សន៍ អាចរៀនតាមទូរទស្សន៍ជាមួយអ្នកជិតខាងជាក្រុមតូចៗ ដោយតម្រូវឲ្យគ្រប់ភាគីពាក់ព័ន្ធ រក្សាគម្លាតសុវត្ថិភាព និង អនុវត្តតាមការណែនាំរបស់ក្រសួងសុខាភិបាល ៕
