ការពិចារណានឹងសម្រេចបើកឲ្យមានការនាំចេញធ្យូងថ្មឡើងវិញនេះ ក្រោយពេលដែល មានប្រទេសជាច្រើនរួមទាំង ជប៉ុន ហ្វីលីពីន និងកូរ៉េខាងត្បូង បានចេញមកទទូចឲ្យប្រទេសឥណ្ឌូនេស៊ី នាំចេញធ្យូងថ្មឡើងវិញ ដោយសារតែបារម្ភពីផលប៉ះពាល់ដល់តម្រូវការប្រើប្រាស់ថាមពល។
បន្ទាប់ពីបានដាក់ការហាមឃាត់ការនាំចេញធ្យូងថ្មបាន១០ថ្ងៃ រដ្ឋាភិបាលប្រទេសឥណ្ឌូនេស៊ីកំពុងពិចារណានឹងសម្រេចដកការហាមឃាត់នេះចេញវិញ នៅពេលឆាប់ៗខាងមុខនេះ។
ថ្លែងនៅក្នុងជំនួបតាមប្រព័ន្ធវីដេអូអនឡាញ ជាមួយនឹងរដ្ឋមន្ត្រីក្រសួងឧស្សាហកម្មជប៉ុន លោក អារីហ្វីន តាសរីហ្វ (Arifin Tasrif) បាននិយាយថា នៅ១សប្ដាហ៍កន្លងមកនេះ ឥណ្ឌូនេស៊ីបានស្ដុកទុកធ្យូងថ្មបានច្រើន ហើយនៅប៉ុន្មានថ្ងៃខាងមុខនេះ ស្ដុកធ្យូងថ្មនឹងកើនក្នុងចំនួនច្រើនទៀត ដូច្នេះ ឥណ្ឌូនេស៊ីអាចនឹងមានសន្ដិសុខធ្យូងថ្មគ្រប់គ្រាន់ ដែលអាចបើកឲ្យមានការនាំចេញឡើងវិញឆាប់ៗនេះ។
ឥណ្ឌូនេស៊ីបានចាប់ផ្ដើមផ្អាកការនាំចេញធ្យូងថ្មចាប់តាំងពីថ្ងៃទី១ខែមករាមក បន្ទាប់ពីមានរបាយការណ៍បង្ហាញថា កម្រិតស្ដុកប្រេងឥន្ធនៈមានទាប ដែលអាចបង្កការខ្វះខាតថាមពល និងធ្វើឲ្យអគ្គិសនីនឹងត្រូវកាត់ផ្ដាច់ញឹកញាប់។អត្ថបទគួរអាន
ក្រោយពី ឥណ្ឌូនេស៊ីផ្អាកការនាំចេញធ្យូងថ្ម ប្រទេសដែលបញ្ជាទិញធ្យូថ្មពីឥណ្ឌូនេស៊ី រួមមាន ជប៉ុន ហ្វីលីពីន និងកូរ៉េខាងត្បូងបានអំពាវនាវឲ្យឥណ្ឌូនេស៊ីដកបម្រាមនាំចេញធ្យូងថ្មនេះផងដែរ។ ក្រៅពីប្រទេសទាំងបីនេះ ប្រទេសចិន ក៏ជាប្រទេសបញ្ជាទិញធ្យូថ្ម ពីឥណ្ឌូនេស៊ីច្រើនជាងគេដែរ ប៉ុន្ដែ ចិនមិនបានចេញមុខអំពាវនាវឲ្យឥណ្ឌូនេស៊ីដកចោលបម្រាមនេះនោះទេ បើទោះបីចិនកំពុងប្រឈមនឹងការខ្វះខាតថាមពល ក្រោយមានជម្លោះជាមួយអូស្ត្រាលីក៏ដោយ។
បច្ចុប្បន្ន ក្រុមហ៊ុនសហព័ន្ធថាមពលឥណ្ឌូនេស៊ី ដែលជាក្រុមហ៊ុនរដ្ឋរបស់ឥណ្ឌូនេស៊ី បានប៉ាន់ប្រមាណថា នៅក្រោយពេលផ្អាកការនាំចេញរយៈពេល១០ថ្ងៃមកនេះ ក្រុមហ៊ុនបានស្ដុកធ្យូងថ្មបានប្រមាណ ១៤លានតោន ប៉ុន្ដែ គេចង់បង្កើនឲ្យបានដល់ ២០លានតោន នៅក្នុងរយៈពេល២០ថ្ងៃសម្រាប់បម្រើដល់រោងចក្រថាមពលនៅក្នុងប្រទេសនេះ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
