កោះតៃវ៉ាន់ សង្ឃឹមថា នឹងអាចចរចាកិច្ចព្រមព្រៀងពាណិជ្ជកម្មជាមួយអឺរ៉ុបនៅឆ្នាំក្រោយនេះ?

ថ្លែងក្នុងឱកាសទស្សនកិច្ចរបស់សមាជិកសភាបារាំងមួយក្រុមនៅទីក្រុងតៃប៉ិ លោកស្រីសៃ អ៊ីងវិន ប្រមុខដឹកនាំកោះតៃវ៉ាន់ បាននិយាយថា ប្រជាធិបតេយ្យត្រូវតែរួបរួមគ្នាដើម្បីប្រឈមមុខ នឹងរបបផ្តាច់ការ។ មេដឹកនាំកោះតៃវ៉ាន់ កត់សម្គាល់ថា ប្រទេសបារាំងនឹងទទួលធ្វើជាប្រធានសហភាពអឺរ៉ុបនៅឆ្នាំក្រោយ ដូចនេះតៃវ៉ាន់សង្ឃឹមថា ក្រោមការដឹកនាំរបស់បារាំង ភាគីទាំងពីរ នឹងអាចចាប់ផ្តើមការចរចារកិច្ចព្រមព្រៀងពាណិជ្ជកម្ម និងវិនិយោគរវាងគ្នាបានល្អ។

ជំនួបរវាងសមាជិកសភាបារាំង និងលោកស្រី សៃអ៊ីងវិន ធ្វើឡើងមិនយូរប៉ុន្មាន ក្រោយប្រទេសចិន និង ប្រទេសលីទុយអានី ដែលជាប្រទេសមួយនៅអឺរ៉ុបដែរនោះ កំពុងមានភាពរកាំរកូសនឹងគ្នាជុំវិញបញ្ហាកោះតៃវ៉ាន់។

ស្របពេលដែលតៃវ៉ាន់កំពុងស្ថិតក្រោមសម្ពាធកាន់តែច្រើនឡើងពី យោធា និងកាទូតរបស់ចិន ដែនកោះមួយនេះ បានខ្នះខ្នែងរកការគាំទ្រ ក៏ដូចជាភ្ជាប់ទំនាក់ទំនងជាមួយប្រទេសលោកខាងលិច តាមដែលអាចធ្វើទៅបាន។ ប៉ុន្តែចិនក៏ព្យាយាមបំបែកតៃវ៉ាន់ ពីការទទួលស្គាល់ និងមានទំនាក់ទំនងជាមួយប្រទេសដទៃក្នុងពិភពលោកផងដែរ។ ជាក់ស្តែងកាលពីពេលថ្មីៗនេះ ប្រទេស នីការ៉ាហ្ក័រ ទើបប្រកាសផ្តាច់ទំនាក់ទំនងដ៏យូរអង្វែងជាមួយកោះតៃវ៉ាន់ ថែមទាំងបានស្រវ៉ាទៅភ្ជាប់ទំនាក់ទំនងដ៏កម្រជាមួយនឹងប្រទេសចិនភ្លាមៗទៀតផង។

គួររំឭកថា សហភាពអឺរ៉ុបចាប់តាំងពីឆ្នាំ២០១៥មក បានដាក់បញ្ចូលកោះតៃវ៉ាន់ទៅក្នុងបញ្ចីដៃគូរពាណិជ្ជកម្ម និងវិនិយោគ ដ៏មានសក្តានុពល។ ប៉ុន្តែចាប់ពីពេលនោះមក ភាគីទាំងពីរពុំធ្លាប់បានពិភាក្សាគ្នា អំពីបញ្ហាពាណិជ្ជកម្មសូម្បីតែម្តងណាឡើយ។ យ៉ាងណាមិញកាលពីខែកញ្ញាឆ្នាំនេះ សហភាពអឺរ៉ុប បានប្រកាសចង់បើកការចរចារពាណិជ្ជកម្មសេរីជាមួយកោះតៃវ៉ាន់ម្តងដែរ ដើម្បីបង្កើនវត្តមានរបស់ខ្លួននៅក្នុងតំបន់ឥណ្ឌូប៉ាស៊ីហ្វិក ទប់ទល់នឹងការកើនឡើងឥទ្ធិពលរបស់ចិន៕