ក្នុងកិច្ចប្រជុំកំពូលនៃសភាបក្សពលករកូរ៉េខាងជើង លោកគីម ជុងអ៊ុន ពុំបានបញ្ជាក់ច្បាស់លាស់ថា មន្ត្រីរូបណាបានធ្វើអ្វីខុសនោះទេ។ ប៉ុន្តែអ្នកសង្កេតបញ្ហាកូរ៉េខាងជើងមួយចំនួនបាននិយាយថា វាទំនងជាការប៉ុនប៉ង ដើម្បីពង្រឹងអំណាចគ្រប់គ្រងរបស់លោកគីម លើមន្ត្រីនិងប្រជាជនរបស់គាត់ ព្រមទាំងចង់ឲ្យពួកគេប្រមូលផ្តុំសាមគ្គីគ្នា នៅក្រោមការដឹកនាំរបស់គាត់ស្របពេលដែលប្រទេសកំពុងប្រឈមមុខនឹងការលំបាកដូចជាបញ្ហាសេដ្ឋកិច្ច និងមេរោគឆ្លងកូវីដ១៩។
ដោយឡែក អ្នកជំនាញមួយចំនួនទៀតបាននិយាយថា ការរឹតបន្តឹងលើសកម្មភាពសង្គម នៅកូរ៉េខាងជើង បន្ទាប់ពីការផ្ទុះឡើងនៃជំងឺកូវីដ១៩ អាចបង្កឱ្យមានភាពកាន់តែតានតឹងបន្ថែមទៀតលើផ្នែកសេដ្ឋកិច្ច និងសង្គមកិច្ចរបស់ប្រទេស។ ដូច្នេះហើយ ទើបបុរសខ្លាំងកូរ៉េជើងរូបនេះ ចង់ធ្វើការព្រមានជាទូទៅទាំងទៅលើប្រជាជន និងមន្ត្រីរបស់លោក ក្រែងមានករណីរើបម្រះកើតឡើង។
អត្ថបទគួរអាន
គួរបញ្ជាក់ថា កូរ៉េខាងជើងកាលពីដើមខែឧសភាបានទទួលស្គាល់ថា មានករណីឆ្លងកូវីដ១៩ដល់ពលរដ្ឋជាលើកដំបូង ហើយក្រោយមកបានរាយការណ៍ថាមនុស្សប្រហែល ៤,៥ លាននាក់បានធ្លាក់ខ្លួនឈឺជាបន្តបន្ទាប់។ ប៉ុន្តែ អ្នកជំនាញនៅបរទេសមានការសង្ស័យថា ការផ្ទុះឡើងនេះ មិនមែនទើបជាលើកទីមួយរបស់ប្រទេសកូរ៉េខាងជើងនោះទេ ហើយពួកគេជឿជាក់ថាស្ថិតិអ្នកឆ្លងក៏មិនពិតប្រាកដដែរ។ មិនពិតក៏ដោយសារតែ អ្វីដែលត្រូវបានបង្ហាញនៅក្នុងប្រព័ន្ធផ្សព្វផ្សាយរដ្ឋ ត្រូវបានរៀបចំដើម្បីការពារ កុំឱ្យមានផលប៉ះពាល់ផ្នែកផ្នែកនយោបាយចំពោះលោកគីម ស្របពេលដែលលោកចង់ ពង្រឹងការគ្រប់គ្រងផ្ទៃក្នុង និងការលើកកម្ពស់ការដឹកនាំរបស់ខ្លួនឯង។
ក្រៅតែពីការដោះស្រាយបញ្ហាក្នុងប្រទេស និងក្នុងជួរផ្ទៃក្នុងនៃបក្សពលករ របបផ្តាច់ការក្រុងព្យុងយ៉ាងមិនភ្លេចឡើយ ការបន្តអភិវឌ្ឍនិងសាកល្បងអាវុធទំនើបៗរបស់ខ្លួន រួមទាំងគម្រោងសាកល្បងអាវុធនុយក្លេអ៊ែរផងដែរ ព្រោះនេះជាវិធីតែមួយគត់ដែលព្យុងយ៉ាងអាចមានទឹកមាត់ប្រៃនិយាយជាមួយសហគមន៍អន្តរជាតិ។
ជាក់ស្តែង កូរ៉េខាងជើងកាលពីថ្ងៃអាទិត្យសប្តាហ៍មុននេះ បានបាញ់កាំភ្លើងធំជាច្រើនគ្រាប់បន្ថែមទៀត នៅចន្លោះម៉ោង៨ព្រឹកដល់ម៉ោង១១ព្រឹក (ម៉ោងក្នុងស្រុក) ដើម្បីបង្ហាញកម្លាំងអាវុធមួយផ្សេងទៀតរបស់ខ្លួន នៅបន្ទាប់ពីមួយថ្ងៃ ដែលមេដឹកនាំគីម ជុងអ៊ុន បានប្តេជ្ញាជំរុញអំណាចយោធារបស់ខ្លួន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
