ប្រភពព័ត៌មានក្នុងស្រុកវៀតណាម បានឲ្យដឹងថា ចាប់ពីថ្ងៃទី១ ខែមករាឆ្នាំក្រោយនេះតទៅ រដ្ឋាភិបាលវៀតណាម នឹងបែងចែកជា៤ តំបន់ដើម្បីធ្វើការដំឡើងប្រាក់ឈ្នួលអប្បបរមាប្រចាំខែ ដោយតំបន់ទី១ ក្រោយពីដំឡើងរួច ប្រាក់ឈ្នួលអប្បបរមានឹងកើនឡើងដល់ ជាង ១៧៩ ដុល្លារអាមេរិក។ តំបន់ទី២ កើនដល់ ១៥៩ ដុល្លារអាមេរិក តំបន់ទី៣ កើនដល់ជាង ១៣៩ ដុល្លារអាមេរិក និងតំបន់ទី៤ កើនដល់ជាង ១២៥ ដុល្លារអាមេរិក។
តំបន់ទាំង៤នេះ គឺត្រូវបានដំឡើងប្រាក់ឈ្នួលទៅតាមការចំណាយសម្រាប់ការរស់ជាក់ស្ដែងរបស់កម្មករនិយោជិត ក្នុងតំបន់នីមួយៗ។ តួយ៉ាង តំបន់ទី១ ដែលមានប្រាក់ឈ្នួលអប្បរបរមាខ្ពស់ជាងគេ រហូតដល់ជាង១៧៩ ដុល្លារអាមេរិកនោះ គឺរួមបញ្ជលទីក្រុងហាណូយ និងហូជីមិញ ដែលជាទីក្រុងមានការចំណាយសម្រាប់ការរស់នៅខ្ពស់ ខណៈដែលតំបន់ ៣ផ្សេងទៀត គឺនៅតាមទីក្រុង ឬទីជនបទដែលមិនសូវមានការចំណាយខ្ពស់សម្រាប់ការរស់នៅនោះឡើយ។
អត្ថបទទាក់ទង!
ទោះយ៉ាងណា ក្រុមអ្នកធុរកិច្ចវៀតណាមមួយចំនួន បានលើកឡើងថា ការដំឡើងប្រាក់ឈ្នួលអប្បបរមានេះ នឹងអាចប៉ះពាល់ដល់ចំណូលរបស់អាជីវកម្មជាច្រើន ពិសេស គឺអាជីវកម្មខ្នាតតូច និងមធ្យមតែម្ដង។
តាមការស្រាវជ្រាវមួយរបស់វែបសាយ Jobstreet.com កាលពីឆ្នាំមុន បានឲ្យដឹងថា ប្រាក់បៀវត្សរ៍ក្នុងប្រទេសវៀតណាម គឺកំពុងមានការកើនឡើងយ៉ាងឆាប់រហ័ស បើធៀបនឹងប្រទេសមួយចំនួនក្នុងតំបន់អាស៊ីអាគ្នេយ៍។ អត្រាកំណើនការចំណាយលើប្រាក់បៀវត្សរ៍ប្រចាំឆ្នាំរបស់វៀតណាម គិតជាមធ្យម មានប្រមាណ ២០ ទៅ២៤% ធៀបនឹងប្រទេសថៃ ភីលីពីន ឥណ្ឌូនេស៊ី មីយ៉ាន់ម៉ា និងសាំងហ្គាពួរ មានអត្រាកំណើនតែប្រមាណ ១៤ ទៅ២០%ប៉ុណ្ណោះ។
តើអ្នកបានអានអត្ថបទនេះ ហើយឬនៅ?
