ការិយាល័យស្ថិតិជាតិចិនបានបញ្ចេញរបាយការណ៍នៅថ្ងៃចន្ទទី១៥ខែសីហាថា ផលិតកម្មឧស្សាហកម្មបានកើនឡើង ៣,៨% ក៏ពិតមែនធៀបនឹងខែកក្កដាឆ្នាំមុន ប៉ុន្តែបើធៀបនឹងខែមិថុនា ចំនួននេះមានការទាបជាងបន្ដិច ពោលគឺកំណើនកាលពីខែមិថុនាមានចំនួន ៣,៩%។ កំណើននេះគឺខុសទាំងស្រុងពីការព្យាកររបស់ក្រុមអ្នកសេដ្ឋកិច្ចចិន ដែលថានឹងមានការកើនឡើង៤,៣%។
បន្ថែមពីលើនេះ ការលក់រាយបានកើនឡើងក្នុងល្បឿនយឺតជាងការរំពឹងទុករបស់រដ្ឋចិន ពោលគឺបានកើនឡើងថែ ២,៧%ប៉ុណ្ណោះ ខណៈដែលការវិនិយោគទ្រព្យសកម្មបានកើនឡើង ៥,៧% ក្នុងរយៈពេលប្រាំពីរខែដំបូងនៃឆ្នាំនេះ។ អត្រានេះក៏ខុសទាំងស្រុងពីការប៉ាន់ស្មានរបស់ទីក្រុងប៉េកាំង ដែលថា ការវិនិយោគទ្រព្យសកម្មអាចមានជាង ៦,២%។
ទន្ទឹមនេះលំហូរនៃចរន្ដឡានដឹកទំនិញមានកំរិតទាបនៅក្នុងខែកក្កដា បើធៀបនឹងពេលដូចគ្នាកាលពីឆ្នាំមុន ខណៈវិស័យអចលនទ្រព្យវិញ គេសង្កេតឃើញថា ការលក់ផ្ទះក៏បានធ្លាក់ចុះផងដែរ បើធៀបនឹងឆ្នាំទៅមិញ។ រីឯ ភាពគ្មានការងារធ្វើនៅក្នុងប្រទេសចិនមានដល់អត្រា ៥,៤%។
ការប្តេជ្ញាចិត្តមិនប្រួលប្រែ របស់រដ្ឋាភិបាលទីក្រុងប៉េកាំងចំពោះគោលនយោបាយគ្មានកូវីដ១៩ បានធ្វើឱ្យប្រទេសនេះ បន្ដជួបការលំបាកក្នុងការរក្សានូវវឌ្ឍនភាពសេដ្ឋកិច្ច និងធ្វើឱ្យអ្វីៗស្ថិតនៅក្នុងភាពមិនច្បាស់លាស់។ មិនច្បាស់លាស់ក៏ដោយសារតែ ភាពភ័យខ្លាចក្នុងការរឹតបន្តឹងនិងការបិទខ្ទប់ម្តងហើយម្តងទៀត នៅតែបន្តកើតមានក្នុងសហគមន៍ ធ្វើឲ្យប៉ះពាល់ដល់ពលរដ្ឋ អាជីវករ និងពិសេសអ្នកវិនិយោគ។
អត្ថបទគួរអាន
ជាក់ស្តែង បើទោះបីករណីឆ្លងនៅទីក្រុងសៀងហៃ និងខេត្តជុំវិញនោះបានចាប់ផ្តើមធ្លាក់ចុះកាលពីខែមុនក៏ដោយ តែតួលេខបានកើនឡើងនៅតំបន់ជាច្រើនផ្សេងទៀតរួមទាំងខេត្តភាគខាងកើត ដូចជា ខេត្តអានហុយ ស៊ីអាន និងមជ្ឈមណ្ឌលផលិតកម្មដ៏ធំគឺ ខេត្តហ្វូស៊ី។
ដោយឡែក ចាប់តាំងពីចូលដល់ខែសីហាមក ករណីឆ្លងកូវីដ១៩ថ្មីៗត្រូវបានរកឃើញនៅលើកោះ ហៃណាន ជាកន្លែងដែលអាជ្ញាធរបានរាំងខ្ទប់សម្រាប់អ្នកមកសម្រាកលំហែកាយ ផ្អាកជើងហោះហើរ និងបិទអាជីវកម្មនៅលើកោះមួយនេះផងដែរ។
សូមជម្រាបថា ចាប់តាំងពីចូលដល់ដើមត្រីមាសទី៣ឆ្នាំនេះមករដ្ឋអំណាចចិន ហាក់មិនសូវជាអួតអាងពីការសម្រេចឱ្យបានកំណើនសេដ្ឋកិច្ចរង្វង់ ៥,៥% ដូចធ្លាប់បានតាំងចិត្តពីមុនឡើយ។ ជាមួយនឹងកិច្ចប្រជុំការិយាល័យនយោបាយកំពូលកាលពីខែកក្កដាកន្លងទៅ ប៉េកាំងត្រឹមតែបានអំពាវនាវថា ធ្វើយ៉ាងណាសម្រេចឱ្យ «លទ្ធផលល្អបំផុត» តាមដែលអាចធ្វើទៅបាន សម្រាប់កំណើនសេដ្ឋកិច្ច ជាជាងការលើកឡើងពីគោលដៅសេដ្ឋកិច្ចជាតិជាក់លាក់មួយ៕
