ថ្លែងក្នុងពិធីតាំងបង្ហាញផលិតផលកុំព្យូទ័រយួរដៃ ស៊េរីថ្មី របស់ក្រុមហ៊ុន ASUS នាពេលថ្មីៗនេះ លោក Lawrence Liu នាយកគ្រប់គ្រងផលិតផលក្រុមហ៊ុន ASUS នៅកម្ពុជាបានលើកឡើងថា ផលិតផល កុំព្យូទ័រយួរដៃ ASUS Vivobook S15 ស៊េរីថ្មី S531 នេះ គឺត្រូវបានផលិតឡើងជាមួយនឹងសមត្ថភាពកាន់តែអស្ចារ្យជាងមុន ហើយអ្វីដែលគួរឲ្យចាប់អារម្មណ៍បំផុតនោះ គឺវាមានពណ៌ចម្រុះ ដែលតម្រូវទៅតាមចំណង់ចំណូលចិត្តរបស់អ្នកប្រើប្រាស់សម័យថ្មី។
លោក Lawrence Liu បានគូសបញ្ជាក់ថា ការបង្កើតឡើងនូវជម្រើសពណ៌ដ៏ទាក់ទាញទាំង៥នេះ គឺវាជារឿងសំខាន់មួយ ព្រោះពណ៌វាបញ្ជាក់ពីលក្ខណៈអត្ដចរិតរបស់មនុស្សម្នាក់ៗ ហើយវាក៏ផ្សាភ្ជាប់ជាមួយនឹងការរស់នៅប្រចាំថ្ងៃរបស់មនុស្សផងដែរ។
Vivobook S15 គឺជាLaptopដែលបានបង្កើតឡើងស្របតាមភាពជឿនលឿននិងតម្រូវការរបស់យុវវ័យសម័យថ្មី មានជម្រើសពណ៌ចម្រុះស្អាតប្លែកភ្នែកចំនួន៥ពណ៌ផ្សេងៗគ្នាដូចជា ពណ៌បៃតងស្លែរ ពណ៌ផ្កាឈូក ពណ៌ខៀវ ពណ៌ខ្មៅ និង ពណ៌ទឹកប្រាក់។
លក្ខណៈពិសេសរបស់Vivobook S15 ស៊េរីថ្មីនេះ ទី១ គឺវា រចនាបទទំនើប និងទាន់សម័យជាងមុន: រូបរាងស្តើងស្អាត មានជម្រើសពណ៌ចម្រុះស្អាតស័ក្ដិសមនឹងយុវវ័យសម័យថ្មី ជាមួយនឹង ការឌីហ្សាញបាតរុញឡើងខ្ពស់ដែលជំនួយដល់ប្រព័ន្ធត្រជាក់របស់ម៉ាស៊ីន អមជាមួយនឹងរូបរាងស្តើងស្រាលងាយស្រួលយកតាមខ្លួន។ និងទី២ គឺវាមានមុខងារនិងបច្ចេកវិទ្យាថ្មីៗ គឺបច្ចេកវិទ្យាNanoEdge Display ក្រុមហ៊ុនASUSបានធ្វើឲ្យ Laptopនេះសឹងតែគ្មានគែម ហើយក៏ជា Laptop Vivobook ដំបូងដែលមានបច្ចេកវិទ្យា Infrared Camera និង Wi fi 6។
បើតាមការបញ្ជាក់ពីក្រុមហ៊ុន កុំព្យូទ័រយួរដៃ ស៊េរីថ្មី ASUS Vivobook S15 នេះ ក្រុមហ៊ុនASUSគឺមានលក់នៅក្នុងទីផ្សារប្រទេសកម្ពុជាចាប់ពីថ្ងៃនេះតទៅហើយ៕
