បញ្ហាទីផ្សារអចលនទ្រព្យចិននេះទៀតសោធ ត្រូវបានស្ថាប័នសេវាអ្នកវិនិយោគរបស់ Moody’s រាយការណ៍ថា កំពុងធ្វើឱ្យមានការពិបាកស្មុគស្មាញកាន់តែខ្លាំងឡើងសម្រាប់អ្នកអភិវឌ្ឍន៍ក្នុងប្រទេសចិន ក្នុងការចូលទៅកាន់ទីផ្សារបំណុលរបស់សហរដ្ឋអាមេរិក ក្នុងការស្វែងរកប្រភពទុន។ នេះបើយោងតាមស្ថាប័នស្រាវជ្រាវ និងវាយតម្លៃសេដ្ឋកិច្ច Moody’s។
អនុប្រធានជាន់ខ្ពស់នៅរបស់ស្ថាប័នស្រាវជ្រាវ និងវាយតម្លៃសេដ្ឋកិច្ច Moody’s បានអះអាងនៅដើមសប្ដាហ៍នេះថា មានការមើលឃើញនិន្នាការនៃភាពចលាចលនៅក្នុងវិស័យអចលនទ្រព្យរបស់ប្រទេសចិន ដែលបន្តធ្វើឱ្យមានភាពថយចុះ ចំពោះការចេញមូលបត្របំណុល ពិសេសការចូលទៅបោះផ្សាយលក់បណ្ណបំណុលនៅក្នុងទីផ្សារមូលបត្របំណុលអាមេរិក។
អនុប្រធានជាន់ខ្ពស់នៅរបស់ស្ថាប័នស្រាវជ្រាវ និងវាយតម្លៃសេដ្ឋកិច្ច Moody’s បានបន្ថែមថា អ្នកអភិវឌ្ឍន៍អចលនទ្រព្យរបស់ប្រទេសចិនមានបំណុលនៅក្នុងទីផ្សារមូលបត្របំណុលគិតជាប្រាក់ ៣៥ ពាន់លានដុល្លារនៅក្នុងឆ្នាំ២០២២នេះ។ ហើយសម្រាប់ក្រុមហ៊ុនបោះផ្សាយបណ្ណបំណុលដែលបានរៀបចំហិរញ្ញប្បទានឡើងវិញនៅតែបរាជ័យក្នុងការទូទាត់សង គឺមានប្រហែល ១៥ ពាន់លានដុល្លារ ក្នុងចំណោមទឹកប្រាក់បណ្ណបំណុលសរុប ៣៥ ពាន់លានដុល្លារ។ ដោយឡែក នៅសល់ប្រហែល ២០ ពាន់លានដុល្លារទៀត កំពុងស្ថិតក្នុងការរៀបចំហិរញ្ញប្បទានឡើងវិញនៅឡើយ។
យ៉ាងណាមិញ ដោយសារលក្ខខណ្ឌផ្តល់មូលនិធិ ដ៏តឹងតែង វានឹងនៅតែជាបញ្ហាប្រឈម សម្រាប់ក្រុមហ៊ុនចេញមូលបត្របំណុល ក្នុងការចូលទៅកាន់ទីផ្សារមូលបត្របំណុលអាមេរិក។
អត្ថបទគួរអាន
ទន្ទឹមនេះ បញ្ហានៅក្នុងវិស័យអចលនទ្រព្យរបស់ប្រទេសចិន គឺកាន់តែអាក្រក់ទៅៗ ដោយសារវិបត្តិបំណុលរាប់រយពាន់លានដុល្លាររបស់ Evergrande ដែលជាក្រុមហ៊ុនអភិវឌ្ឍន៍អចលនទ្រព្យធំបំផុតទីពីររបស់ប្រទេសចិន។ នៅពេលដែលមានការព្រួយបារម្ភអំពីបំណុលនៅក្នុងវិស័យអចលនទ្រព្យរបស់ប្រទេសចិនកើនឡើង អ្នកអភិវឌ្ឍន៍ដូចជា Evergrande បានព្យាយាមលក់ទ្រព្យសម្បត្តិរបស់ពួកគេក្នុងរយៈពេលប៉ុន្មានខែថ្មីៗនេះ ដើម្បីបន្ធូរបន្ថយវិបត្តិសាច់ប្រាក់ផងដែរ។
ក្រុមហ៊ុន Evergrande គឺជាក្រុមហ៊ុនអចលនទ្រព្យចិន ដែលមានជំពាក់បំណុលរហូតដល់៣០០ពាន់លានដុល្លារ ហើយបច្ចុប្បន្នក្រុមហ៊ុននេះ ក៏កំពុងជួបបញ្ហាក្នុងការសងបំណុលទៅកាន់ម្ចាស់បំណុលរបស់ខ្លួនកាន់តែខ្លាំង។
អ្នកជំនាញអះអាងថា នៅក្នុងអំឡុងពេលលំបាកនេះ ក្រុមហ៊ុនអចលនទ្រព្យពិតជាត្រូវការចាំបាច់ក្នុងការចូលទៅកាន់ទីផ្សារបំណុល ដើម្បីអាចប្រមូលសាច់ប្រាក់ដើម្បីយកមកបង្វិលក្នុងប្រតិបត្តិការ ហើយទីផ្សារបណ្ណបំណុលនេះ គឺជាជំរើសប្រភពហិរញ្ញវត្ថុមួយ ដែលអាចជួយធ្វើឲ្យវិស័យអចលនទ្រព្យនៅរក្សាបាននិរន្តរភាពផងដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
