ក្នុងកិច្ចប្រជុំផ្ទៃក្នុងមួយកាលពីថ្ងៃអាទិត្យសប្តាហ៍មុន ប្រធានក្រុមហ៊ុន Evergrande លោក ហ៊ុយ កាយាននិយាយថា ក្រុមហ៊ុនមានគោលបំណងស្តារឡើងវិញនូវការដ្ឋានសំណង់ទាំងស្រុងនៅទូទាំងប្រទេសតែម្តងនៅក្នុងខែនេះ ខណៈដែលកាលពីចុងឆ្នាំ២០២១ មានការដ្ឋានតែជាង ៩៣%ប៉ុណ្ណោះផ្តើមមានសកម្មភាពឡើងវិញ។ បន្ថែមពីលើនេះ ក្រុមហ៊ុនបានដាក់គោលដៅលក់អាផាតមិនចេញឲ្យបាន ៦០ម៉ឺនយូនីតនៅពេញមួយឆ្នាំ២០២២នេះ។
ថ្នាក់ដឹកនាំ Evergrande អះអាងទៀតថា បច្ចុប្បន្ន ក្រុមហ៊ុនមានមូលនិធិបម្រុងប្រមាណ៨ពាន់លានដុល្លារ ដើម្បីត្រៀមចំណាយលើការសាងសង់ក្នុងឆ្នាំនេះ ខណៈគេនៅមានសាច់ប្រាក់ជិត២៧ពាន់លានដុល្លារទៀត ដែលទទួលបានពីការលក់កាលពីឆ្នាំមុន។
អត្ថបទគួរអាន
យ៉ាងណាក៏ដោយនៅពេញមួយឆ្នាំ២០២១ក្រុមហ៊ុន Evergrande បានកត់ត្រាពីការលក់អចលនទ្រព្យធ្លាក់ចុះយ៉ាងខ្លាំង ក្នុងអត្រាជិត៤០% គិតជាទឹកប្រាក់ប្រមាណ ៦២ពាន់លានដុល្លារអាមេរិក។
សូមជម្រាបថា Evergrande នៅតែបន្តត្រដាបត្រដួសក្នុងបំណុលសរុបជាង ៣០០ពាន់លានដុល្លារ ដែលរួមបញ្ចូលទាំងបំណុលប្រហែល ២០ពាន់លានដុល្លារទៀត ជាបណ្ណបំណុលនៅក្រៅប្រទេស។ បច្ចុប្បន្នក្រុមហ៊ុននេះ ត្រូវបានរដ្ឋចិន ដកឲ្យមកស្ថិតក្រោមការត្រួតពិនិត្យដោយផ្ទាល់ពីរដ្ឋបាលខេត្តក្វាងទុង ជាមួយនឹងគណៈកម្មាធិការគ្រប់គ្រងហានិភ័យថ្មីមួយ ដែលគ្រប់គ្រងដោយមន្ត្រីក្នុងតំបន់។ វិធានការនេះធ្វើឡើង ដើម្បីជួយជ្រោមជ្រែង Evergrande ក្នុងការដោះស្រាយបញ្ហាបំណុល និងបញ្ចៀសភាពក្ស័យធន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
