ដើម្បីឆ្លើយតបទៅនឹងតម្រូវការពូជស្រូវល្អនេះ អ្នកជំនួញនៅក្នុងវិស័យស្រូវអង្ករកម្ពុជាបាននិងកំពុងសហការជាមួយវិនិយោគទុនចិនសាងសង់មជ្ឈមណ្ឌលស្រាវជ្រាវ និងបន្សុទ្ធពូជស្រូវ នៅប្រទេសកម្ពុជាដែរ ដែលមានពូជស្រូវរហូតជាង ៣០០ ប្រភេទកំពុងត្រូវបានពិសោធន៍នៅខេត្ត បន្ទាយមានជ័យ។
លោក ឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាអះអាងថា គម្រោងនេះ អាចនឹងចាប់ផ្តើមជំហានដំបូង ជាមួយនឹងការបង្កើតពូជស្រូវដែលត្រូវនឹងទីផ្សារចង់បាន ពូជស្រូវស៊ាំនឹងអាកាសធាតុ និងទទួលទិន្នផលកាន់តែខ្ពស់ និងអាចធានាទីផ្សារសម្រាប់កសិករយ៉ាងមានប្រសិទ្ធភាព។
លោកឧកញ៉ា ហ៊ុន ឡាក់ បានបន្ថែមទៀតថា នៅពេលដែលគម្រោងពិសោធន៍ និងបន្សុទ្ធពូជស្រូវនេះ ទទួលបានជោគជ័យ នោះកសិករដែលដាំដុះស្រូវ នឹងទទួលបានអត្ថប្រយោជន៍កាន់តែប្រសើរ ពីការប្រើប្រាស់ពូជស្រូវដែលបានឆ្លងកាត់ការបន្សុទ្ធនេះ។
ឯកឧត្តម ហ៊ាន វណ្ណហន បានលើកឡើងថា ផ្អែកតាមការសិក្សារបស់អ្នកជំនាញ ក្នុងចំណោមផ្ទៃដី ដាំដុះស្រូវសរុបជាង ៣លានហិកតា គឺមានផ្ទៃដី ២០%ប៉ុណ្ណោះ ដែលត្រូវបានដាំដុះ ជាមួយពូជស្រូវ ដែលមានគុណភាពល្អ។
សូមជម្រាបថា ផ្ទៃដីប្រមូលផលស្រូវកម្ពុជាបច្ចុប្បន្នមានជាង ៣លានហិកតា ក្នុងនោះស្រូវវស្សាមានជាង ២លានហិកតា និងស្រូវប្រាំងមានជាងកន្លះលានហិកតា។ បរិមាណផលស្រូវបានកើនឡើងពីជាង ៩លានតោន នៅឆ្នាំ២០១៣ ដល់ជាង ១០លានតោននៅក្នុងឆ្នាំ២០១៧ និង២០១៨នេះ។
អត្ថបទទាក់ទង!
របាយការណ៍ពីក្រសួងកសិកម្មបង្ហាញថា ការនាំចេញផលិតផលកសិកម្មសរុបកើនឡើងពី ៤,៧ លានតោន នៅក្នុងឆ្នាំ២០១៦ ដល់ជាង ៥លានតោន នៅឆ្នាំ២០១៧ ។ ក្នុងនោះបរិមាណនាំចេញអង្ករក្នុងឆ្នាំ ២០១៧ ក្នុងក្របខណ្ឌនាំចេញ មានជិត៦៤ ម៉ឺនតោន កើនជាង ១៧ភាគរយ ក្នុងនោះអង្ករក្រអូបមាន ៦២ ភាគរយ អង្ករស គ្រប់ប្រភេទមាន ២៤ ភាគរយ និងអង្ករចំហុយមានជាង ១៣ ភាគរយ ដោយបាននាំចេញដោយក្រុមហ៊ុនចំនួន ៨៤ ទៅកាន់ទីផ្សារ៦៣ ប្រទេស៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
