តាមការរាយការណ៍មួយដោយសារព័ត៌មាន South China Morning Post បានឲ្យដឹងថា ក្រុមហ៊ុនចិននៅវៀតណាមកំពុងរងផលប៉ះពាល់យ៉ាងខ្លាំង ជាមួយនឹងស្ថានការដ៏លំបាកនៃវិបត្តិ កូវីដ-១៩ ដែលកំពុងតែវិវត្តកាន់តែអាក្រក់ទៅៗនៅក្នុងប្រទេសវៀតណាម ខណៈដែលអាជីវកម្មដែលខ្លះ បានរងការខាតបង់ប្រាក់ចំណូលរាប់សែនដុល្លារអាមេរិកក្នុងមួយថ្ងៃៗ។
ការរាលដាលនូវមេរោគកូវីតបំលែងថ្មី Delta បានធ្វើឲ្យចំនួនអ្នកឆ្លងថ្មីបានកើនឡើងយ៉ាងរហ័សក្នុងប្រទេសវៀតណាម។ ក្នុងនោះដែរ អាជ្ញាធរនៅក្នុងទីក្រុង Ho Chi Minh ដែលជាបណ្តុំសេដ្ឋកិច្ចនិង ហិរញ្ញវត្ថុ ព្រមទាំងខេត្តឧស្សាហកម្ម ដូចជាខេត្ត Dong Nai និង Binh Duogជាដើម បានសម្រេចបិទទ្វារបណ្ដោះអាសន្ន នូវរាល់អាជីវកម្មដែលមិនមានភាពចាំបាច់ និងដាក់ការរឹតបន្តឹងការប្រមូលផ្តុំ និងរក្សាគម្លាតសង្គមផងដែរ។
លោក ស៊ូ ឈួនលូ (Xu Chuanlu) អ្នកគ្រប់គ្រងរោងចក្រផលិតផ្លាស្ទិកDinh Thinh នៅទីក្រុងហូជីមិញ បាននិយាយថា រោងចក្ររបស់លោកត្រូវបានបិទទ្វាររយៈពេល ១២ ថ្ងៃ និងបាននាំមកនូវការចំណាយដ៏សម្បើម។
អ្នកគ្រប់គ្រងរោងចក្ររូបនេះ ធ្លាប់រំពឹងថានឹងអាចចាប់ផ្តើមផលិតកម្មបានឆាប់ៗ ប៉ុន្ដែ ករណីឆ្លងថ្មីនៅវៀតណាមបានកើនឡើង រាប់ពាន់ករណីក្នុងមួយថ្ងៃមិនស្រាកស្រាន្ដ បានធ្វើឲ្យចង្វាក់ផលិតកម្មត្រូវបានពន្យារពេលកាន់តែវែងជាងមុន ហើយគេក៏មិនទាន់ដឹងនៅឡើយថា ស្ថានភាពនេះនឹងធូរស្រាលមកវិញនៅពេលណានោះទេ។
ប្រទេសវៀតណាមបានទទួលជោគជ័យក្នុងការទប់ស្កាត់មេរោគកូវីត ១៩ នេះកាលពីបីខែមុន។ ប៉ុន្តែបានកើនឡើងអ្នកឆ្លងសរុបរហូតដល់ជិត១០ម៉ឺនករណីហើយ គិតត្រឹមថ្ងៃចន្ទ ដើមសប្ដាហ៍នេះ។
អត្ថបទគួរអាន
លោក ស៊ូ ឈួនលូ (Xu Chuanlu) អ្នកគ្រប់គ្រងរោងចក្រផលិតផ្លាស្ទិក Dinh Thinh បានបន្ថែមទៀតថា កម្មករក្នុងរោងចក្ររបស់លោកទាំងអស់ត្រូវបានរំសាយការងារ ឲ្យត្រឡប់ទៅផ្ទះអស់ហើយ។ នៅសល់តែសហការីជនជាតិចិនពីរ ទៅបីនាក់ប៉ុណ្ណោះស្នាក់នៅក្នុងរោងចក្រ ដោយមិនត្រូវបានអនុញ្ញាតឲ្យចេញក្រៅនោះទេ។ លោកបន្ថែមថា រោងចក្ររបស់លោកបានបាត់បង់ចំណូលរាប់សែនដុល្លាររៀងរាល់ថ្ងៃ ខណៈការដឹកជញ្ជូនទំនិញមិនអាចបែងចែកទៅតាមការបញ្ជាទិញបានទាន់ពេលវេលាកំណត់នោះឡើយ។
អ្នកគ្រប់គ្រងរោងចក្ររូបនេះ អះអាងទៀតថា មានកម្មករជាង១ពាន់នាក់ ធ្វើការក្នុងរោងចក្រផ្លាស្ទិកនេះ គឺពួកគេត្រូវបានផ្ដល់ប្រាក់ខែគោល បើទោះបីជារោងចក្រផ្អាកផលិតកម្មក៏ដោយ ហើយគ្មានរដ្ឋាភិបាលជួយឧបត្ថម្ភធននោះទេ។
សូមបញ្ជាក់ថា ចំនួនរោងចក្ររើពីប្រទេសចិនចូលមកវៀតណាមបានកើនឡើងគួរឲ្យកត់សម្គាល់ ចាប់តាំងពីមានសង្គ្រាមពាណិជ្ជកម្មរវាងអាមេរិក និងចិនផ្ទុះឡើងមកម្ល៉េះ ដោយរោងចក្រពីប្រទេសចិនទាំងនោះ ចូលមកតាំងមូលដ្ឋាននៅវៀតណាម ដើម្បីអាចផលិតនាំចេញទៅអាមេរិកដោយមិនជាប់ការដាក់បន្ទុកពន្ធគយពីរដ្ឋាភិបាលអាមេរិក៕
អត្ថបទ៖ សុខ សិទ្ធិការ្យ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
