ការិយាល័យស្ថិតិទូទៅវៀតណាម បានបង្ហាញឲ្យដឹងថា កំណើនសេដ្ឋកិច្ចរបស់វៀតណាម ក្នុងត្រីមាសដំបូងនេះ គឺសម្រេចបាន ៣,៨% ដែលជាកម្រិតមួយទាបជាងការព្យាកររបស់ក្រសួងផែនការ និងវិនិយោគរបស់វៀតណាម ទៅទៀត។
វិស័យឧស្សាហកម្មនិងសំណង់ មានកំណើន ៧,១២% ក្នុងត្រីមាសទី១នេះ ដែលជាកំណើនខ្ពស់ជាងគេបង្អស់ ខណៈវិស័យសេវាកម្ម មានកំណើន ៣,២៧%។
រីឯវិស័យបដិសណ្ឋារកិច្ចនិងម្ហូបអាហារ រងគ្រោះខ្លាំងដែលធ្លាក់ចុះប្រមាណ ១១% ដោយសារតែសណ្ឋាគារជាច្រើន បាត់បង់ភ្ញៀវទេសចរ ហើយភោជនីយដ្ឋាន ត្រូវបានបញ្ជាឲ្យផ្អាកជាបណ្តោះអាសន្ន ដើម្បីចូលរួមទប់ស្កាត់ការរីករាលដាលនៃមេរោគកូវីដ១៩។
អត្ថបទទាក់ទង
លើសពីនេះទៅទៀត ចំនួនភ្ញៀវទេសចរណ៍ចូលមកកម្សាន្តនៅប្រទេសវៀតណាម ធ្លាក់ចុះ ១៨% មកនៅត្រឹម ៣លាន ៧សែននាក់ ដែលភាគច្រើនគឺបាត់បង់ភ្ញៀវចិន កូរ៉េខាងត្បូង និងអាមេរិក ហើយក្រុមហ៊ុនអាកាសចរណ៍ក្នុងស្រុក ក៏បញ្ឈប់ជើងហោះហើរអន្តរជាតិ ទទួលអ្នកដំណើរបានត្រឹមតែជិត ១២លាននាក់ ក្នុងរយៈពេល ៣ខែនេះ ធ្លាក់ចុះប្រមាណ ៨%។
យ៉ាងណាក៏ដោយចុះ ទំហំពាណិជ្ជកម្មរបស់វៀតណាម ឈានដល់ ១១៥ពាន់លានដុល្លារអាមេរិក ក្នុងនោះ វៀតណាមនាំចេញទំនិញប្រមាណ ៥៩ពាន់លានដុល្លារអាមេរិក និងចំណាយលើការនាំចូលទំនិញមកវិញ ប្រមាណ ៥៦ពាន់ ២រយលានដុល្លារអាមេរិក ដែលធ្វើឲ្យវៀតណាមសម្រេចបាននូវអតិរេកពាណិជ្ជកម្មប្រមាណ ២ពាន់ ៨រយលានដុល្លារអាមេរិក។
ក្នុងអំឡុងពេលមានវិបត្តិនេះ ការនាំចេញរបស់វៀតណាម សម្រេចបានកំណើន ០,៥% បើទោះបីជាការនាំចេញវាយនភណ្ឌ និងសម្លៀកបំពាក់ធ្លាក់ចុះប្រមាណ ៩% ហើយការនាំចេញគ្រឿងសមុទ្រ ធ្លាក់ចុះ ១១% ដោយវិស័យទាំងពីរ នេះ មានការលុបចោលនូវការបញ្ជាទិញជាច្រើនពី សហភាពអឺរ៉ុប អាមេរិក និងចិន ទោះយ៉ាងណាអាមេរិកនៅតែជាអ្នកទិញទំនិញវៀតណាមច្រើនជាងគេបំផុត ប្រមាណ ១៥ពាន់លានដុល្លារអាមេរិក។
ដោយឡែក ការនាំទំនិញចូលមកពីបរទេសរបស់វៀតណាមក៏មានការធ្លាក់ចុះ គួរឲ្យកត់សម្គាល់ ប្រមាណ ១,៩% ក្នុងរយៈពេល ៣ខែនេះ ជាពិសេសគឺទំនិញមកពីប្រទេសចិន ធ្លាក់ចុះរហូតដល់ទៅ ១៨% មកនៅត្រឹម ១៣ពាន់លានដុល្លារអាមេរិក។
គួរជម្រាបដែរថា លោក ង្វៀន សួនហ្វ៊ក នាយករដ្ឋមន្រ្តីវៀតណាម ធ្លាប់បានអះអាងថា រដ្ឋាភិបាលវៀតណាមនឹងធ្វើការឲ្យកាន់តែខ្លាំងក្លាជាងនេះទៀត ដើម្បីទប់ស្កាត់ការរីករាលដាលនៃមេរោគនេះ ជាពិសេសគឺដើម្បីសម្រេចបាននូវកំណើនសេដ្ឋកិច្ចជាតិ តាមគោលដៅដែលបានកំណត់ ៦,៨% ក្នុងឆ្នាំ២០២០នេះ ទៅតាមការកំណត់របស់រដ្ឋសភា។
តែយ៉ាងណា រដ្ឋាភិបាលវៀតណាម តាមរយៈក្រសួងផែនការនិងវិនិយោគវៀតណាម បានធ្វើការព្យាករជាថ្មីថា វីរុសកូវីដ១៩ នឹងទាញទម្លាក់កំណើនសេដ្ឋកិច្ចជាតិ ឲ្យមកនៅត្រឹម ៥,៩៦% ក្នុងឆ្នាំ២០២០នេះ ខណៈឆ្នាំ២០១៩ កន្លងទៅ វៀតណាមសម្រេចបានកំណើន ៧,០២%៕
