សម្ពាធពីសំណាក់ទីក្រុងប៉េកាំងទៅលើទីក្រុងតៃប៉ិនេះ កើតឡើងខ្លាំង បន្ទាប់ពីលោកស្រីបានទៅបំពេញទស្សនកិច្ចទៅកាន់កោះប្រជាធិបតេយ្យនេះទេ ខណៈដែលភាគីចិនវិញ នាពេលនេះ ក៏បានប្រកាសពីគោលជំហរថ្មីរបស់ខ្លួនចំពោះ កោះតៃវ៉ាន់ផងដែរ ដោយគេរំពឹងថា នឹងបន្ថែមសម្ពាធខ្លាំងជាងមុនចំពោះកោះប្រជាធិបតេយ្យមួយនេះ។ នេះបើតាមការចុះផ្សាយដោយសារព័ត៌មានរ៉យទ័រ។
លោកស្រី Pelosi បានប្រាប់សន្និសីទសារព័ត៌មានជាមួយសមាជិកសភាប្រជាធិបតេយ្យបួននាក់ផ្សេងទៀតថា ពេលនេះ ប្រទេសចិនកំពុងព្យាយាមបង្កើតសម្ពាធថ្មីទៅលើកោះតៃវ៉ាន់ហើយ។
ប្រទេសចិនបាននិយាយកាលពីថ្ងៃពុធ ទី១០ សីហាថា ខ្លួនបាន «បំពេញកាតព្វកិច្ចដោយជោគជ័យ» ជុំវិញកោះតៃវ៉ាន់ ប៉ុន្តែនឹងបន្តការឃ្លាំមើលជាប្រចាំ ដែលជាសញ្ញាបង្ហាញពីការបញ្ចប់នៃការធ្វើសមយុទ្ធសង្គ្រាមជាច្រើនថ្ងៃមកនេះ ខណៈពេលដែលទីក្រុងប៉េកាំងនៅតែបន្តដាក់សម្ពាធលើកោះតៃវ៉ាន់ ដែលខ្លួនចាត់ទុកជាខេត្តរបស់ខ្លួននេះ។
នៅក្នុងនោះដែរ តំណាងរាស្រ្តអាមេរិកលោករ៉ាចា គ្រីស្នានមូធី (Raja Krishnamoorthi) បាននិយាយថា គណៈប្រតិភូបាននិងកំពុងពិភាក្សាអំពីបញ្ហានៃការលក់អាវុធ ដែលមិនទាន់បានសម្រេចទៅឱ្យកោះតៃវ៉ាន់ផងដែរ ក្រោយពីមើលការគំរាមគំហែងរបស់ចិន។
ហើយលោក Raja Krishnamoorthi ជាមួយលោកហ្កេហ្កូរី មីកស៍ (Gregory Meeks) ដែលប្រធានគណៈកម្មាធិការកិច្ចការបរទេសនៃសភាអាមេរិក ក៏បាននិយាយរួមគ្នាដែរថា សមាជិកសភាអាមេរិកកំពុងចាត់វិធានការ ដើម្បីពន្លឿនកិច្ចព្រមព្រៀងលក់អាវុធឲ្យតៃវ៉ាន់ឱ្យបានលឿន។
អត្ថបទគួរអាន
ជាមួយគ្នានេះដែរ ឯកសារផ្លូវការមួយបានបង្ហាញកាលពីថ្ងៃពុធ ទី១០ សីហាថា ប្រទេសចិនបានដកការសន្យារបស់ខ្លួន ដែលថា នឹងមិនបញ្ជូនកងទ័ព ឬការគ្រប់គ្រងណាមួយទៅកាន់កោះតៃវ៉ាន់ ប្រសិនបើខ្លួនកាន់កាប់កោះនេះនោះឡើយ។
គួររំលឹកថា ប្រទេសចិនបាននិយាយនៅក្នុងសៀវភៅសចំនួនពីរស្តីពីកោះតៃវ៉ាន់ក្នុងឆ្នាំ ១៩៩៣ និង ២០០០ ថាខ្លួននឹងមិនបញ្ជូនកងទ័ព ឬមន្ត្រីរដ្ឋបាលទៅតាំងមូលដ្ឋាននៅកោះតៃវ៉ាន់ទេ បន្ទាប់ពីសម្រេចបាននូវអ្វីដែលទីក្រុងប៉េកាំងហៅថា «ការបង្រួបបង្រួម»កោះតៃវ៉ាន់នោះឡើយ។
ក្នុងន័យនេះចង់ធានាថា តៃវ៉ាន់នឹងមានស្វ័យភាពពេញលេញបន្ទាប់ពីក្លាយជាតំបន់រដ្ឋបាលពិសេសរបស់ចិន តែក្រោយការកែប្រែចុងក្រោយនេះ បានសរបង្ហាញថា វាសនារបស់កោះតៃវ៉ាន់នឹងមានភាពមិនច្បាស់លាស់ឡើយ បើសិនថ្ងៃមួយចិនដីគោកបង្រួបបង្រួមកោះតៃវ៉ាន់មែននោះ។
មែនទែនទៅ បក្សកុម្មុយនិស្តចិន ដែលកំពុងកាន់អំណាច បានស្នើឱ្យតៃវ៉ាន់អាចទទួលយកការគ្រប់គ្រងរបស់ខ្លួនក្រោមគំរូ «ប្រទេសមួយ ប្រព័ន្ធពីរ» ដែលស្រដៀងទៅនឹងប្រព័ន្ធនៃទីក្រុងហុងកុងដែលគ្រប់គ្រងដោយទីក្រុងប៉េកាំងនាពេលសព្វថ្ងៃនេះ។
ហើយវានឹងផ្តល់ស្វ័យភាពខ្លះ ដើម្បីកោះតៃវ៉ាន់គ្រប់គ្រងតាមបែបប្រជាធិបតេយ្យ ក្នុងការរក្សាផ្នែកខ្លះនៃប្រព័ន្ធគ្រប់គ្រងសង្គម និងនយោបាយរបស់ខ្លួន។
ទោះបីជាយ៉ាងណាក៏ដោយ យោងតាមការស្ទង់មតិនៅតៃវ៉ាន់ គណបក្សនយោបាយតៃវ៉ាន់សំខាន់ៗទាំងអស់បានច្រានចោលសំណើ «ប្រទេសមួយ ប្រព័ន្ធពីរ» ហើយវាស្ទើរតែគ្មានការគាំទ្រពីសាធារណជនតៃវ៉ាន់ឡើយ។ ប៉ុន្ដែ តៃវ៉ាន់និយាយថា មានតែប្រជាជនកោះនេះទេ ដែលអាចសម្រេចអនាគតរបស់ពួកគេបាន៕
