នៅមុនចេញទៅដំណើរទៅកាន់ទឹកដីប្រទេសអ៊ីស្រាអែល ឧញ៉ា ចេង ខេង អគ្គនាយកក្រុមហ៊ុនអចលនទ្រព្យស៊ីភីអែល បានប្រាប់ឲ្យដឹងថា ការធ្វើដំណើរទៅកាន់ប្រទេសអ៊ីស្រាអែលក្នុងរយៈពេលជិតមួយសប្តាហ៍នាពេលនេះ គឺមានគោលបំណងសំខាន់ចំនួន២។ ទី១ ដើម្បីចូលរួមក្នុងកម្មវិធីបិទវគ្គសិក្សារបស់សិស្សនិស្សិតដែលបានបញ្ចប់ការសិក្សាផ្នែកបច្ចេកទេសកសិកម្មនៅទីនោះផង និងទី២ គឺដើម្បីទៅស្វែងរកបទពិសោធន៍បន្ថែមពី ប្រទេសមួយនេះផង និងដើម្បីដឹងឲ្យកាន់តែច្បាស់បន្ថែមទៀតថា អ៊ីស្រាអែលមានបច្ចេកវិទ្យានិងបច្ចេកទេសកសិកម្មអ្វីខ្លះ ទើបពិភពលោកហៅប្រទេសនេះថា ជាស្តេចកសិកម្ម និងមានប្រជាជនដែលឆ្លាតជាងគេក្នុងលោក។
អត្ថបទទាក់ទង!
ឧកញ៉ាបានបន្ថែម ក្រៅពីបំណងដែលទៅចូលរួមដើម្បីរកបទពិសោធន៍ពីវិស័យកសិកម្មហើយ លោកក៏មានបំណង ស្វែងរកដៃគូវិនិយោគផ្នែកអចលនទ្រព្យផងដែរ ពីព្រោះថា មិនមែនមានតែវិនិយោគិនចិននោះទេដែលចាប់អារម្មណ៍លើវិស័យអចលនទ្រព្យនៅស្រុកខ្មែរ មានប្រទេសដទៃជាច្រើន ដូចជាអ៊ីស្រាអែល ក៏ចាប់អាមរម្មណ៍ច្រើនដែរ ទើបលោកព្យាយាមបង្កើនទំនាក់ឲ្យកាន់តែស្អិតល្មួតបន្ថែមទៀតជាមួយជនជាតិអ៊ីស្រាអែល ដើម្បីរៀនពីគេផង និងទាក់ទាញឲ្យគេវិនិយោគផង។
ថ្វីត្បិតតែស៊ីភីអែលជាក្រុមហ៊ុនអចលនទ្រព្យក៏ពិតមែន តែមួយរយៈពេលចុងក្រោយនេះ ក្រុមហ៊ុននេះ ហាក់មានភាពមមាញឹកជាមួយនឹងការងារសម្របសម្រួលផ្នែកវិស័យកសិកម្មច្រើន ដោយឧញ៉ា ចេង ខេង បញ្ជាក់ថា វិស័យណាក៏ ដោយឲ្យតែផ្តល់ភាពរីកចម្រើន ដល់កម្ពុជា លោកនឹងប្រឹងប្រែងឲ្យអស់លទ្ធភាពដើម្បីជួយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
