កិច្ចប្រជុំរបស់គណៈកម្មាធិការគោលនយោបាយរូបិយវត្ថុ (MPC) របស់ធនាគារកណ្តាលថៃបានបោះឆ្នោតជាឯកច្ឆ័ន្ទសម្រាប់ការដំឡើងអត្រាការប្រាក់បន្ថែម ០,២៥% ដែលនឹងចាប់អនុវត្តភ្លាមៗនេះតែម្ដង។ នេះបើតាមលេខាធិការរបស់គណៈកម្មាធិការគោលនយោបាយហិរញ្ញវត្ថុ គឺលោក ពិទី ឌីសយ៉ាតាត (Piti Disyatat)។
កាលពីខែមុនគណៈកម្មាធិការនេះ បានបោះឆ្នោត៦សំឡងទល់នឹង១សំឡង ដើម្បីដំឡើងអត្រាការប្រាក់ជាលើកដំបូងក្នុងរយៈពេលជិត ៤ ឆ្នាំ ដោយបានដំឡើង ០,២៥ បន្ថែមនាំឲ្យអត្រការប្រាក់គោលកើនដល់ ០,៧៥%។ ការដំឡើងអត្រាកប្រាក់គោលជាបន្ដបន្ទាប់នេះ គឺដើម្បីទប់ស្កាត់អតិផរណា ដែលបាននិងកំពុងកើនខ្ពស់ជាលំដាប់។
គណៈកម្មាធិការ MPC បាននិយាយថា កំណើន និងចក្ខុវិស័យអតិផរណាទាំងមូលគឺស្របជាមួយការវាយតម្លៃពីមុនមករបស់គណៈកម្មាធិការនេះ ដែលបានជឿជាក់ថា ការធ្វើឱ្យគោលនយោបាយដំឡើងការប្រាក់មានលក្ខណៈធម្មតាជាបណ្តើរៗនេះគឺជាវិធីសមស្របមួយដែលនាំឱ្យមានការដំឡើងអត្រាការប្រាក់តាមគោលនយោបាយ ០,២៥%។
អត្ថបទគួរអាន
គណៈកម្មាធិការនេះបានព្យាករថា សេដ្ឋកិច្ចថៃនឹងបន្តងើបឡើងវិញ ប៉ុន្តែវាក៏នឹងមានការកើនឡើងនូវហានិភ័យអតិផរណាផងដែរ ដូច្នេះហើយគណៈកម្មាធិការនេះបាននិយាយថា អត្រាការប្រាក់គោលគួរតែត្រូវបានធ្វើឱ្យមានលក្ខណៈធម្មតាបន្តិចម្តងៗ ដើម្បីស្ទាបស្ទង់មើលវាឱ្យស្របតាមកំណើនរយៈពេលវែងប្រកបដោយនិរន្តរភាព។
គណៈកម្មាធិការគោលនយោបាយរូបិយវត្ថុ បានធ្វើការកែសម្រួលនូវទស្សនវិស័យរបស់ខ្លួនចំពោះកំណើនសេដ្ឋកិច្ចថៃនៅឆ្នាំ២០២២ ដោយព្យការថា នឹងមានកំណើន៣,៣% ប៉ុន្ដែ សម្រាប់ឆ្នាំ២០២៣ គណកម្មាធិការនេះ បានបន្ទាបការព្យាករកំណើនពី ៤,២% មកនៅត្រឹម៣,៨%ប៉ុណ្ណោះ។ ដោយឡែក សម្រាប់អតិផរណារបស់ថៃនៅឆ្នាំ២០២២នេះវិញ ត្រូវបានព្យាករថានឹងមាន ៦,៣% ប៉ុន្ដែ នៅឆ្នាំ២០២៣នឹងមាន ២,៦%។ គណៈកម្មាធិការគោលនយោបាយរូបិយវត្ថុរំពឹងទុកថា អតិផរណារបស់ថៃ នឹងវិលមករកកម្រិតធម្មតា តាមគោលដៅកំណត់ចន្លោះពី ១% ទៅ៣% នៅក្នុងត្រីមាសទី២ ឬទី៣ នៅឆ្នាំ២០២៣៕
អត្ថបទ៖ សុខ ជា
