ស្ដេច បៅ ដាយ បានទិញនាឡិកានេះ នៅទីក្រុងហ្សឺណែវ កាលពីឆ្នាំ១៩៥៤។ វាជានាឡិកាម៉ាក Rolex ទំហំ ៣៦មីល្លីម៉ែត្រ និងមានពណ៌មាស ព្រមទាំងមានដាំពេជ្រ។
សារព័ត៌មាន Bloomberg សរសេរថា នាឡិកានេះមានតម្លៃខ្ពស់ដោយសារតែភាពវិសេសវិសាលនៃប្រវត្តិរបស់វា។ នាឡិការបស់ស្ដេច បៅ ដាយ វៀតណាម នេះ នឹងដាក់លក់ដេញថ្លៃ នៅខែមិថុនា នៅទីក្រុងហ្សឺណែវ ក្នុងតម្លៃ ១លាន ៥សែនដុល្លារអាមេរិក។
គួររំឭកថា ស្ដេច បៅ ដាយ ជាក្សត្ររាជវង្ស ង្វៀន ចុងក្រោយគេ ដែលគ្រងរាជ្យនៅទីក្រុងវ៉េ ប្រទេសវៀតណា ពីឆ្នាំ១៨០២ ដល់ឆ្នាំ១៩៤៥។
សារព័ត៌មាន VN Express សរសេរថា តាមពិត ស្ដេច បៅ ដាយ បានក្លាយជាព្រះមហាក្សត្រជាផ្លូវការនៅឆ្នាំ១៩២៦ នៅព្រះជន្មាយុ ១២ព្រះវស្សា ប៉ុន្តែ ឡើងគ្រងរាជ្យនៅឆ្នាំ១៩៣២ បន្ទាប់ពីយាងត្រឡប់មកពីសិក្សានៅទីក្រុងប៉ារីស ប្រទេសបារាំង។
សេចក្ដីរាយការណ៍ឲ្យដឹងថា ស្ដេច បៅ ដាយ ទិញនាឡិកា Rolex នេះ ខណៈកំពុងទស្សនកិច្ចនៅទីក្រុងហ្សឺណែវ ប្រទេសស្វ៊ីស នាឆ្នាំ១៩៥៤ ដើម្បីចូលរួមសន្និសីទក្រុងហ្សឺណែវ ដែលពុះចែកវៀតណាមជាពីរ គឺវៀតណាមខាងជើង និងវៀតណាមខាងត្បូង។
សាច់ញាតិស្ដេច បៅ ដាយ បានលក់នាឡិកា Rolex ពណ៌មាសនេះ នៅឆ្នាំ២០០២ ក្នុងតម្លៃ ២សែន ៣ម៉ឺន ៥ពាន់ដុល្លារអាមេរិក។
សព្វថ្ងៃ នាឡិការបស់ស្ដេច បៅ ដាយ ស្ថិតនៅជាមួយម្ចាស់ដែលរស់នៅទីក្រុងញូវយ៉ក សហរដ្ឋអាមេរិក ហើយគេរំពឹងថា នាឡិកានេះនឹងលក់បានតម្លៃប្រមាណ ១លាន ៥សែនដុល្លារអាមេរិក នៅពេលដាក់លក់ដេញថ្លៃនៅខែក្រោយនេះ៕
