WHO បានស្នើឱ្យប្រទេសនានាអនុវត្ត វិធីសាស្ត្រដែលមានព័ត៌មានជាភស្តុតាង និងផ្អែកលើហានិភ័យ ជាមួយនឹងវិធានការធ្វើដំណើរណាមួយ រួមទាំងការធ្វើចត្តាឡីស័កលើអ្នកដំណើរអន្តរជាតិ ខណៈការហាមប្រាមការធ្វើដំណើរលើអ្នកដំណើរ ពិសេសពីប្រទេសតំបន់អាហ្វ្រិក នឹងមិនបញ្ឈប់ការរីករាលដាលនៃមេរោគបំប្លែងថ្មីនេះទេ។ WHO មានការព្រួយបារម្ភថា រដ្ឋជាសមាជិកមួយចំនួន កំពុងដាក់ចេញនូវវិធានការមិនច្បាស់លាស់ ដែលមិនផ្អែកលើភស្តុតាង ហើយនឹងធ្វើឱ្យមានវិសមភាពកាន់តែអាក្រក់ទៅៗ។ ខណៈដែល សាកលវិទ្យាល័យ Oxford ក៏បាននិយាយដែរថា មិនមានភ័ស្តុតាងណាមួយដែលបង្ហាញថា វ៉ាក់សាំងបច្ចុប្បន្ននឹងមិនអាចការពារពីមេរោគបំប្លែងថ្មីនេះបាននៅឡើយទេ។
អង្គការសុខភាពពិភពលោកបាន ចេញសេចក្តីថ្លែងការណ៍មួយ ដោយណែនាំឱ្យមានការពន្យារពេលការធ្វើដំណើរសម្រាប់អ្នកដែលមិនស្រួលខ្លួន ឬមានហានិភ័យខ្ពស់ក្នុងការវិវត្តទៅជាជំងឺធ្ងន់ធ្ងរ រួមទាំងអ្នកដែលមានអាយុចាប់ពី ៦០ ឆ្នាំឡើងទៅដែលមិនបានចាក់វ៉ាក់សាំង។
សូមជម្រាបថា ប្រទេសជាច្រើននៅជុំពិភពលោក ក៏ដូចជា ប្រទេសកាណាដា នឹងបន្តហាមឃាត់លើអ្នកដំណើរមកពីអាហ្វ្រិកខាងត្បូង និងប្រទេសផ្សេងទៀត សរុបចំនួន ១០ ប្រទេស ហើយប្រទេសកាណាដានឹងតម្រូវឱ្យមនុស្សដែលធ្វើដំណើរមកតាមផ្លូវអាកាសពីគ្រប់ប្រទេស ត្រូវតែធ្វើតេស្តរកកូវីដ១៩ លើកលែងតែសហរដ្ឋអាមេរិកមួយប៉ុណ្ណោះ។ ដោយឡែក សហរដ្ឋអាមេរិក ក៏បានហាមឃាត់ ពលរដ្ឋខ្លួនមិនឱ្យធ្វើដំណើរទៅប្រទេសមួយចំនួនផងដែរ និងបានប្រកាសពីការរឹតបន្តឹងការធ្វើដំណើរ ជាការឆ្លើយតបទៅនឹងមេរោគបំប្លែងថ្មីផងដែរ។
បើទោះបីជា អង្គការសុខភាពពិភពលោកព្រមានកុំឲ្យមានការរឹតត្បិតការធ្វើដំណើរឡើងវិញក្ដី ប៉ុន្ដែ ប្រទេសកាន់តែច្រើនឡើង បានបន្ដរឹតត្បិតការធ្វើដំណើរ ដើម្បីទប់ស្កាត់ការឆ្លងមេរោគបំប្លែងថ្មី អូមីក្រុង។ តួយ៉ាង គិតមកទល់ថ្ងៃពុធសប្ដាហ៍នេះ យ៉ាងហោចណាស់មានប្រមាណ ៧០ប្រទេស និងដែនដីហើយ ដែលបានដាក់វិធានការរឹតត្បិតលើការធ្វើដំណើរពីប្រទេសមួយចំនួននៅតំបន់អាហ្វ្រិក។ នេះបើតាមការចុះផ្សាយដោយសារព័ត៌មាន CNN៕
