បន្ទាប់ពីកម្មវិធីអបអរឆ្លងឆ្នាំថ្មីកន្លងផុត ករណីឆ្លងកូវីដ១៩ ក៏ដូចជាមេរោគបំប្លែងថ្មី ត្រូវបានកត់ត្រាពីការកើនឡើងឆ្លងគួរឱ្យព្រួយបារម្ភនៅពាសពេញពិភពលោក រួមទាំងប្រទេសថៃផងដែរ។ បើទោះបីជា មានការកើនឡើងនៃករណីអូមីក្រុងក៏ដោយ តែស្ថានភាពនៅតែស្ថិតក្រោមការគ្រប់គ្រង ដោយមិនទាន់មានករណីធ្ងន់ធ្ងរណាមួយដែលបង្កឡើងដោយមេរោគថ្មីនេះនៅឡើយទេ។
នាយករដ្ឋមន្ត្រី លោក ប្រាយុទ្ធ ចាន់អូចា បានណែនាំភ្នាក់ងាររដ្ឋទាំងអស់ ឱ្យតាមដានស្ថានភាពមេរោគអូមីក្រុងនេះយ៉ាងដិតដល់ ដើម្បីទប់ស្កាត់ការឆ្លងមេរោគជាចង្កោម ឬបណ្ដុំធំៗបន្ថែមទៀត។ ជាក់ស្ដែង ក្រសួងសុខាភិបាលសាធារណៈ និងក្រសួងដឹកជញ្ជូនថៃ បានរៀបចំទទួលការធ្វើតេស្ដអង់ទីហ្សែនដោយមិនគិតថ្លៃ នៅតាមចំណតឡានក្រុង និងស្ថានីយរថភ្លើងសម្រាប់អ្នកដែលត្រឡប់ចូលមកទីក្រុងបាងកកពីតាមបណ្ដាខេត្ត ក្រោយឈប់សម្រាកនៅថ្ងៃឆ្លងឆ្នាំ។អត្ថបទគួរអាន
បើតាមអគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្រថៃបាននិយាយថា ប្រទេសថៃបានកត់ត្រាករណីអូមីក្រុង សរុបជាង ១ពាន់៥យករណីលើខេត្តចំនួន ៤៧ នៅចន្លោះថ្ងៃទី ១ ខែវិច្ឆិកា ២០២១ ថដល់ថ្ងៃទី ១ ខែមករា ២០២២។ ក្នុងនោះ ៧៧៩ នាក់ជាអ្នកដំណើរមកពីបរទេស និង ៧៧២ នាក់ជាអ្នកឆ្លងក្នុងស្រុក។
លោក កៃទីបផុម លេខាធិការអចិន្ត្រៃយ៍សម្រាប់សុខភាពសាធារណៈថៃបាននិយាយថា ក្រសួងសុខាភិបាលសាធារណៈថៃ នឹងវាយតម្លៃស្ថានភាពម្តងទៀតនៅថ្ងៃនេះ មុនពេលបង្ហាញវិធានការបន្ថែមទៀត ដើម្បីជួយទប់ស្កាត់ការរីករាលដាល និងគ្រប់គ្រងស្ថានការណ៍កូវីដ១៩។ ទន្ទឹមនេះ រដ្ឋាភិបាលថៃនៅតែលើកទឹកចិត្តឱ្យប្រជាជនត្រូវតែបន្តអនុវត្តតាមការប្រុងប្រយ័ត្ន ការការពារជាសកល ដូចជាការពាក់ម៉ាស់ និងរក្សាគម្លាតសុវត្ថិភាព ដើម្បីការពារខ្លួនពីការរីករាលដាលនៃជំងឺកូវីដ១៩។
យ៉ាងណាមិញ គិតរហូតមកដល់ពេលនេះ ថៃបានចាក់វ៉ាក់សាំងគ្រប់ចំនួន ២ ដូសជូនដល់ពលរដ្ឋបានប្រមាណជាង ៦៥ភាគរយហើយ នៃចំនួនប្រជាជនសរុប ខណៈអ្នកចាក់ដូសជំរុញមានជិត ៩ភាគរយនៃប្រជាជនសរុប។ នេះបើយោងតាមរបាយការណ៍របស់សារព័ត៌មាន Bloomberg ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
