អ្នកនាំពាក្យមន្ទីរបញ្ចកោណ លោក ចន ក្រីប៊ី (John Kirby) បាននិយាយថា អ្នកទាំងពីរបានពិភាក្សាអំពីការឈ្លានពានរបស់រុស្ស៊ីមកលើអ៊ុយក្រែន ហើយលោក អូស្ទីន (Austin) បានសម្តែងការព្រួយបារម្ភជាយូរមកហើយអំពីការផ្តល់ជំនួយយោធារបស់ចិន ដែលអាចកើតមានសម្រាប់ប្រទេសរុស្ស៊ី។ លោក វៃ (Wei) បានឆ្លើយតបដោយប្រាប់សហរដ្ឋអាមេរិកឱ្យ "ជៀសវាងពីការប្រើប្រាស់បញ្ហាអ៊ុយក្រែនដើម្បីលាបពណ៌ និងសាបព្រួសភស្តុតាងប្រឆាំងនឹងចិន ឬគំរាមកំហែង និងដាក់សម្ពាធលើប្រទេសចិន"។ នេះបើតាមការចេញផ្សាយដោយសារព័ត៌មានអន្តរជាតិជាច្រើន។
ដោយឡែក ទីក្រុងប៉េកាំងក៏បានទទូចឱ្យបន្តទំនាក់ទំនងសេដ្ឋកិច្ច និងពាណិជ្ជកម្មធម្មតាជាមួយរុស្ស៊ី ខណៈដែលចិនក៏បានបដិសេធចំពោះលទ្ធភាពនៃការផ្តល់ជំនួយយោធាទៅឲ្យរុស្ស៊ីផងដែរ។ លោក វៃ (Wei) ក៏បានឆ្លៀតស៊កពាក្យសម្ដី ទៅអាមេរិកវិញ ដោយលើកឡើងពីក្ដីព្រួយបារម្ភចំពោះអ្វីដែលក្រុងប៉េកាំងយល់ឃើញថា ជាការជាប់ពាក់ព័ន្ធរបស់សហរដ្ឋអាមេរិកក្នុងបញ្ហាកោះតៃវ៉ាន់។
អត្ថបទគួរអាន
លើសពីនេះ ទីក្រុងប៉េកាំងបានប្រាប់អាមេរិកថា កោះតៃវ៉ាន់គឺជាផ្នែកមួយនៃទឹកដីរបស់ប្រទេសចិន ហើយគ្មាននរណាម្នាក់អាចផ្លាស់ប្តូរវាបាននោះទេ។
លោក វៃ (Wei) បាននិយាយបន្តថា៖ «ប្រសិនបើបញ្ហាកោះតៃវ៉ាន់មិនត្រូវបានដោះស្រាយឱ្យបានត្រឹមត្រូវ វានឹងជះឥទ្ធិពលយ៉ាងធ្ងន់ធ្ងរដល់ទំនាក់ទំនងចិន-អាមេរិក"។ ដោយបន្ថែមទៀតថា "យោធាចិននឹងការពារយ៉ាងម៉ឺងម៉ាត់នូវអធិបតេយ្យភាពជាតិ សន្តិសុខ និងបូរណភាពទឹកដីរបស់ខ្លួន»។
សូមជម្រាបថា លោក វៃ (Wei) ក៏បានជំទាស់នឹងសហរដ្ឋអាមេរិកកាលពីដើមខែនេះ ដែលបានលក់គ្រឿងសព្វាវុធ ព្រមទាំងការផ្ដល់ ការបណ្តុះបណ្តាល និងសេវាកម្មផ្សេងទៀតដែលមានតម្លៃ ៩៥ លានដុល្លារទៅឲ្យតៃវ៉ាន់វ៉ាន់ផងដែរ។ នេះបើយោងតាមសេចក្តីថ្លែងការណ៍ដែលចេញផ្សាយដោយក្រសួងការពារជាតិចិន៕
អត្ថបទ៖ ម៉ុន សុកែវ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
