កំណើនសេដ្ឋកិច្ចចិន ត្រូវបានគេរំពឹងថានឹងធ្លាក់ចុះត្រីមាសទី៣ឆ្នាំនេះ

អ្នកជំនាញសេដ្ឋកិច្ចបានវាយតម្លៃថា អត្រាកំណើនរបស់ចិន ទំនងជាអាចធ្លាក់ចុះមកត្រឹមជិត៥% ប៉ុណ្ណោះ នៅត្រីមាសទី៣ឆ្នាំ២០២៥ មានការធ្លាក់ចុះបន្តិចបើធៀបនឹងត្រីមាសទី២ ដែលសម្រេចបានក្នុងរង្វង់ជាង៥%។ អ្នកជំនាញដែលចូលរួមឆ្លើយសំណួរក្នុងការស្ទង់មតិរបស់សារព័ត៌មាននីកេ អេស៊ា ភាគច្រើនវាយតម្លៃថា នៅពេញមួយឆ្នាំ២០២៥ សេដ្ឋកិច្ចចិននឹងសម្រេចបានកំណើនជិត៥% ដោយសារការធ្លាក់ចុះតម្រូវការក្នុងស្រុក និងការធ្លាក់ចុះការនាំចេញមុខទំនិញទៅអាម៉េរិក ដោយសារគំនាបពន្ធរបស់អាម៉េរិក។

លោក ជេរ៉េមី ហ្ស៊ូក (Jeremy Zook) នាយកផ្នែកនៅក្រុមហ៊ុនវាយតម្លៃ Fitch Ratings បាននិយាយថា មកដល់ពេលនេះ សេដ្ឋកិច្ចរបស់ចិន ហាក់មានសម្ពាធតិចតួចពីសង្គ្រាមពាណិជ្ជកម្មជាមួយសហរដ្ឋអាម៉េរិក។ ការពន្យារពេលអនុវត្តពន្ធបដិការខ្ពស់រវាងទីក្រុងប៉េកាំង និងក្រុងវ៉ាស៊ីនតោន ដែលបានអូសបន្លាយរហូតដល់ខែវិច្ឆិកា បានធ្វើឱ្យទីផ្សារស្ងប់ស្ងាត់ថែមទៀត បើទោះជាមានមនុស្សតិចណាស់ ដែលរំពឹងថា នឹងមានកិច្ចព្រមព្រៀងជោគជ័យនៅឆ្នាំនេះក៏ដោយ៕

ដោយ៖ សុខ មង្គល