លោក ចាវ សួស្តី នាយកប្រតិបត្តិក្រុមហ៊ុន រ៉េនបូ អ៊ីនធើប្រាយ និងកសិដ្ឋានចិញ្ចឹម និងកែច្នៃត្រី Cambodia Fresh Farm បានប្រាប់ឲ្យដឹងថា កសិដ្ឋានរបស់លោកបានរៀបចំត្រៀមនាំចេញសាច់ត្រីទីឡាព្យ៉ាដែលបានកែច្នៃរួចទៅកាន់ប្រទេសជប៉ុននៅឆ្នាំ២០២៣ខាងមុននេះ។ ដោយបច្ចុប្បន្នកសិដ្ឋានលោកបាននឹងកំពុងពិភាក្សាជាមួយដៃគូខាងប្រទេសជប៉ុន អំពីចំនួនជាក់លាក់ ដែលអាចនាំចេញទៅបាន និងកំពុងស្វែងរកទីផ្សារបន្ថែមទៀត ខណៈបច្ចុប្បន្នមានទីផ្សារចំនួន២១ កន្លែងហើយនៅក្នុងប្រទេសជប៉ុន ដែលកំពុងរង់ចាំការនាំចូលពីកម្ពុជា។ ក្នុងការនាំចេញលើកដំបូងទៅកាន់ប្រទេសជប៉ុននេះ លោករំពឹងថា នឹងអាចនាំចេញបានចំនួនប្រមាណ ២តោនក្នុងមួយខែៗ។
អ្នកគ្រប់គ្រងកសិដ្ឋានចិញ្ចឹម និងកែច្នៃត្រីរូបនេះបញ្ជាក់ឲ្យដឹងដែរថា បន្ទាប់ពីនាំចេញទៅប្រទេសជប៉ុនហើយនោះ ក្រុមហ៊ុនក៏នឹងមានគម្រោនាំចេញទៅបណ្តាប្រទេសក្នុងតំបន់អឺរ៉ុបផងដែរ។ អ្នកទទួលទានសាច់ត្រីទីឡាព្យ៉ាភាគច្រើន គឺជាជនជាតិជប៉ុន ដោយសារតែសាច់ត្រីទីឡាព្យ៉ានេះអាចបរិភោគឆៅបាន ដូចទៅនឹងប្រភេទត្រីនៅប្រទេសជប៉ុនដែរ។
ជាមួយគ្នានេះ លោក ចាវ សួស្តី បានបញ្ជាក់ថា ត្រីឡាព្យ៉ាក្នុងកសិដ្ឋានលោក ត្រូវបានចិញ្ចឹម និងកែច្នៃទៅតាមស្តង់ដារត្រឹមត្រូវរបស់រដ្ឋបាលជលផលកម្ពុជា ក៏ដូចជាបច្ចេកវិទ្យារបស់ប្រទេសជប៉ុនផងដែរ ដែលត្រូវឆ្លងកាត់ជាច្រើនដំណាក់កាលទើបអាចសម្រេចបាននូវសាច់ត្រីដែលអាចបរិភោគឆៅបានប្រកបដោយគុណភាពល្អ និងរសជាតិឆ្ងាញ់។ ដើម្បីទទួលបានត្រីដែលមានរសជាតិឆ្ងាញ់នោះ គឺមានកត្តាធំៗចំនួន២សំខាន់ គឺទាក់ទងនឹងចំណី និងប្រព័ន្ធអុកស៊ីសែនក្នុងទឹក ជាក់ស្តែងនៅក្នុងស្រះចញ្ចឹមត្រីរបស់កសិដ្ឋានលោកនីមួយៗគឺមានរហាត់ទឹកសម្រាប់ជួយបង្កើនអុកស៊ីសែននៅក្នុងទឹក ដើម្បីឲ្យត្រីមានអុកស៊ីសែនគ្រប់គ្រាន់ នាំឲ្យត្រីមានសុខភាពល្អ។
អត្ថបទគួរអាន
លើសពីនេះ ដើម្បីទទួលបានសាច់ត្រីដែលមានរសជាតិឆ្ងាញ់ សាច់ត្រីណែនល្អ មិនមានខ្លាញ់ច្រើននោះ គឺជាទូទៅត្រូវប្រមូលផលត្រីដែលមានទម្ងន់ចន្លោះពី ៥០០ក្រាម ទៅ ៦០០ក្រាម ហើយត្រីទាំងនោះត្រូវបានចិញ្ចឹមក្នុងរយៈពេល៦ខែ។ បន្ទាប់ពីចិញ្ចឹមត្រីនៅក្នុងស្រះអស់រយៈពេល៦ខែ អាចប្រមូលផលបានហើយនោះ ក៏ត្រូវលើកត្រីទាំងនោះមកប្រស់ក្នុងស្រះថ្មីដែលមានទឹកស្អាតរយៈពេល៣ថ្ងៃ ដើម្បីឲ្យត្រីទាំងនោះអស់នូវសារធាតុដី និងចំណីដែលនៅក្នុងខ្លួន ទើបអាចយកត្រីទាំងនោះទៅធ្វើការសំអាត និងកែច្នៃតាមស្តង់ដារបច្ចេកទេសតាមដំណាក់កាលនីមួយៗរហូតអាចបរិភោគឆៅបាន។
សូមជម្រាបថា កសិដ្ឋានចិញ្ចឹមត្រី Cambodia Fresh Farm បច្ចុប្បន្នមានស្រះចិញ្ចឹមត្រីចំនួន២០ ស្រះ ដែលអាចចិញ្ចឹមត្រីបានប្រមាណ ២០ម៉ឺនក្បាល។ ហើយបច្ចុប្បន្នជាមធ្យមកសិដ្ឋានអាចផ្គត់ផ្គង់ត្រីទីឡាព្យ៉ាទៅដល់ហាង និងផ្សារទំនើបនានាចំនួន២៥កន្លែង នៅរាជធានីភ្នំពេញ ដែលហាងទាំងនោះភាគច្រើនជា ភោជនីយដ្ឋានជប៉ុន បារាំង ខ្មែរ ក៏ដូចជាផ្សារទំនើបអ៊ីអនជាដើម ដោយកសិដ្ឋានអាចផ្គត់ផ្គង់សាច់ត្រីចំនួនប្រមាណ ២០គីឡូក្រាមក្នុងមួយថ្ងៃ ជាមួយនឹងតម្លៃ ១៣ដុល្លារ ក្នុងមួយគីឡូក្រាម៕
