យោងតាមការចុះផ្សាយដោយសារព័ត៌មានរ៉យទ័រ កាលពីថ្ងៃសៅរ៍ ទី៣ ខែមិថុនា កងនាវាចរទី៧របស់កងទ័ពជើងទឹកសហរដ្ឋអាមេរិកប្រចាំការនៅតំបន់ឥណ្ឌូប៉ាស៊ីហ្វិក បានធ្វើដំណើរឆ្លងកាត់ច្រកសមុទ្រតៃវ៉ាន់«តាមទម្លាប់» ដោយប្រើប្រាស់នាវាចម្បាំងធុន USS Chung-Hoon បំពាក់ដោយកាំជ្រួចដែលអាចបញ្ជាឱ្យហោះហើរបាន។ ដំណើររបស់នាវានេះបានធ្វើឡើងរួមគ្នាជាមួយនាវាចម្បាំងរបស់ប្រទេសកាណាដាធុន HMCS Montreal នៅលើ«ដែនទឹកដែលសេរីភាពនាវាចរណ៍និងអាកាសចរណ៍អាចអនុវត្តស្របតាមច្បាប់អន្តរជាតិ»។
តាមសេចក្តីថ្លែងការណ៍របស់ខ្លួន ការធ្វើនាវាចរណ៍ទ្វេភាគីជាមួយសម្ព័ន្ធមិត្តកាណាដានៅច្រកសមុទ្រតៃវ៉ាន់នេះ គឺចង់បង្ហាញអំពីការប្តេជ្ញាចិត្តរបស់សហរដ្ឋអាមេរិកនិងដៃគូដែលថា ច្រកសមុទ្រនេះជាផ្នែកមួយនៃតំបន់ឥណ្ឌូប៉ាស៊ីហ្វិកសេរីនិងបើកចំហរ ហើយខ្លួនមានសិទ្ធិឆ្លងតាមវាដោយសេរីនិងគ្មានការរំខាន។
ទោះជាយ៉ាងណាក៏ដោយ ទីបញ្ជាការកងទ័ពរំដោះប្រជាជានចិនប្រចាំភាគខាងកើតបានចេញសេចក្ដីប្រកាសមួយថា យោធាជើងទឹកចិនកំពុងតាមដានសកម្មនេះយ៉ាងជាប់លាប់ដោយស្របតាមច្បាប់ និងបទបញ្ញត្តិរបស់ខ្លួន។ តែយោធាចិនបានបន្តថា សកម្មភាពនេះគឺមានចេតនាបង្កើតឧបទ្ទវហេតុនៅក្នុងតំបន់ បង្កឱ្យមានហានិភ័យ ធ្វើឱ្យខូចដល់សន្តិភាពនិងស្ថិរភាពក្នុងតំបន់ និងបញ្ជូនសញ្ញាខុសទៅកាន់កងកម្លាំង«ឯករាជ្យតៃវ៉ាន់»ផងដែរ។
ក្រសួងការពារជាតិតៃវ៉ាន់បានប្រាប់ឱ្យដឹងដែរថា ពិតជាមាននាវាចម្បាំងពីរគ្រឿងបានឆ្លងកាត់ច្រកសមុទ្រតៃវ៉ាន់មែន ប៉ុន្តែខ្លួនមិនបានឃើញមានភាពខុសប្រក្រតីនៅក្នុងការធ្វើនាវាចរណ៍នោះទេ។
អត្ថបទគួរអាន
បញ្ជាការដ្ឋានតំបន់ឥណ្ឌូប៉ាស៊ីហ្វិករបស់សហរដ្ឋអាមេរិក បានបញ្ញាក់ក្នុងសេចក្តីថ្លែងការណ៍មួយថា ខណៈពេលដែលនាវាចម្បាំង USS Chung-Hoon កំពុងធ្វើដំណើររួមគ្នាជាមួយ HMCS Montreal នៅច្រកសមុទ្រតៃវ៉ាន់កាលពីថ្ងៃសៅរិ៍នោះ មាននាវាចម្បាំងចិនមួយគ្រឿងបានធ្វើដំណើរមកកៀកនឹងនាវារបស់ខ្លួនពីរដង ហើយស្ថិតនៅចម្ងាយត្រឹមតែ១៤០ទៅ១៨០ម៉ែត្រពីគ្នាប៉ុណ្ណោះ ដែលហៀបនឹងធ្វើឱ្យមានការប៉ះទង្គិចគ្នាជាយថាហេតុ។ បញ្ជាការដ្ឋាននេះបាននិយាយថា នេះគឺជាសកម្មភាពដែលរំលោភលើច្បាប់ស្ដីពីផ្លូវនាវាចរណ៍ដែលចែងក្នុងច្បាប់អន្តរជាតិ។
សារព័ត៌មានកាណាដា The Global បានរាយការណ៍ថា នាវាចម្បាំងចិននោះបានបង្អាក់ល្បឿននាវាចម្បាំងអាមេមរិក១០ដង ហើយអាមេរិកបានប្រាប់ទៅនាវាចិនថាឱ្យនៅឱ្យឆ្ងាយពីនាវារបស់ខ្លួន។ កាសែតនេះបានបន្ថែមទៀតថា មេបញ្ជាការនាវាចម្បាំងកាណាដា HMCS Montreal លោក ភូល ម៉ោនហ្វត (Paul Mountford) បានហៅសកម្មចិននេះថាជាទង្វើគ្មានវិជ្ជាជីវៈ និងមានបំណងញុះញង់យ៉ាងច្បាស់។ លោកបានបន្តថា នាវាចិននោះបានព្រមាននាវាអាមេរិក និងនានាកាណាដាថា នាវាទាំងពីរគឺសស្ថិត«នៅក្នុងដែនទឹករបស់ចិន» បើទោះបីជាច្រកសមុទ្រតៃវ៉ាន់ត្រូវបានទទួលស្គាល់ថាជាដែនទឹកអន្តរជាតិក៏ដោយ។
មែនទែនទៅ ឧប្បត្តិហេតុដែលវិះនឹងប៉ះទង្គិចគ្នារវាងនាវាចម្បាំងនឹងនាវាចម្បាំងនេះបានកើតស្របពេលដែលមេដឹកនាំការពារជាតិនៃប្រទេសទាំងបីគឺចិន អាមេរិក និងកាណាដា កំពុលចូលរួមកិច្ចសន្តិសុខ សាងហ្គ្រី-ឡា នៅប្រទេសសឹង្ហបុរី ដោយក្នុងនោះបើតាមសេចក្ដីរាយការណ៍ ក៏មានការប៉ះពារពាក្យសម្តីគ្នារវាងប្រមុខការពារជាតិចិន និងសហរដ្ឋអាមេរិក លើបញ្ហាកោះតៃវ៉ាន់ផងដែរ៕