ដោយឡែក នៅកម្ពុជាវិញ អគ្គលេខាធិការសមាគមរោងចក្រកាត់ដេរកម្ពុជា (GMAC) លោក ខេន លូ ធ្លាប់បានលើកឡើងថា គិតត្រឹម ៥ឆ្នាំចុងក្រោយនេះ ប្រាក់ខែកម្មករនយោជិត ត្រូវបានកើនឡើងរហូតដល់ ១៧០% ដែលស្មើនឹងកំណើនក្នុងមួយឆ្នាំជាមធ្យមជាង ៣០%។ លោក ខេន លូ បានគូសបញ្ជាក់ថា ការឡើងប្រាក់ខែលឿនយ៉ាងដូច្នេះក៏ជាក្ដីបារម្ភមួយសម្រាប់ថៅកែរោងចក្រផងដែរ ហើយលោកថា ប្រសិនអត្រាកំណើនប្រាក់បៀវត្សរ៍កម្មករមានត្រឹមជាង ១០% ក្នុងមួយឆ្នាំ នោះគឺជារឿងដ៏ល្អបំផុត។
ដ្បិតតែ ប្រាក់ឈ្នួលអប្បបរមា ក្នុងប្រទេសវៀតណាម ត្រូវបានដំឡើងជាបន្តបន្ទាប់ក្ដី ប៉ុន្ដែ បើតាមចំនួនប្រាក់ឈ្នួលអប្បបរមា គឺនៅតែមានទាបនៅឡើយ បើធៀបនឹងតម្លៃ អតិផរណា។
បើតាម សម្ព័ន្ធសហជីពការងារវៀតណាម (VGCL) ដែលតំណាងឲ្យពលករ បានទាមទារដំឡើងប្រាក់ឈ្នួលអប្បបរមាយ៉ាងហោចណាស់ ៨% ឬស្មើនឹងចន្លោះពីជាង ៩ដុល្លារ ទៅជាង ១៤ ដុល្លារអាមេរិក ក្នុងមួយខែ អាស្រ័យទៅតាមតំបន់ដែលរដ្ឋាភិបាលបានកំណត់។
សម្ព័ន្ធសហជីពការងារវៀតណាម បានលើកឡើងទៀតថា ទោះបីជាមានការដំឡើងប្រាក់ឈ្នួលអប្បបរមានៅដើមឆ្នាំ ២០១៩នេះក៏ដោយ ប៉ុន្ដែ វាអាចនឹងបំពេញតម្រូវការសម្រាប់ការចំណាយលើការរស់នៅរបស់កម្មករនយោជិតប្រមាណ ៩៥% ប៉ុណ្ណោះ។
អត្ថបទគួរឲ្យចាប់អារម្មណ៍!
សូមជម្រាបថា កាលពីពាក់កណ្ដាលឆ្នាំ ២០១៨ កន្លងទៅនេះ សម្ព័ន្ធសហជីពការងារវៀតណាម ធ្លាប់បានចេញផ្សាយរបាយការណ៍ស្ទាបស្ទង់មតិមួយ អំពីកត្តាប្រាក់ឈ្នួលអប្បបរមា និងការចំណាយសម្រាប់ការរស់នៅ ដែលបានសម្ភាសកម្មករនយោជិតជាង ៣ពាន់នាក់ ក្នុងអាជីវកម្ម ១៥០ ផ្សេងៗគ្នា បានឲ្យដឹងថា ជាង ២៦% នៃពួកគេបាននិយាយថា ពួកគេមិនសូវទទួលអត្ថប្រយោជន៍ច្រើនពីប្រាក់ឈ្នួលអប្បបរមានេះទេ ខណៈដែល ជាង១២% ផ្សេងទៀត និយាយថា ចំណូលរបស់ពួកគេមិនគ្រប់គ្រាន់សម្រាប់ការផ្គត់ផ្គង់គ្រួសារពួកគេឡើយ ដូច្នេះពួកគេត្រូវធ្វើការថែមម៉ោង ឬរកការងារផ្សេងទៀតធ្វើបន្ថែម ដើម្បីរកចំណូល។
ការស្រាវជ្រាវបានរកឃើញទៀតថា ពលករត្រូវធ្វើការថែមម៉ោងលើសពី ២៨ ម៉ោងក្នុងមួយខែ ជាមធ្យម ដើម្បីអាចបំពេញតាមតម្រូវការសម្រាប់ការរស់នៅ និងផ្គត់ផ្គង់គ្រួសាររបស់ពួកគេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
