ប្រធានគណបក្សប្រជាជនថៃ ជំរុញឱ្យនាយករដ្ឋមន្ត្រីធ្វើកំណែទម្រង់រដ្ឋធម្មនុញ្ញថៃ

លោក ណាថាពុង រឿងផានីយ៉ាវុត (Natthaphong Rueangpanyawut) ប្រធានគណបក្សប្រជាជនថៃ បានបើកការជជែកដេញដោលនៅថ្ងៃចន្ទ សប្តាហ៍នេះ បន្ទាប់ពីនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក អនុទីន ឆានវីរៈគុល បានអានគោលនយោបាយរបស់លោកនៅចំពោះមុខសមាជិកសភា។ លោក ណាថាពុង ថា នៅក្នុងរយៈពេល៤ខែដំបូងរបស់រដ្ឋាភិបាលថ្មីនេះជាព្រឹត្តិការណ៍ដ៏សំខាន់មួយសម្រាប់គណបក្សប្រឆាំង ដែលមានបំណងជំរុញទៅមុខជាមួយអ្វីដែលលោកបានពិពណ៌នាថា ជាបេសកកម្មរៀបចំរដ្ឋធម្មនុញ្ញថ្មី។

មេដឹកនាំបក្សប្រឆាំងរូបនេះ បានបន្ថែមថា ប្រជាជនថៃ គ្រប់ជំនាន់មិនដែលបានរស់នៅក្រោមស្ថិរភាព និងលទ្ធិប្រជាធិបតេយ្យពេញលេញនោះទេ ព្រោះពួកគេគ្រប់សម័យកាលត្រូវមានស្លាកស្នាមដោយរដ្ឋប្រហារម្តងហើយម្តងទៀត។ ដូច្នេះហើយវាដល់ពេលដែលត្រូវបញ្ចប់វដ្តដ៏សាហាវនេះហើយ និងផ្តល់ធម្មនុញ្ញដែលឆ្លុះបញ្ចាំងអំពីឆន្ទៈរបស់ប្រជាជនពិតប្រាកដ។

លោកបានរំលឹកថា ជនជាតិថៃ ដែលកើតក្នុងទសវត្សរ៍ឆ្នាំ១៩៥០ បានមើលឃើញប្រទេសថៃ មានការរីកចម្រើនផ្នែកសេដ្ឋកិច្ច ខណៈមានរដ្ឋប្រហារចំនួន៦លើក ខណៈជំនាន់របស់លោកផ្ទាល់បានឆ្លងកាត់រដ្ឋប្រហារយោធាឆ្នាំ១៩៩១ ឆ្នាំ២០០៦ និងឆ្នាំ២០១៤។ លោកបានកត់សម្គាល់ថា សូម្បីតែក្នុងរយៈពេលពីរឆ្នាំកន្លងមកនេះ ប្រទេសថៃ មានការផ្លាស់ប្តូរនាយករដ្ឋមន្ត្រី៣រូប ដែលបានបង្ហាញពីរចនាសម្ព័ន្ធនយោបាយទន់ខ្សោយ និងអស្ថិរភាព។

ជាមួយគ្នានេះ លោកបានឆ្លៀតរិះគន់ប្រព័ន្ធនយោបាយដែលប្រើប្រាស់តុលាការធម្មនុញ្ញ និងទីភ្នាក់ងារឯករាជ្យជាអាវុធនយោបាយជំនួសអ្នកឃ្លាំមើល ដោយចង្អុលបង្ហាញថា សន្ទស្សន៍ការយល់ឃើញអំពីអំពើពុករលួយរបស់ប្រទេសថៃ បានធ្លាក់ចុះដល់កម្រិតទាបបំផុតក្នុងពេល១២ឆ្នាំមកនេះ មកនៅត្រឹមតែ៣៤ពិន្ទុ ដោយជាប់ចំណាត់ថ្នាក់ទី១០៧ក្នុងចំណោម១៨០ប្រទេស។

លោក Natthaphong បានសង្កត់ធ្ងន់ថា គណបក្សប្រជាជន បានគាំទ្រលោក Anutin ជានាយករដ្ឋមន្ត្រីក្រោមអនុស្សរណៈនៃកិច្ចព្រមព្រៀង ក្នុងគោលបំណងបើកទ្វារឆ្ពោះទៅរកការកំណែទម្រង់ធម្មនុញ្ញ៕

ដោយ៖ សុខ មង្គល