ក្រសួងពាណិជ្ជកម្ម បានបញ្ជាក់ក្នុងសេចក្ដីប្រកាសរបស់ខ្លួនថា «លោកហ្គារី រ៉ូស (Gary Ross) ប្រធានក្រុមហ៊ុន Reitman បានបង្ហាញសុទិដ្ឋិនិយម ចំពោះវឌ្ឍនភាពនៃឧស្សាហកម្ម កាត់ដេរ នៅកម្ពុជា និងបានកោតសរសើរចំពោះកំណែទម្រង់មុតស្រួចព្រមទាំងវិធានការថ្មីៗរបស់រាជរដ្ឋាភិបាល ដើម្បីពង្រឹងភាពប្រកួតប្រជែងរបស់កម្ពុជា តាមរយៈការធ្វើឱ្យប្រសើរទ្បើងនូវបរិយាកាសធុរកិច្ច និងវិនិយោគ»។
ជាមួយគ្នានេះ ឯកឧត្តមរដ្ឋមន្រ្តីស្ដីទី ឱក ប៊ុង បានថ្លែង វាយតម្លៃខ្ពស់ចំពោះទំនាក់ទំនងពាណិជ្ជកម្មទ្វេភាគីកម្ពុជា-កាណាដា ជាពិសេសកិច្ចសហប្រតិបត្តិការសេដ្ឋកិច្ច និងដំណើការចរចាបង្កើតកិច្ចព្រមព្រៀងពាណិជ្ជកម្មសេរី អាស៊ាន-កាណាដា ដែលគាំទ្រដោយប្រទេសទាំងពីរ។
អត្ថបទទាក់ទង!
បើតាមឯកឧត្តមរដ្ឋមន្រ្តីស្ដីទី កំណើននាំចេញរបស់កម្ពុជាក្នុងរយៈពេលពីរទសវត្សរ៍ចុងក្រោយ បានកើនចាប់ពីទឹកប្រាក់ ១ពាន់លានដុល្លារអាមេរិក (២០០១) ដល់ ១៣ពាន់លានដុល្លារអាមេរិក (២០១៨)។ មិនតែប៉ុណ្ណោះរាជរដ្ឋាភិបាលកម្ពុជា ក៏មានការប្តេជ្ញាចិត្តក្នុង ការបន្តគាំទ្រគម្រោងរោងចក្រកាន់តែប្រសើរឡើងនៅកម្ពុជា (BFC) របស់អង្គការពលកម្មអន្តរជាតិ (ILO) ដើម្បីលើកស្ទួយលក្ខខណ្ឌការងារនៅក្នុងឧស្សាហកម្មវាយនភណ្ឌ និងកាត់ដេរសម្លៀកបំពាក់កម្ពុជាផងដែរ។
សូមជម្រាបថា Reitman គឺជាក្រុមហ៊ុនបញ្ជាទិញសម្លៀកបំពាក់ដ៏ធំរបស់កាណាដា ដែលបានធ្វើប្រតិបត្តិការពាណិជ្ជកម្ម ជាមួយឧស្សាហកម្មកាត់ដេរសម្លៀកបំពាក់កម្ពុជា ចាប់តាំងពីឆ្នាំ២០០២-២០០៣ ហើយកាលពីឆ្នាំ២០១៦ ក្រុមហ៊ុនមួយនេះ បានបញ្ជាទិញផលិតផលសម្លៀកបំពាក់ពីរោងចក្រចំនួន ១៤ នៅកម្ពុជា ក្នុងតម្លៃជាទឹកប្រាក់ ៦៦លានដុល្លារអាមេរិក ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
