តាមរយៈទណ្ឌកម្មដែលបានដាក់នោះ សហភាពអឺរ៉ុបបានបង្កកទ្រព្យសម្បត្តិ និងហាមប្រាមការធ្វើដំណើរលើមនុស្ស ២២ នាក់ និងបានអនុវត្តវិធានការរឹតត្បិតលើក្រុមហ៊ុនចំនួន ៤ រួមទាំងក្រុមហ៊ុនរដ្ឋ និងឯកជន។
ក្រុមហ៊ុនទាំងនោះ រួមមានសហគ្រាសរដ្ឋ Myanma Oil and Gas Enterprise ដែលជាដៃគូបណ្តាក់ទុនរួមគ្នាជាមួយក្រុមហ៊ុន Total Energies និង Chevron នៅក្នុងគម្រោងទាញយកឧស្ម័ននៅឈូងសមុទ្រទាំងអស់ក្នុងប្រទេសមីយ៉ាន់ម៉ា និងក្នុងតំបន់ឧស្ម័ន Yadana។ ក៏ប៉ុន្តែ កាលពីខែមុន ក្រុមហ៊ុន Total និង Chevron បាននិយាយថា ពួកគេកំពុងតែដកខ្លួនចេញពីប្រទេសមីយ៉ាន់ម៉ាហើយ ដោយសារតែមានការរំលោភសិទ្ធិមនុស្សយ៉ាងធ្ងន់ធ្ងរ ដែលប្រព្រឹត្តិដោយយោធា។
ក្នុងនោះ រូបិយប័ណ្ណបរទេសក្នុងប្រទេសមីយ៉ាន់ម៉ាប្រហែល៥០% គឺបានមកពីប្រាក់ចំណូលឧស្ម័នធម្មជាតិ ដោយក្នុងនោះ សហគ្រាសរដ្ឋ Myanma Oil and Gas Enterprise រំពឹងថានឹងរកបានចំណូលប្រហែល ១ពាន់៥រយលានដុល្លារពីគម្រោងនៅសមុទ្រ និងបំពង់បង្ហូរប្រេងនៅមីយ៉ាន់ម៉ាក្នុងឆ្នាំ ២០២១-២០២២ នេះបើយោងតាមការព្យាករណ៍របស់អាជ្ញាធរប្រទេសនេះ។
អត្ថបទគួរអាន
ការដាក់ទណ្ឌកម្មលើសហគ្រាសរដ្ឋ Myanma Oil and Gas Enterprise កើតឡើងបន្ទាប់ពីការធ្វើយុទ្ធនាការអស់រយៈពេលជាយូរមកហើយពីក្រុមសិទ្ធិមនុស្សក្នុងប្រទេសមីយ៉ាន់ម៉ា និងជុំវិញពិភពលោក ។ ការដាក់ទណ្ឌកម្មនេះត្រូវបានគេចាត់ទុកថា នឹងកាត់ផ្តាច់ប្រភពចំណូលដ៏សំខាន់នៃមូលនិធិរបស់ក្រុមយោធាមីយ៉ាន់ម៉ា។
ដោយឡែកលោក John Sifton នាយកផ្នែកតស៊ូមតិប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សបានសាទរចំពោះការសម្រេចចិត្តរបស់សហភាពអឺរ៉ុប ដោយលោកបានមើលឃើញថា ការដាក់ទណ្ឌកម្មប្រឆាំងនឹងសហគ្រាសរដ្ឋ គឺពិតជាមានសារៈសំខាន់ ដោយសារតែប្រាក់ចំណូលរបស់សហគ្រាសនេះបានផ្គត់ផ្គង់ទៅដល់រដ្ឋប្រហារយោធា។
គិតមកទល់ពេលនេះ សហភាពអឺរ៉ុប បានដាក់ទណ្ឌកម្មលើអ្នកពាក់ព័ន្ធចំនួន ៦៥នាក់ហើយ រួមទាំងស្ថាប័នចំនួន១០ផ្សេងទៀត ដែលជាអង្គការ ទីភ្នាក់ងារ ក្រុមហ៊ុន ឬធនគារ ដែលទាក់ទងនឹងបញ្ហារំលោភបំពានសិទ្ធិមនុស្សនៅមីយ៉ាន់ម៉ានេះ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
