លិខិតនោះ គឺជាការឆ្លើយតបវិញពីក្រោយមេដឹកនាំលោកគីម ជុងអ៊ុន បានផ្ញើការអបអរសាទរទៅកាន់ប្រធានាធិបតីចិន លោកស៊ី ជីនពីង ក្នុងឪកាសបើកសមាជបក្សកុម្មុយនិស្តចិនលើកទី២០ ដែលមេដឹកនាំចិនដ៏មានឥទ្ធិពលរូបនេះត្រូវបានគេរំពឹងថា នឹងនៅបន្តកាន់អំណាចក្នុងអាជណត្តិទី៣ក្នុងនាមជាអគ្គលេខាធិការនៃបក្សកុម្មុយនិស្តចិន ព្រមទាំងជាប្រធាននៃគណៈកម្មការយោធាកណ្តាលនៃប្រទេសចិនផងដែរ។
បើតាមសារព័ត៌មានរដ្ឋកូរ៉េខាងជើង KCNA បានឲ្យដឹងថា «លោកស៊ី បានបង្ហាញពីឆន្ទៈក្នុងការពង្រឹងទំនាក់ទំនងរវាងចិន និងកូរ៉េខាងជើង ដែលចូលរួមចំណែកយ៉ាងធំធេងក្នុងការផ្តល់ឲ្យប្រទេសទាំងពីរ និងប្រជាជននូវសុភមង្គល និងវិបុលភាព ព្រមទាំការការពារសន្តិភាព និងស្ថិរភាពនៅក្នុងតំបន់ និងពិភពលោកទាំងមូល»។
មែនទែនទៅ សារគាំទ្រនេះបានធ្វើឡើង បន្ទាប់ពីទីក្រុងព្យុងយ៉ាងបានធ្វើការសាកល្បងមីស៊ីលជាបន្តបន្ទាប់ក្នុងចំនួនមួយដ៏ច្រើនមិនធ្លាប់មានក្នុងរយៈពេលពីរសប្តាហ៍មកនេះ ដែលអ្នកអង្កេតការណ៍មួយចំនួនថា អាចនឹងឈានទៅរកការធ្វើតេស្តសាកល្បងគ្រាប់បែកនុយក្លេអ៊ែរជាលើកទី៧ ចាប់តាំងពីឆ្នាំ២០១៧មកផងដែរ។
អត្ថបទគួរអាន
យ៉ាងណាមិញ កូរ៉េខាងជើងនិយាយថា សកម្មភាពយោធាចុងក្រោយរបស់ខ្លួន ដែលរួមបញ្ចូលសមយុទ្ធកាំភ្លើងធំ និងបញ្ជូលយន្តហោះចម្បាំងទៅហោះក្បែរព្រំដែនកូរ៉េខាងត្បូង ព្រមទាំងការបាញ់មីស៊ីលផ្លោងដ៏សន្ធឹកសន្ធាប់នាពេលកន្លងមក គឺជាការឆ្លើយតបទៅនឹងសមយុទ្ធយោធារួមរវាងកូរ៉េខាងត្បូង និងសហរដ្ឋអាមេរិក និងការចល័តកងនាវាផ្ទុកយន្តហោះអាមេរិក USS Ronald Regan មកកាន់ច្រកសមុទ្រនៃឧបទ្វីបកូរ៉េ។
ជាមួយគ្នានេះ ជុំវិញការកើនកម្តៅនៃភាពតានតឹងផ្នែកយោធារវាងបងប្អូនកូរ៉េទាំងពីរនាពេលថ្មីៗនេះ អ្នកនាំពាក្យក្រសួងការបរទេសចិន លោកស្រី Mao Ning បានអំពាវនាវឲ្យភាគីទាំងសងខាងព្យាយាមអត់ធ្មត់កុំឲ្យពង្រីកជម្លោះ និងងាកទៅរកការបង្កើតលក្ខខណ្ឌសម្រាប់ការកិច្ចការសន្ទនាវិញ។
ភាពតានតឹងដែលកំពុងផ្ទុះឡើងបានធ្វើឱ្យមានការភ័យខ្លាចក្នុងប្រទេសកូរ៉េខាងត្បូងពីការបង្កហេតុដ៏មានសក្ដានុពលពីសំណាក់កូរ៉េខាងជើង។ ទោះបីជាមិនមានសញ្ញានៃការភ័យស្លន់ស្លោក្នុងចំណោមប្រជាជនកូរ៉េខាងត្បូងក៏ដោយ ការស្ទង់មតិរបស់ដោយអង្គការ (Gallup) ដែលបានចេញផ្សាយកាលពីថ្ងៃសុក្រ ទី ១៤ តុលា បានបង្ហាញថា អ្នកបោះឆ្នោតជាង៧០%បាននិយាយថា ការសាកល្បងកាំជ្រួចរបស់កូរ៉េខាងជើងបានគំរាមកំហែងដល់សន្តិភាព ដែលជាកម្រិតខ្ពស់បំផុតចាប់តាំងពីការសាកល្បងនុយក្លេអ៊ែរលើកទី៦របស់កូរ៉េខាងជើងក្នុងឆ្នាំ២០១៧មក៕
