ក្រុមហ៊ុនអាកាសចរណ៍ជាតិ កម្ពុជា គ្រោងទិញយន្តហោះចំនួន៣គ្រឿង នៅឆ្នាំនេះ ដើម្បីពង្រីកការហោះហើរក្នុងស្រុក និងក្រៅស្រុក

ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឱ្យដឹងថា ក្រុមហ៊ុនអាកាសចរណ៍ជាតិ កម្ពុជា (AIR CAMBODIA) នឹងស្វាគមន៍ការមកដល់យន្តហោះដ៏ទំនើបប្រភេទ ATR 72-600 ជាលើកដំបូងនៅថ្ងៃទី២៧ ខែឧសភា ឆ្នាំ២០២៥ ដែលនឹងចុះចតនៅអាកាសយានដ្ឋានអន្តរជាតិ ភ្នំពេញ។ បន្ថែមពីនេះ ក្រុមហ៊ុនអាកាសចរណ៍ជាតិ កម្ពុជា គ្រោងនឹងនាំយកយន្តហោះ ATR 72-600 រហូតដល់ចំនួន៣គ្រឿងឯណោះនៅឆ្នាំ២០២៥នេះ ពោលគឺបន្ទាប់ពីយន្តហោះដំបូងគេមកដល់ យន្តហោះទី២ និងទី៣ ត្រូវបានរំពឹងទុកថានឹងមកដល់នៅក្នុងខែតុលា និងខែវិច្ឆិកា ខាងមុន។ ជាមួយគ្នានេះ ក្រុមហ៊ុនអាកាសចរណ៍នេះ ក៏កំពុងជំរុញការដាក់ឱ្យប្រើប្រាស់យន្តហោះ Airbus A320 និងប្រភេទយន្តហោះផ្សេងទៀតដែលមានសមត្ថភាពប្រតិបត្តិការហោះហើរផ្លូវឆ្ងាយ ដោយធានាបាននូវជើងហោះហើរចម្រុះ និងទំនើប ស្របតាមតម្រូវការប្រតិបត្តិការផ្សេងៗគ្នា។

បើតាមមន្ត្រីជាន់ខ្ពស់រូបនេះ ដើម្បីឆ្លើយតបទៅនឹងតម្រូវការកើនឡើងនៃការធ្វើដំណើរអន្តរជាតិ ក្រុមហ៊ុនអាកាសចរណ៍ជាតិ កម្ពុជា កំពុងរៀបចំផែនការយ៉ាងសកម្មក្នុងការពង្រីកបណ្តាញផ្លូវហោះហើររបស់ខ្លួនទៅកាន់ទីផ្សារដែលមានសក្តានុពល រួមមាន អាស៊ីឦសាន ប្រទេសចិន អាស៊ីខាងត្បូង និងអូស្ត្រាលី។ តាមរយៈវិធីសាស្ត្រមួយជំហានម្ដងៗ ដោយត្រៀមខ្លួនរួចរាល់សម្រាប់ទីផ្សារ និងលទ្ធភាពប្រតិបត្តិការ ដែលក្រុមហ៊ុនមានគោលបំណងបង្កើនវត្តមាននៅទូទាំងពិភពលោក និងលើកកម្ពស់ការតភ្ជាប់របស់កម្ពុជា ជាមួយពិភពលោក។ តាមផែនការយុទ្ធសាស្ត្ររយៈពេលវែងរបស់ខ្លួន ក្រុមហ៊ុនក៏មានគម្រោងបង្កើនយន្តហោះរបស់ខ្លួនដល់ទៅចំនួន៣៣គ្រឿង សម្រាប់គាំទ្រដល់កំណើននាពេលអនាគត និងពង្រីកជើងហោះហើរអន្តរជាតិ ផងដែរ។

សូមបញ្ជាក់ថា យន្តហោះប្រភេទ ATR 72-600 ត្រូវបានគេស្គាល់ថា មានប្រសិទ្ធភាពក្នុងការសន្សំប្រេងដ៏ល្អឥតខ្ចោះ ដោយប្រើប្រាស់ប្រេងតិចជាងយន្តហោះប្រភេទចាស់ពី១៥% ទៅ ២០% ហើយត្រូវការផ្លូវរត់ខ្លី។ អ្នកដំណើរនឹងរីករាយជាមួយនឹងសំឡេងដ៏ស្ងប់ស្ងាត់ក្នុងយន្តហោះ ផាសុខភាពជាងមុន ជាមួយនឹងកន្លែងអង្គុយធំទូលាយ និងបរិក្ខារទំនើបៗ។ យន្តហោះនេះអនុលោមតាមស្តង់ដាបរិស្ថានចុងក្រោយបំផុតរបស់អង្គការអាកាសចរណ៍ស៊ីវិលអន្តរជាតិ (ICAO) និងត្រូវបានជឿទុកចិត្តដោយក្រុមហ៊ុនអាកាសចរណ៍ជាង២០០នៅទូទាំងពិភពលោក​៕