គណៈកម្មាធិការសិទ្ធិមនុស្សកម្ពុជា នៅថ្ងៃទី១០ ខែតុលា ឆ្នាំ២០២៥ អាជ្ញាធរមូលដ្ឋាន និងប្រជាជនរស់នៅក្នុងភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយបានអះអាងថា កងយោធាថៃ បានចាក់សំឡេងខ្មោចលងតាមរយៈឧបករណ៍បំពងសំឡេង ដែលឮខ្លាំងៗចាប់ពីម៉ោង១០និង៤៤នាទី រហូតដល់ម៉ោង១២ និង៤នាទីកណ្តាលអធ្រាត្រ និងបានបន្តចាក់សំឡេងរំខានជាសំឡេងយន្តហោះពីម៉ោង៣ និង២២នាទី រហូតដល់ម៉ោង៣ និង៥៣នាទីទាបភ្លឺ ដោយមានគោលបំណងរំខាន និងបំភ័យប្រជាជនកម្ពុជា ដែលរស់នៅក្នុងសហគមន៍ក្បែរៗនោះ។
ឯកឧត្តម កែវ រ៉េមី បានចាត់ទុកសំឡេងទាំងនេះ គឺជាសំឡេងខ្លាំង និងមានកម្រិតខ្ពស់ក្នុងរយៈពេលយូរបានបង្កជាការរំខានដល់ការទទួលទានដំណេកធ្វើឱ្យថប់អារម្មណ៍ និងបង្កឱ្យមានការមិនសុខស្រួលផ្លូវកាយដល់ប្រជាជនរស់នៅក្នុងតំបន់នោះ រួមទាំងស្ត្រី កុមារ ចាស់ជរា ជនមានពិការភាព និងអ្នកជំងឺ។ មិនតែប៉ុណ្ណោះ សកម្មភាពទាំងនេះមិនត្រឹមតែបង្កគ្រោះថ្នាក់ដល់ផ្លូវកាយ និងផ្លូវចិត្តរបស់ប្រជាជនកម្ពុជា នោះទេ ថែមទាំងជាការគំរាមកំហែង និងបង្កើនភាពតានតឹងរវាងប្រទេសទាំងពីរទៀតផង។
ជាមួយគ្នានេះ គណៈកម្មាធិការសិទ្ធិមនុស្សកម្ពុជា បានស្នើដល់ OHCHR ផ្តួចផ្តើមការស៊ើបអង្កេតជាបន្ទាន់អំពីការប្រើប្រាស់សំឡេងរំខានដោយកងទ័ពថៃ នៅតាមបណ្ដោយព្រំដែនកម្ពុជា-ថៃ និងធានាឱ្យមានការទទួលខុសត្រូវចំពោះការរំលោភបំពានច្បាប់សិទ្ធិមនុស្សនេះ និងអំពាវនាវឱ្យបញ្ឈប់គ្រប់សកម្មភាពដែលគំរាមកំហែងផ្លូវចិត្តរបស់ប្រជាជនកម្ពុជា ជាពិសេសការប្រើប្រាស់សំឡេងរំខាននៅពេលយប់អធ្រាត្រ, ធានាការការពារ និងការផ្ដល់ជំនួយវេជ្ជសាស្ត្រ និងផ្លូវចិត្តចាំបាច់ផ្សេងៗដល់ជនរងគ្រោះ រួមទាំងស្ត្រី កុមារ និងមនុស្សចាស់ និងលើកទឹកចិត្តក្នុងការពង្រឹងកិច្ចសន្ទនាតាមព្រំដែនរវាងកម្ពុជា និងថៃ ដើម្បីទប់ស្កាត់ការកើតឡើងវិញនូវភាពតានតឹង និងប្រកាន់ខ្ជាប់ការគោរពតាមស្មារតីកិច្ចព្រមព្រៀងស្ដីពីបទឈប់បាញ់រវាងកម្ពុជា និងថៃ៕
