ក្រោយត្រូវប្ដូរតំណែងថ្មី លោក វ៉ាង យី អំពាវនាវឱ្យមានកិច្ចសន្ទនា និងសហប្រតិបត្តិការរវាងចិន និងអាមេរិក

លោក Wang Yi កាលពីថ្ងៃទី ៣០ខែធ្នូ ឆ្នាំ២០២២ ត្រូវបានបក្សកុម្មុយនីស្ដចិនផ្លាស់ប្ដូរតំណែង ពីរដ្ឋមន្ត្រីការបរទេស មកជាប្រធានការិយាល័យកិច្ចបរទេសរបស់បក្សកុម្មុយនិស្ដចិនវិញ ហើយតំណែងរដ្ឋមន្ត្រីការបទេស ត្រូវបានជំនួសដោយលោក ឈីង កេង (Qin Gang) ដែលជាអតីតឯកអគ្គរដ្ឋទូតចិនប្រចាំសហរដ្ឋអាមេរិក។

មកកាន់តំណែងថ្មី ជាប្រធានការិយាល័យកិច្ចបរទេសរបស់បក្សកុម្មុយនិស្ដចិន លោក Wang Yi ត្រូវបានគេរំពឹងយ៉ាងមុតមាំថា នឹងរក្សាតួនាទីដ៏លេចធ្លោនៅក្នុងគោលនយោបាយការបរទេសចិន ដ្បិតថា តួនាទីរបស់ស្ថាប័ននេះ គឺត្រូវម្រេចចិត្តលើបញ្ហាសំខាន់របស់ប្រទេស។

នៅក្នុងអត្ថបទមួយដែលត្រូវបានចេញផ្សាយនៅក្នុងទស្សនាវដ្តីផ្លូវការរបស់បក្សកុម្មុយនិស្ត «ស្វែងរកការពិត» លោក Wang បានជំរុញប្រទេសធំៗឱ្យ «ធ្វើជាគំរូ» ក្នុងការប្រឈមមុខនឹងបញ្ហាប្រឈមជាច្រើន ដោយលើកឡើងពីកិច្ចសហប្រតិបត្តិការពង្រឹងចំណងទាក់ទងរបស់ចិនជាមួយរុស្ស៊ីកាលពីឆ្នាំ២០២២។

លោកបានសរសេរថា «ក្នុងរយៈពេលមួយឆ្នាំកន្លងមកនេះ យើងបានរិះរកវិធីសាស្ត្រដ៏ត្រឹមត្រូវសម្រាប់ប្រទេសធំៗទាំងពីរគឺប្រទេសចិន និងសហរដ្ឋអាមេរិកក្នុងការចុះសម្រុងនឹងគ្នា»។ លោកបានមានប្រសាសន៍ថា «ប្រទេសទាំងពីរគួរតែបង្កើតវិធីនៃការចុះសម្រុងគ្នាជាមួយនឹងការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ ហើយនិងធ្វើឱ្យទំនាក់ទំនងចិន-អាមេរិកត្រឡប់ទៅលើផ្លូវត្រូវនៃភាពវិជ្ជមាន និងស្ថិរភាពឡើងវិញ»។

លោក ឈីង កាង រដ្ឋមន្ត្រីការបរទេសថ្មីរបស់ចិន បាននិយាយនៅក្នុងសេចក្តីអធិប្បាយដំបូងរបស់លោកក្នុងនាមជារដ្ឋមន្ត្រីការបរទេសនៅក្នុងសេចក្តីថ្លែងការណ៍មួយដែលបានបង្ហោះនៅលើគេហទំព័ររបស់ក្រសួងរបស់លោកថា ក្នុងការដោះស្រាយបញ្ហាប្រឈមទូទៅសម្រាប់មនុស្សជាតិទាំងអស់ ការទូតរបស់ប្រទេសចិននឹងផ្តល់នូវ «បំណងប្រាថ្នាចិន គំនិតផ្តួចផ្តើម និងកម្លាំងរបស់ចិន»។

ស្របពេលជាមួយគ្នានេះ កាលពីថ្ងៃអាទិត្យ ទី០១ ខែមករា ឆ្នាំ២០២៣ រដ្ឋមន្ត្រីការបរទេសអាមេរិកលោក អាល់តូនី ប្លីងខេន បានសរសេរនៅលើប្រព័ន្ធថ្វីតធ័ររបស់លោកថា លោកបាននិយាយជាមួយរដ្ឋមន្ត្រីការបរទេសចិនថ្មីគឺលោក Qin Gang តាមទូរស័ព្ទ ដោយបានពិភាក្សាអំពីទំនាក់ទំនងរវាងសហរដ្ឋអាមេរិក និងចិន និងការរក្សាបាននូវទំនាក់ទំនងបើកចំហរវាងប្រទេសមហាអំណាចទាំងពីរផងដែរ៕