ទិន្នន័យពីរដ្ឋាភិបាលអាមេរិកដដែលនេះ បានឲ្យដឹងទៀតថា ចាប់ពីខែមករាដល់ខែកញ្ញា នៅឆ្នាំ២០២០នេះ ទំហំពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិក បានកើនឡើងដល់ទៅជាង៥ពាន់លានដុល្លារអាមេរិក កើនឡើង១៦% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះដែរ ការនាំចេញរបស់កម្ពុជាទៅសហរដ្ឋអាមេរិកបានកើនឡើងដល់ ៤ពាន់៨រយលានដុល្លារអាមេរិក មានកំណើន២១% ធៀបនឹងរយៈពេលដូចគ្នាកាលពីឆាំមុន ខណៈដែលការនាំចូលពីអាមេរិកមកវិញសម្រេចបានប្រមាណ ២៣២ លានដុល្លារអាមេរិក ធ្លាក់ចុះដល់ទៅ ៤០%ឯណោះ។
អត្ថបទទាក់ទង
ត្រូវបានស្រង់សម្ដីដោយភ្នាក់ងារព័ត៌មានវៀតណាម VNA មន្ត្រីទំនាក់ទំនងសាធារណៈនៃស្ថានទូតអាមេរិកនៅរាជធានីភ្នំពេញ គឺលោក Arend Zwartjes បានគូសបញ្ជាក់ថា ប្រទេសកម្ពុជា បានទទួលផលប្រយោជន៍យ៉ាងច្រើនពីការអនុគ្រោះពន្ធនាំចូលទៅកាន់ទីផ្សារអាមេរិក តាមរយៈកម្មវិធីប្រព័ន្ធអនុគ្រោះពន្ធ GSP។ ទំនិញសម្រាប់ការធ្វើដំណើរ ដូចជាវ៉ាលី កាបូបដៃ និងកាតាបស្ពាយជាដើម គឺស្ថិតនៅក្នុងចំណោមផលិតផលដែលមានការនាំចេញលឿនបំផុតរបស់កម្ពុជាទៅកាន់អាមេរិក ដោយមានការនាំចេញកើនឡើងពីប្រមាណ ៥០លានដុល្លារនៅឆ្នាំ២០១៦ កើនឡើងដល់ទៅជិត១ពាន់លានដុល្លារនៅឆ្នាំ២០១៩ បន្ទាប់ពីមុខផលិតផលទាំងនេះ បានដាក់បញ្ចូលក្នុងប្រព័ន្ធអនុគ្រោះ GSP នេះ។
មន្ត្រីស្ថានទូតអាមេរិករូបនេះ បានបន្ថែមថា សហរដ្ឋអាមេរិក គឺជាទីផ្សារនាំចេញធំបំផុតរបស់កម្ពុជា ហើយស្ថានទូតអាមេរិកនៅតែធ្វើការងារជាមួយនឹងរាជរដ្ឋាភិបាល និងវិស័យឯកជនរបស់កម្ពុជា ដើម្បីលើកម្ពស់ការលក់ផលិតផលអាមេរិកបន្ថែមទៀត ដើម្បីធ្វើឲ្យពាណិជ្ជកម្មរវាងប្រទេសទាំងពីរកាន់តែមានតុល្យភាពជាងមុន សម្រាប់ប្រយោជន៍ទាំងសងខាង។
មន្ត្រីនាំពាក្យក្រសួងពាណិជ្ជកម្មកម្ពុជា ឯកឧត្តម ប៉ែន សុវិជាតិ បានបញ្ជាក់ប្រាប់ភ្នាក់ងារព័ត៌មានវៀតណាម VNA នាពេលថ្មីៗនេះដែរថា ការនាំចេញរបស់កម្ពុជា ទៅអាមេរិក គឺមិនបានរងផលប៉ះពាល់ធ្ងន់ធ្ងរដោយសារតែកូវីដ-១៩នោះទេ។
អត្ថបទគួរឲ្យចាប់អារម្មណ៍!
ប្រទេសកម្ពុជា មានផលិតផលនាំចេញសំខាន់ៗទៅអាមេរិកដូចជា វាយនភណ្ឌ ស្បែកជើង សម្ភារសម្រាប់ការធ្វើដំណើរ កង់ និងផលិតផលកសិកម្ម។ រីឯនាំចូលពីអាមេរិកមកវិញ មានដូចជា យានយន្ដ ចំណីសត្វ និងគ្រឿងម៉ាស៊ីន។
តាមតួលេខពីក្រសួងពាណិជ្ជកម្ម បានបញ្ជាក់ឲ្យដឹងដែរថា នៅ៩ខែដំបូងនៅឆ្នាំ២០២០ កម្ពុជាបាននាំចេញកង់ជាង ១លាន៥សែនគ្រឿង ទៅកាន់ទីផ្សារក្រៅប្រទេស ដោយរកចំណូលបានជិត៤០០លានដុល្លារ ក្នុងនោះ មានកង់ប្រមាណពាក់កណ្ដាល គឺបាននាំចេញទៅទីផ្សារអាមេរិក។
កាលពីឆ្នាំ២០១៩ ទំហំពាណិជ្ជកម្មទ្វេភាគីរវាងប្រទេសកម្ពុជា និងអាមេរិក បានកើនឡើងដល់ទៅជិត៦ពាន់លានដុល្លារ មានកំណើន៣៧% ធៀបនឹងឆ្នាំ២០១៨៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
