ជាក់ស្ដែងក្នុងឆ្នាំ២០២០ ប្រទេសថៃមានកំណើននាំចេញជ្រូករស់កើនឡើងដល់ទៅជាង ៣៣០% ។ ហើយថៃនៅតែរក្សាកំណើននាំចេញជ្រូកទៅក្រៅប្រទេស ទោះបីមានការបារម្ភពីជំងឺប៉េសជ្រូកអាហ្វ្រិករាលដាលខ្លាំងក៏ដោយ។ នេះបើតាមការរាយការណ៍ដោយសារព័ត៌មានបាងកកប៉ុស្ដិ៍។
ប្រការដែលអនុញ្ញាតឲ្យថៃអាចនាំចេញជ្រូករស់កើនឡើងបានច្រើនដូចនេះក៏ដោយសារតែថៃជាប្រទេសមួយក្នុងចំណោមប្រទេសផ្សេងទៀតនៅអាស៊ីដែលមានការរាលដាលជំងឺប៉េសជ្រូកអាហ្វ្រិកតិចតូចជាងគេ។
នៅក្នុងនោះផងដែរ ប្រទេសកម្ពុជា ឡាវ និង វៀតណាម សុទ្ធតែជាប្រទេសដែលរងគ្រោះខ្លាំងដោយសារតែជំងឺប៉េសជ្រូកអាហ្វ្រិក ជាហេតុធ្វើឲ្យប្រទេសជិតខាងរបស់ថៃទាំង៣នេះបង្កើនការនាំចូលជ្រូកពីថៃកាន់តែច្រើន ជាក់ស្តែងកម្ពុជានាំចូលជ្រូករស់ពីប្រទេសថៃប្រមាណ ៦០% វៀតណាមនាំចូល ២៦% និង ឡាវ១០%។
ក្រៅតែការនាំចេញជ្រូករស់កើនឡើងក្នុងឆ្នាំ២០២០ ថៃក៏បានបង្កើនការនាំចេញសាច់ជ្រូកក្រៀម សាច់ជ្រូកកក និង សាច់ជ្រូកកែច្នៃរបស់ខ្លួនក្នុងរង្វង់ ៧០% លើសឆ្នាំ២០១៩ផងដែរ។
អត្ថបទទាក់ទង
យ៉ាងណាមិញ លោក រតនាគុល អគ្គនាយកការិយាល័យគោលនយោបាយ និងយុទ្ធសាស្ត្រពាណិជ្ជកម្មរបស់ក្រសួងពាណិជ្ជកម្មថៃ បានគូសបញ្ជាក់ថា ទោះបីការនាំចេញជ្រូកមានកំណើនខ្លាំងក៏ពិតមែន ប៉ុន្តែចំនួននេះមានត្រឹម ០,៣% នៃការនាំចេញផលិតផលទាំងអស់របស់ថៃប៉ុណ្ណោះ ហើយវាមិនអាចយកមកប៉ះប៉ូវលើការធ្លាក់ចុះការនាំចេញទំនិញផ្សេងៗរបស់ថៃអំឡុងវិបត្តិកូវីដ-១៩បាននោះទេ។
ប៉ុន្តែលោក រតនាគុល រំពឹងថាការនាំចេញជ្រូក សាច់ជ្រូក និងផលិតផលម្ហូបអាហារផ្សេងទៀតនឹងបន្តកើនឡើងនៅឆ្នាំ២០២១ នេះដោយសាររដ្ឋាភិបាលកំពុងជំរុញឱ្យប្រទេសថៃក្លាយជាប្រទេស ផលិតអាហារដែលមានគុណភាពល្អបំផុតនៅលើពិភពលោក ព្រមទាំងពង្រីកចំណែកទីផ្សារម្ហូបអាហារពិភពលោកផងដែរ។
សូមបញ្ជាក់ថា ក្រោយជំងឺប៉េសជ្រូកអាហ្វ្រិកផ្តើមរាលដាលនៅអាស៊ីក្នុងឆ្នាំ ២០១៨ មានសត្វជ្រូកប្រមាណជាង ៧លានក្បាលបានងាប់ និងត្រូវគេយកទៅសម្លាប់។ ទ្វីបអាស៊ីជាកន្លែងដែល មានសត្វជ្រូកងាប់ច្រើនជាងគេ ពោលមានបរិមាណដល់ទៅជាង ៨០%នៃសត្វជ្រូកក្នុងពិភពលោករាប់ចាប់ពីឆ្នាំ២០១៦ ដល់ ឆ្នាំ២០២០៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
