លោក David Malpass បាននិយាយនៅក្នុងសេចក្ដីថ្លែងការណ៍មួយ ដែលបានដាក់ជូនទៅកាន់ក្រុមប្រឹក្សាភិបាលធនាគារពិភពលោក អំពីការសម្រេចចិត្តរបស់លោកយ៉ាងដូច្នេះថា «បន្ទាប់ពីបានគិតយ៉ាងល្អិតល្អន់រួចមក ខ្ញុំបានសម្រេចចិត្តស្វែងរកការប្រឈមថ្មីៗ»។ លោកបន្ថែមថា «នេះគឺជាឱកាសមួយ សម្រាប់ការផ្លាស់ប្ដូរភាពជាអ្នកដឹកនាំដោយរលូត នៅពេលដែលក្រុមធនាគារធ្វើការដើម្បីឆ្លើយតបនឹងការកើនឡើងនៃបញ្ហាប្រឈមជាសកលនោះ»។
ក្នុងការកាន់តំណែងរបស់លោក Malpass នៅធនាគារពិភពលោកដែលមានរយៈពេល ៤ ឆ្នាំមកនេះ គេបានឃើញថា ស្ថាប័នអ្នកផ្ដល់កម្ចីសម្រាប់ការអភិវឌ្ឍដ៏ធំមួយនេះ បាននិងកំពុងជួបប្រឈមមុខនឹងវិបត្តិសកលជាច្រើន ដូចជាជំងឺរាតត្បាតកូវីដ១៩ និងការឈ្លានពានរបស់រុស្ស៊ីលើអ៊ុយក្រែន ក៏ដូចជាការធ្លាក់ចុះសេដ្ឋកិច្ចអន្តរជាតិផងដែរ។
ធនាគារពិភពលោក បាននិយាយនៅក្នុងសេចក្តីថ្លែងការណ៍មួយថា ខ្លួនបាន "ឆ្លើយតបយ៉ាងឆាប់រហ័ស" នៅពេលប្រឈមមុខនឹងបញ្ហាប្រឈមទាំងនេះ ជាពិសេសការប្រមូលថវិកាក្នុងចំនួនដ៏ច្រើនលើសលុប ៤៤០ ពាន់លានដុល្លារក្នុងការឆ្លើយតបទៅនឹងជំងឺរាតត្បាតនេះ។
អត្ថបទគួរអាន
នៅក្រោមការដឹកនាំរបស់លោក Malpass ក្រុមធនាគារពិភពលោក បានផ្ដល់នូវហិរញ្ញប្បទានទ្វេដងសម្រាប់គម្រោងដោះស្រាយបញ្ហាអាកាសធាតុសម្រាប់ប្រទេសកំពុងអភិវឌ្ឍន៍ ដែលក្នុងតម្លៃទឹកប្រាក់សរុប ៣២ពាន់លានដុល្លារកាលពីឆ្នាំមុន។
នៅក្នុងលិខិតមួយផ្ញើទៅកាន់បុគ្គលិក ដែលត្រូវបានឃើញដោយសារព័ត៌មាន AFP លោក Malpass បាននិយាយថា ប្រទេសកំពុងអភិវឌ្ឍន៍ជុំវិញពិភពលោកកំពុងប្រឈមនឹងវិបត្តិ ដែលមិនធ្លាប់មានពីមុនមក ហើយរូបលោកផ្ទាល់មានមោទកភាព ដែលធនាគារពិភពលោកបានបន្ដឆ្លើយតបបានទាន់ពេលវេលា ប្រកបដោយភាពច្នៃប្រឌិត និងប្រសិទ្ធភាព ក្នុងការជួយដល់ប្រទេសទាំងនេះ។
សូមបញ្ជាក់ដែរថា នៅមុនកាន់តំណែងជាប្រធានធនាគារពិភពលោក លោក David Malpass ធ្លាប់បម្រើការនៅក្នុងក្រសួងហិរញ្ញវត្ថុអាមេរិកផងដែរ៕
