រដ្ឋមន្ត្រីក្រសួងសាធារណការ និងដឹកជញ្ជូនឯកឧត្តម ស៊ុន ចាន់ថុល បានមានប្រសាសន៍ថានាពេលថ្មីៗនេះថា កម្ពុជាបានចុះអនុសារណយោគយល់គ្នាជាមួយភាគីវៀតណាមរួចហើយ ក្នុងការតភ្ជាប់ផ្លូវល្បឿនលឿនភ្នំពេញ-បាវិតជាមួយផ្លូវល្បឿនលឿនរបស់វៀតណាម ហូជីមិញ-ម៉ុកបៃ។ បច្ចុប្បន្ន គម្រោងសាងសង់ផ្លូវល្បឿនលឿនភ្នំពេញ-បាវិតកំពុងស្ថិតក្នុងដំណាក់កាលសិក្សា ខណៈផ្លូវល្បឿនលឿនហូជីមិញ-ម៉ុកបៃខាងវៀតណាមវិញ គ្រោងចាប់ផ្តើមសាងសង់នៅឆ្នាំ២០២៣ និងបញ្ចប់នៅឆ្នាំ២០២៥។
ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ក្រុមហ៊ុនឯកជនដែលទទួលបានសិទ្ធិក្នុងការសិក្សាលើគម្រោងខាងលើ នឹងដាក់ឯកសារពាក់ព័ន្ធការសិក្សាលើគម្រោងនេះជូនក្រសួងសាធារណការ និងដឹកជញ្ជូន ក៏ដូចជាក្រសួងសេដ្ឋកិច្ច និងហិរញ្ញវត្ថុក្នុងពេលឆាប់ៗខាងមុខនេះ។ ឯកឧត្តមរំពឹងថា ការសិក្សាលើគម្រោងសាងសង់ផ្លូវល្បឿនភ្នំពេញ-បាវិត នឹងបញ្ចប់ការសិក្សានៅត្រឹមចុងឆ្នាំ២០២១ នេះ។
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា ផ្លូវល្បឿនលឿនពីភ្នំពេញទៅបាវិតនេះ នឹងដើរតួនាទីសំខាន់ ក្នុងការដឹកជញ្ជូនទំនិញរវាងប្រទេសកម្ពុជាជាមួយនឹងប្រទេសជិតខាង ដែលកន្លងមកកម្ពុជាមានជួបការលំបាកច្រើនទាក់ទងនឹងការដឹកជញ្ជូនទំនិញនេះ។ ដូច្នេះ វាក៏នឹងក្លាយជាផ្នែកមួយជួយជំរុញការនាំចេញទំនិញរបស់កម្ពុជាផងដែរ។
អត្ថបទទាក់ទង
ស្របពេលកំពុងសិក្សាគម្រោងផ្លូវល្បឿនលឿនភ្នំពេញ-បាវិត កម្ពុជាក៏កំពុងមាញឹកជាមួយការសាងសង់ផ្លូវល្បឿនលឿនភ្នំពេញ-ព្រះសីហនុផងដែរ ដែលមកទល់បច្ចុប្បន្នផ្លូវមានចម្ងាយជិត២០០គីឡូម៉ែត្រមួយនេះសម្រេចការសាងសង់បានប្រមាណជាង ៦០% ហើយ។ បើតាមការបញ្ជាក់របស់ឯកឧត្តម ស៊ុន ចាន់ថុល ផ្លូវល្បឿននេះគ្រោងបញ្ចប់ការសាងសង់នៅអំឡុងខែកញ្ញា ឆ្នាំ២០២១ នេះ មុនផែនការដែលបានកំណត់កន្លងមក ដោយគ្រោងបញ្ចប់នៅអំឡុងខែមីនា ឆ្នាំ២០២៣។
ពាក់ព័ន្ធការបញ្ចប់ការសាងសង់មុនពេលកំណត់នេះដែរ ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការនៃក្រសួងសាធារណការ និងដឹកជញ្ជូនបានបញ្ជាក់កាលពីកន្លងមកថា បន្ទាប់ពីក្រុមហ៊ុនសាងសង់ បានបង្កើនដំណើរការសាងសង់ ក្រោយមានការស្នើ និងជំរុញពីក្រសួងសាធារណការ និងដឹកជញ្ជូន។ ម្យ៉ាងទៀត ដំណើរការសាងសង់មិនមានការរំខានពីជំងឺកូវីដ-១៩ ពោលគឺការដ្ឋាននេះនៅតែដំណើរការធម្មតា ទោះបីកម្ពុជារងនូវការរាតត្បាតនៃជំងឺកូវីដ-១៩ ក៏ដោយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
