បើយោងតាមរបាយការណ៍ចេញផ្សាយនៅដើមសប្តាហ៍នេះ ដោយសហព័ន្ធអ្នកវិទ្យាសាស្ត្រអាមេរិកបានបញ្ជាក់ថា រូបភាពថតចេញពីផ្កាយរណប (satellite images) បង្ហាញពីទីតាំងបាញ់គ្រាប់មីស៊ីលថ្មីៗជាច្រើនកន្លែង ដែលប្រទេសចិនបាននិងកំពុងសាងសង់ឡើងក្បែរតំបន់ហាមី (Hami) ភាគខាងកើតនៃតំបន់ស៊ីនជាំង ប្រទេសចិន។
របាយការណ៍ខាងលើដដែលនេះត្រូវបានបញ្ចេញមក ស្របពេលដែលនៅប៉ុន្មានសប្តាហ៍មុននេះ ក៏មានរបាយការណ៍ស្រដៀងគ្នាមួយផងដែរ ស្តីអំពីការបង្កើតទីតាំងបាញ់គ្រាប់មីស៊ីលរបស់ចិនថ្មីៗប្រមាណ ១១០កន្លែង ក្នុងក្រុង យូមិន (Yumen City) ចំងាយប្រមាណ ៥០០គីឡួម៉ែតពីតំបន់ ហាមី។ ទីតាំងក្នុងក្រុងយូមិន មានទំហំជិត ៤០០គីឡូម៉ែត្រឯណោះ។
បញ្ជាការដ្ឋានយុទ្ធសាស្ត្រសហរដ្ឋអាមេរិក បានបង្ហោះសារនៅលើគណនី Twitter របស់ខ្លួនថា៖ «នេះជាលើកទី២ ហើយក្នុងរយៈពេល២ខែចុងក្រោយនេះ ដែលផ្កាយរណបបានរកឃើញពីទីតាំងបាញ់គ្រាប់មីស៊ីលថ្មីៗជាច្រើន ហើយវាជាការគម្រាមកំហែងថ្មីដែលពិភពលោកកំពុងប្រឈមមុខ»។
សមាជិកសភាអាមេរិកមួយរូបមកពីគណៈបក្សសាធារណរដ្ឋ លោក Mike Turner បាននិយាយថាសកម្មភាពរបស់ចិនខាងលើនេះ ជាសកម្មភាពមិនធ្លាប់កើតមានឡើងពីមុនមកនោះទេ ហើយប្រការនេះបានបង្ហាញយ៉ាងច្បាស់ថា ចិនកំពុងដាក់ពង្រាយអាវុធ នុយក្លេអ៊ែរដើម្បីគម្រាមកំហែងដល់សហរដ្ឋអាមេរិក និងសម្ព័ន្ធមិត្តឯទៀត។
អត្ថបទគួរចាប់អារម្មណ៏
ជាមួយគ្នានេះ អ្នកនយោបាយមកពីគណៈបក្សសាធារណរដ្ឋមួយរូបទៀតគឺលោក Mike Roger បាននិយាយដែរថា ការបង្កើនសមត្ថភាពអាវុធ នុយក្លេអ៊ែររបស់ចិនជាសារមួយបង្ហាញថា សហរដ្ឋអាមេរិកចាំបាច់ត្រូវតែធ្វើទំនើបកម្មខែលការពារអាវុធនុយក្លេអ៊ែររបស់ខ្លួនបន្ថែមទៀត។
សូមជម្រាបថា បើតាមរបាយការណ៍របស់មន្ទីរបញ្ចកោណអាមេរិកកាលពីឆ្នាំ២០២០ បានបង្ហាញថា ចិនមានស្តុកទុកក្បាលគ្រាប់នុយក្លេអ៊ែរមិនតិចជាង២០០គ្រាប់នោះទេ ហើយចំនួននេះត្រូវបានគេរាយការណ៍ថា នឹងមានការកើនឡើងទ្វេដងនៅពេលអនាគត ក្រោយមើលឃើញពីការធ្វើទំនើបកម្មយោធារបស់ចិនពីមួយថ្ងៃទៅមួយថ្ងៃ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
