បើតាមការអះអាងរបស់សារព័ត៌មានវៀតណាម VN Express កំណើននៃការនាំចូលនេះ ដោយសារតែបញ្ហាអាកាសធាតុមិនអំណោយផលនៅក្នុងប្រទេសឥណ្ឌូនេស៊ី។
ប្រទេសដែលមានសេដ្ឋកិច្ចធំជាងគេនៅអាស៊ានមួយនេះ បានទិញអង្ករពីវៀតណាមក្នុងតម្លៃដល់ទៅជាង ១៨១លានដុល្លារ ដែលមានប្រមាណជិត១០% នៃការនាំចេញអង្ករសរុបរបស់វៀតណាមនៅជិតពាក់កណ្ដាលឆ្នាំនេះ ហើយបានរំកិលឈ្មោះពីចំណាត់ថ្នាក់លេខរៀងទី៨ មកឈរនៅលេខរៀងទី៣វិញ ក្នុងបញ្ជីឈ្មោះអ្នកទិញអង្ករច្រើនជាងគេបំផុតរបស់វៀតណាម ខណៈប្រទេសហ្វីលីពីនឈរលេខ១ និងចិនឈរលេខពីរ។ នេះបើតាមតួលេខពីគយវៀតណាម។
អត្ថបទគួរអាន
ទន្ទឹមគ្នានេះ នៅជិតពាក់កណ្ដាលឆ្នាំ២០២៣ ប្រទេសឥណ្ឌូនេស៊ីក៏បានទិញកាហ្វេពីវៀតណាមក្នុងតម្លៃសរុបដល់ទៅ ៧៦លានដុល្លារផងដែរ ដោយមានកំណើនប្រមាណ ១៨៥% ធៀបនឹងរយៈពេលដូចគ្នាកាលពីឆ្នាំមុន។
ក្រសួងកសិកម្មឥណ្ឌូនេស៊ី បានបញ្ជាក់ថ្មីៗនេះថា តម្រូវការនាំចូលផលិតផលកសិកម្មកើនឡើងថ្មីៗនេះ ក៏ដោយសារតែប្រទេសនេះ កំពុងប្រឈមនឹងបាតុភូត El Nino ដែលកំពុងបង្កឲ្យមានគ្រោះរាំងស្ងួតនៅចន្លោះខែឧសភា ដល់ខែកក្កដា។ ដោយសារតែកត្តាអាកាសធាតុមិនអំណោយផលយ៉ាងដូច្នេះ រដ្ឋាភិបាលឥណ្ឌូនេស៊ី ក៏បានសម្រេចចិត្តនាំចូលអង្ករដល់ទៅ២លានតោន នៅឆ្នាំនេះ។
តាមការប៉ាន់ប្រមាណរបស់ក្រសួងកសិកម្មអាមេរិក បានឲ្យដឹងថា ទិន្នផលកាហ្វេ អង្ករ និងអាហារសមុទ្រសកលលោក កំពុងមានទំនោរថយចុះ ដោយសារតែបាតុភូត El Nino ហើយវាក៏មានហានិភ័យនៃការធ្លាក់ចុះបន្ថែមទៀត ដែលជំរុញឲ្យប្រទេសនានាបង្កើនស្ដុកស្បៀងអាហាររបស់ខ្លួន៕
