ភ្នាក់ងារអង្គការទេសចរណ៍ពិភពលោក ដែលមានទីស្នាក់ការនៅទីក្រុងម៉ាឌ្រីដ ប្រទេសអេស្ប៉ាញមួយនេះ បានរៀបរាប់នៅក្នុងរបាយការណ៍ចុងក្រោយរបស់ខ្លួនថា ចំនួនភ្ញៀវទេសចរកាលពីឆ្នាំ២០២២ មានរហូតដល់ជាង ៩០០លាននាក់ ខ្ពស់ជាងការរំពឹងទុក ខណៈកាលពីឆ្នាំ២០២១គឺមានត្រឹមជាង ៤០០លាននាក់ប៉ុណ្ណោះ។
ប៉ុន្តែចំនួនភ្ញៀវទេសចរអន្តរជាតិកាលពីឆ្នាំ២០២២មានត្រឹមតែ៦៣% នៃតួរលេខដែលបានប្រកាសកាលពីឆ្នាំ២០១៩ប៉ុណ្ណោះ ពោលគឺជាពេលដែលពិភពលោកមិនទាន់ជួបប្រទះនឹងជំងឺកូវីដ១៩។ យ៉ាងណាក៏ដោយ ស្ថាប័នដដែលនេះបានព្យាករណ៍ថា នៅឆ្នាំ២០២៣ ចំនួនទេសចរអាចកើនឡើងដល់កម្រិតចន្លោះពី ៨០% ទៅ ៩៥% នៃចំនួនដែលគេធ្លាប់កត់ត្រាកាលពីឆ្នាំ២០១៩។
អគ្គលេខាធិការអង្គការទេសចរណ៍ពិភពលោក លោក ហ្ស៊ូរ៉ាប់ ផូឡូលីកាស្វ៊ីលី (Zurab Pololikashvili) បាននិយាយនៅក្នុងសេចក្តីថ្លែងការណ៍មួយថា ឆ្នាំ២០២៣នេះជាឆ្នាំប្រកបដោយសុទិដ្ឋិនិយម និងក្ដីរំពឹងសម្រាប់ការកើនឡើងនៃចំនួនភ្ញៀវទេសចរពិភពលោក។ ប្រភពដដែលបានបង្ហាញថា ចំនួនភ្ញៀវទេសចរអន្តរជាតិត្រូវបានគាំទ្រឲ្យងើបឡើងវិញនៅឆ្នាំ២០២៣ ដោយគេជឿថាភ្ញៀវទេសចរមកពីប្រទេសចិន នឹងផ្តល់ផលប្រយោជន៍ជាពិសេសដល់ប្រទេសគោលដៅក្នុងតំបន់អាស៊ី។ ក្នុងពេលជាមួយគ្នានេះ តម្រូវការភ្ញៀវទេសចរមកពីសហរដ្ឋអាមេរិកនៅតែដើរតួនាទីយ៉ាងសំខាន់ ក្នុងការផ្តល់អត្ថប្រយោជន៍ដល់គោលដៅទេសចរនានានៅក្នុងតំបន់ ហើយលើសពីនេះអឺរ៉ុប នឹងទទួលបានអត្ថប្រយោជន៍ទាំងអស់នេះផងដែរ។
អត្ថបទគួរអាន
គួរកត់សម្គាល់ថា កន្លងមកចំនួនភ្ញៀវទេសចរដែលចេញ-ចូលប្រទេសចិន មានដាំក្បាលចុះខ្លាំងធៀបទៅឆ្នាំ២០១៩ ដោយសាររដ្ឋាភិបាលទីក្រុងប៉េកាំងសម្រេចបិទប្រទេសអស់រយៈពេល៣ឆ្នាំ ក្រោមវិធានការទប់ស្កាត់ជំងឺកូវីដ១៩ដ៏តឹងរ៉ឹង។ ការរឹតបន្តឹងនេះបានបន្សល់ទុកចន្លោះប្រហោងធំមួយនៅក្នុងទីផ្សារទេសចរណ៍អាស៊ី ដែលគិតចាប់ពីប្រទេសថៃទៅដល់ប្រទេសជប៉ុន គឺសុទ្ធតែពឹងផ្អែកប្រភពនៃភ្ញៀវទេសចរពីប្រទេសចិនទាំងអស់។
អ្នកវិភាគរំពឹងថា នៅរដូវក្ដៅចុងខែមីនាខាងមុខនេះ ក្រុមហ៊ុនអាកាសចរណ៍ចិនទំនងជាបង្កើនជើងហោះហើរ និងមានប្រតិបត្តិការមមាញឹកជាងមុន។ ប្រទេសចិន គឺជាទីផ្សារទេសចរណ៍ក្រៅប្រទេសដ៏ធំបំផុតរបស់ពិភពលោកក្នុងឆ្នាំ២០១៩ ដូចនេះការបន្ធូរបន្ថយនូវច្បាប់ដ៏តឹងរ៉ឹងនៃការធ្វើដំណើរ គឺជាជំហានដ៏សំខាន់ក្នុងការស្ដារ ឡើងវិញនូវវិស័យទេសចរណ៍ទូទាំងពិភពលោក។
ទោះយ៉ាងណា អង្គការទេសចរណ៍អន្តរជាតិបានព្រមានពីបញ្ហាអតិផរណា និងអត្រាការប្រាក់គោលខ្ពស់ បូករួមនឹងវិបត្តិសេដ្ឋកិច្ចសកល អាចរារាំងដល់ការងើបឡើងវិញនៃវិស័យទេសចរណ៍នៅឆ្នាំ២០២៣ ក៏អាចថាបាន។ នៅក្នុងបរិបទសេដ្ឋកិច្ចដ៏លំបាកពេលនេះ ភ្ញៀវទេសចរភាគច្រើននឹងងាកមកចាប់អារម្មណ៍តំបន់គោលដៅទេសចរណ៍ជិតៗខ្លួន ជាជាងការធ្វើដំណើរវែងឆ្ងាយដែលត្រូវចំណាយអស់ប្រាក់ច្រើន ពោលគឺការធ្វើទេសចរណ៍មាននិន្នាការសន្សំសំចៃជាងមុន៕
អត្ថបទ ៖ សារៀម លក្ខិណា
