លោក វ៉េន គូ ប្រធានផ្នែកអភិវឌ្ឍន៍ព័ត៌មាននិងទំនាក់ទំនងនៃក្រសួងឧស្សាហកម្ម និងព័ត៌មានវិទ្យាចិន បានមានប្រសាសន៍ថា វាគ្មានមន្ទិលសង្ស័យទៀតនោះទេ ចំពោះគោលដៅចែកចាយ ស្មាតហ្វូនជំនាន់ 5G ឲ្យបានលើសពី ១០០លានគ្រឿងក្នុងឆ្នាំ ២០២០នេះ ដោយគិតត្រឹម ៧ខែ ដើមឆ្នាំនេះ ការចែកចាយស្មាតហ្វូននេះបានកើនដល់ ៨៦លានគ្រឿងទៅហើយ។
បើយោងតាមរបាយការណ៍ពីក្រសួងឧស្សាហកម្ម និងព័ត៌មានវិទ្យារបស់ចិន បានគូសបញ្ជាក់ថា ក្រសួងបានអនុញ្ញាតឲ្យស្មាតហ្វូនចំនួន ១៩៧ម៉ូដែល អាចភ្ជាប់ជាមួយនឹងខ្សែបណ្តាញជាតិបាន ហើយគិតមកទល់ដំណាច់ឆមាសទី ១ គឺមានស្មាតហ្វូន ៦៦លានគ្រឿងទៅហើយ ត្រូវបានប្រើប្រាស់ ហើយតួលេខនេះ នឹងបន្តកើនឡើងទៀត ដោយសារតែ អតិថិជន បន្តដំឡើងស៊េរី ឧបករណ៍ប្រើប្រាស់របស់ពួកគេ។
អត្ថបទទាក់ទង!
លើសពីនេះទៅទៀត ចិន ក៏បានជំរុញការបង្កើតស្ថានីយបណ្តាញ 5G ជាង ២៥ម៉ឺនកន្លែងទៀត នៅក្នុងឆមាសទី ១នេះ ដែលបានធ្វើឲ្យចំនួនស្ថានីយសរុប កើនដល់ ៤១ម៉ឺនកន្លែងទូទាំងប្រទេស ហើយវាកាន់តែកៀកនឹងគោលដៅបង្កើតឲ្យបាន ៦០ម៉ឺនកន្លែងក្នុងឆ្នាំ ២០២០នេះហើយ។
គួរជម្រាបដែរថា រដ្ឋាភិបាលចិនក្រោមការដឹកនាំរបស់ប្រធានាធិបតីចិន ស៊ី ជិនពីង បានជំរុញឲ្យពន្លឿនការអភិវឌ្ឍហេដ្ឋារចនាសម្ព័ន្ធ ប្រព័ន្ធ 5G ដើម្បីស្រោចស្រង់ដល់សេដ្ឋកិច្ច ដែលរងគ្រោះដោយ វិបត្តិមេរោគកូវីដ-១៩ ហើយក្នុងនោះ រដ្ឋាភិបាលចិន ក៏បានជួយឧបត្ថម្ភធន ក្នុងការបង្កើតស្ថានីយបណ្តាញ 5Gផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
