ទាក់ទងនឹង country music ប្រសិនបើលោកអ្នកមានឱកាសទៅទស្សនាទីក្រុង Nashville មានទីកន្លែងចំនួន៣ ដែលលោកអ្នកមិនគួររំលង ដូចជា តំបន់ Lower Broadway ហាង Bluebird Cafe និងសាលមហោស្រព Ryman Auditorium។
តំបន់ Lower Broadway នៅកណ្ដាលទីក្រុងតែម្ដង ដែលនៅពេលរាត្រី តំបន់នេះជាទីប្រជុំទៅដោយបារ និងភោជនីយដ្ឋាន អមដោយការប្រគំតន្ត្រីផ្ទាល់ រាល់រាត្រី គ្រប់ហាង គ្រប់បារ។
អ្នកចម្រៀង តន្ត្រីករ នៅតំបន់នេះ ជួបជុំគ្នាជាក្រុមប្រគំតន្ត្រី country music ដើម្បីផ្សព្វផ្សាយស្នាដៃចម្រៀងរបស់ពួកគេផង បង្អួត country music ដល់ភ្ញៀវទេសចរផង ហើយការសម្ដែងរបស់ពួកគេ គឺមិនតម្រូវឲ្យអ្នកចូលទស្សនាទិញសំបុត្រអ្វីនោះទេ ដោយភ្ញៀវគ្រាន់តែពិសារស្រាបៀរ និងផ្ដល់ជា tip ទៅតាមសទ្ធា ដល់ក្រុមភ្លេង។
នៅតំបន់ Lower Broadway នេះ គឺអ៊ូរអរខ្លាំងណាស់ ហើយបើលោកអ្នកបានទៅកម្សាន្តនៅទីនេះ សូមកុំចូលតែហាងមួយ ឬបារតែមួយ គឺគួរតែចូលឲ្យបានច្រើនកន្លែងតាមដែលអាចធ្វើទៅបាន ដើម្បីរីករាយជាមួយតន្ត្រី country music ដែលជាមោទនភាពរបស់ប្រជាជនរស់នៅក្នុងទីក្រុង Nashville នេះ។
កន្លែងមួយទៀត ដែលអ្នកគួរទៅទស្សនាផងដែរ គឺ Bluebird Cafe។ នៅទីនេះ ជាកន្លែងជួបជុំគ្នានៃអ្នកនិពន្ធទំនុកភ្លេង អ្នកនិពន្ធបទចម្រៀង និងអ្នកចម្រៀងល្បីៗ។ ហាង Bluebird Cafe នេះ មែនទែនទៅ ប្រៀបដូចជាកន្លែងដែលអ្នកនិពន្ធភ្លេង ចម្រៀង និងអ្នកចម្រៀង គេបង្អួតស្នាដៃគ្នា ឲ្យអតិថិជនស្ដាប់ ច្រៀងតាម និងទះដៃសាទរ។
ប៉ុន្តែ សម្រាប់អ្នកចង់ចូលកន្លែងនេះ គឺគួរតែកក់កន្លែងទុកជាមុន បើមិនដូច្នេះទេ ប្រាកដជាគ្មានកន្លែងអង្គុយហើយ។
កន្លែងមួយទៀត គឺសាលមហោស្រព Ryman Auditorium ដែលជាសំណង់ប្រវត្តិសាស្ត្រតំណាងឲ្យកំណើតនៃតន្ត្រីនិងចម្រៀង country music របស់ទីក្រុង Nashville។ សាលនេះ មានប្រវត្តិកកើតតាំងពីឆ្នាំ១៨៨៥ ដែលកាលនោះ កសាងដោយធុរជនមួយរូបឈ្មោះ Thomas G. Ryman។
សាលមហោស្រព Ryman Auditorium នេះ ធ្លាប់ទទួលអ្នកចម្រៀង តារាសម្ដែង សកម្មជន និងអ្នកនយោបាយល្បីៗជាច្រើននាក់ ក្នុងនោះមានទាំងលោកប្រធានាធិបតី Theodore Roosevelt និងតារាកំប្លែង Charlie Chaplin ផងដែរ។
នៅឆ្នាំ១៩៤៣ សាលមហោស្រពនេះបានក្លាយជាស្ទូឌីយ៉ូផ្សាយផ្ទាល់របស់កម្មវិធីវិទ្យុដ៏ល្បីល្បាញបំផុតរបស់ពិភពលោក គឺកម្មវិធី Grand Ole Opry ហើយកម្មវិធីនេះថតនិងផ្សាយផ្ទាល់ចេញពីទីនេះ អស់រយៈពេល៣១ឆ្នាំ។
នៅដើមទសវត្សរ៍ឆ្នាំ៧០ ពេលដែលកម្មវិធីវិទ្យុ Opry ប្ដូរទីកន្លែង សាលមហោស្រព Ryman បានក្លាយជាទីស្ងាត់ជ្រងំ និងត្រូវបានគេបំភ្លេចចោល មិនតែប៉ុណ្ណោះ គ្រានោះគេប៉ុនប៉ងនឹងបំផ្លាញវាចោលទៅទៀត។
ប៉ុន្តែ ប្រជាជនរស់នៅក្នុងទីក្រុង Nashville បានជួសជុលនិងកែលម្អសាលមហោស្រពនេះឡើងវិញ នៅទសវត្សរ៍ឆ្នាំ៩០ ដែលធ្វើឲ្យសាលប្រវត្តិសាស្ត្រមួយនេះបន្តបង្កើតភាពល្បីល្បាញរហូតដល់សព្វថ្ងៃ។
ទីក្រុង Nashville នៅមានទីកន្លែងជាច្រើនទៀត ដែលលោកអ្នកគួរទស្សនា ប៉ុន្តែ ក្នុងអត្ថបទនេះ យើងសូមលើកយកត្រឹមតែទីកន្លែងនានា ដែលទាក់ទងនឹងតន្ត្រីនិងចម្រៀង country music តែប៉ុណ្ណោះ៕
