លោក Narong Sritalayon អគ្គនាយកក្រុមហ៊ុន Great Wall Motor ប្រចាំប្រទេសថៃ បានឱ្យដឹងថា ចាប់តាំងពីបានឈានជើងចូលក្នុងទីផ្សារថៃរយៈពេល ២ឆ្នាំកន្លងមក ក្រុមហ៊ុន Great Wall Motor បានវិនិយោគទឹកប្រាក់ប្រមាណ ៣៣៤លានដុល្លារ ក្នុងការផលិតរថយន្តអគ្គិសនី និងបានជួលបុគ្គលិកជាង ៣ពាន់នាក់។
លោកបញ្ជាក់ថា ក្រុមហ៊ុនគ្រោងនឹងវិនិយោគប្រមាណជាង ៦៣០លានដុល្លារទៀត ក្នុងប្រទេសថៃ ដោយមិនត្រឹមតែផលិតរថយន្តអគ្គិសនីតែមួយមុខទេ ពោលគឺនឹងផលិតគ្រឿងបន្លាស់ និងសាងសង់ហេដ្ឋារចនាសម្ព័ន្ធសម្រាប់បម្រើឱ្យរថយន្តអគ្គិសនីផងដែរ ដើម្បីជំរុញឱ្យប្រទេសមួយនេះ ក្លាយជាជង្រុកផលិតរថយន្តអគ្គិសនី ក្នុងតំបន់អាស៊ីអាគ្នេយ៍។
ក្រុមហ៊ុន Great Wall បានចូលវិនិយោគក្នុងប្រទេសថៃ នៅឆ្នាំ២០២០ ក្នុងពេលបានទិញរោងចក្រដំឡើងរថយន្តមួយពីក្រុមហ៊ុនអាមេរិក General Motors។ ក្រុមហ៊ុនចិននេះ បានលក់រថយន្តជាង ១១.០០០គ្រឿងហើយគិតមកពេលនេះ ដែលលើសពីការព្យាកររបស់សហព័ន្ធឧស្សាហកម្មថៃ ដែលរំពឹងថា ការលក់រថយន្តអគ្គិសនីទាំងអស់នឹងមានចំនួនត្រឹមប្រហែល ១ម៉ឺនគ្រឿងប៉ុណ្ណោះ ក្នុងឆ្នាំ២០២២។
អត្ថបទគួរអាន
បើតាមលោក Narong អគ្គនាយកក្រុមហ៊ុន Great Wall Motor ការកើនឡើងក្នុងការលក់រថយន្តអគ្គិសនី ដោយសារទទួលបានការឧបត្ថម្ភធនពីរដ្ឋាភិបាលថៃ ដែលធ្វើឱ្យរថយន្តប្រភេទនេះមានតម្លៃសមរម្យ ដើម្បីបង្កើតតម្រូវការ និងទាក់ទាញក្រុមហ៊ុនផ្សេងៗមកវិនិយោគកាន់តែច្រើន។
លោក Narong បន្ថែមថា ក្រុមហ៊ុន Great Wall នឹងបន្តអភិវឌ្ឍបច្ចេកវិទ្យារថយន្តអគ្គិសនី ដើម្បីធ្វើឱ្យរោងចក្រដំឡើងរបស់ខ្លួនដែលស្ថិតនៅក្នុងខេត្ត Rayong ក្លាយជារោងចក្រឆ្លាតវៃមួយ និងអាចមានសមត្ថភាពផលិតប្រចាំឆ្នាំបានប្រមាណ ៨ម៉ឺនគ្រឿង។ រថយន្តអគ្គិសនីដែលផលិតដោយក្រុមហ៊ុនចិនមួយនេះ នឹងលក់នៅទីផ្សារក្នុងស្រុកថៃប្រហែល ៦០% និងនាំចេញប្រហែល ៤០%។
TTB Analytics ជាអង្គភាពមួយរបស់ធនាគារ TMB Thanachart Bank បានព្យាករថា ការលក់រថយន្តអគ្គិសនីក្នុងប្រទេសថៃ នឹងឈានដល់ជាង ៦ម៉ឺនគ្រឿងត្រឹមចុងឆ្នាំនេះ កើនឡើងជាង ៥០០% បើធៀបនឹងឆ្នាំ២០២១។ កំណើននេះ ក៏ដោយសារតែមានការជំរុញពីរដ្ឋាភិបាល ដែលនាំឱ្យតម្រូវការកើនឡើង។
គួរកត់សម្គាល់ថា ក្នុងខែកុម្ភៈ រដ្ឋាភិបាលថៃ បានឧបត្ថម្ភធនសម្រាប់អ្នកទិញរថយន្ដអគ្គិសនី ក្នុងតម្លៃ ២ពាន់ ទៅជាង ៤ពាន់ដុល្លារ សម្រាប់ការទិញរថយន្តអគ្គិសនីមួយគ្រឿង ផ្អែកតាមម៉ូឌែល និងទំហំអាគុយ។ ក្រោយមកទៀត នៅខែមិថុនា រដ្ឋាភិបាលបានបន្តលើកទឹកចិត្តដោយកាត់បន្ថយពន្ធនាំចូលចំពោះរថយន្តអគ្គិសនីពី ៨% មកនៅត្រឹម ២% តែប៉ុណ្ណោះ ដើម្បីជំរុញការផលិតយានយន្ដអគ្គិសនីក្នុងប្រទេស។ គោលនយោបាយនេះ គឺនឹងក្លាយជាឈ្នាន់មួយសម្រាប់ឱ្យថៃ ក្លាយជាកន្លែងផលិតរថយន្តអគ្គិសនីប្រចាំតំបន់អាស៊ាន ហើយត្រឹមឆ្នាំ២០៣០ រាល់ការលក់រថយន្តទាំងអស់នៅក្នុងប្រទេសនេះ ក្នុងនោះ ៣០% ត្រូវតែជារថយន្តអគ្គិសនី៕
អត្ថបទ៖ នៅ សំភី
