របាយការណ៍ពាណិជ្ជកម្មរបស់អាមេរិក បង្ហាញឲ្យឃើញថា ចិនមិនបានបញ្ជាទិញទំនិញពីសហរដ្ឋអាមេរិក ស្របតាមចំនួនដែលគេបានយល់ស្របរវាងគ្នាក្នុង កិច្ចព្រមព្រៀងដំណាក់កាលទីមួយ កាលពីជំនាន់លោកប្រធានាធិបតី ដូណាល់ ត្រាំ នោះទេ។
គេនៅចាំបានថាលោក ដូណាល់ ត្រាំ ធ្លាប់សម្រេចបានកិច្ចព្រមព្រៀងដំណោះស្រាយសង្គ្រាមពាណិជ្ជកម្មជាមួយចិនចំនួនពីរ ដែលគេស្គាល់ថា ជាកិច្ចព្រមព្រៀងដំណាក់កាលទី១ និងដំណាក់កាលទី២។ មែនទែនទៅ មិនត្រឹមតែកិច្ចព្រមព្រៀងដំណាក់កាលទីមួយនោះទេ ដែលចិនមិនបានអនុលោមតាម សូម្បីតែកិច្ចព្រមព្រៀងដំណាក់កាលទី២ក៏ចិន មិនបានអនុវត្តឲ្យគ្រប់ជ្រុងជ្រយផងដែរ។
កិច្ចព្រមព្រៀងដំណាក់កាលទី១ ដែលតម្រូវឲ្យប៉េកាំងបញ្ជាទិញទំនិញប្រមាណ ២០០ពាន់លានដុល្លារបន្ថែមទៀតពីសហរដ្ឋអាមេរិក សម្រាប់ឆ្នាំ ២០២០ និង២០២១។ ក្នុងនោះ គិតត្រឹមខែវិច្ឆិកាឆ្នាំ ២០២១ ចិនសម្រេចតាមកិច្ចព្រមព្រៀង ដោយបញ្ជាទិញទំនិញអាមេរិក បានតែ៦០%នៃផែនការប៉ុណ្ណោះ។
អត្ថបទគួរអាន
បញ្ហានេះត្រូវបានភាគីអាមេរិកប្រតិកម្មយ៉ាងខ្លាំង ប៉ុន្តែមិនធ្លាប់មានការឆ្លើយតបឡើយពីក្រុងប៉េកាំងនោះទេ ទើបតែនៅថ្ងៃព្រហស្បតិ៍សប្តាហ៍នេះ អ្នកនាំពាក្យក្រសួងពាណិជ្ជកម្មចិន លោក កៅ ហ្វេង (Gao Feng) បានធ្វើការឆ្លើយតបថា សហរដ្ឋអាមេរិកគួរតែលុបចោលពន្ធគយលើទំនិញចិនឲ្យអស់ទៅ ដើម្បីបង្កើតបរិយាកាសអំណោយផលសម្រាប់កិច្ចសហប្រតិបត្តិការពាណិជ្ជកម្មទៅថ្ងៃអនាគត។
យ៉ាងណាមិញ ប្រធានាធិបតីអាមេរិកលោកចូ បៃឌិន ធ្លាប់បានអះអាងរួចហើយថា ក្រុងវ៉ាស៊ីនតោននឹងមិនដករនាំងពន្ធគយពីប្រទេសចិនលឿនពេកឡើយ ពិសេសនៅពេលចិន មិនបានធ្វើតាមអ្វីដែលខ្លួនសន្យាបែបនេះ។
ទោះបីជាបែបនេះក្តី គេមិនទាន់អាចដឹងបានថា តើបំណងចង់បន្ថែមពន្ធលើទំនិញចិននេះ នឹងត្រូវដាក់ចេញនៅពេលណា ឬដាក់នៅលើផលិតផលអ្វីនោះទេ ខណៈដែលអ្នកនាំពាក្យការិយាល័យតំណាងពាណិជ្ជកម្មអាមេរិក បានបដិសេធឆ្លើយតបនឹងអ្នកសារព័ត៌មានចំពោះរឿងនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
