ដោយមិនបានអញ្ជើញទៅដល់ទីស្នាក់ការនៃអង្គការសហប្រជាជាតិក្នុងទីក្រុងញូយ៉កផ្ទាល់នោះទេ លោកស៊ី ជិន ពីង តាមរយៈវីដេអូដែលបានថតទុករួចជាស្រេច បានថ្លែងថា នៅលើពិភពលោកមានប្រព័ន្ធអន្តរជាតិតែមួយប៉ុណ្ណោះ ពោលគឺប្រព័ន្ធអន្តរជាតិដែលមានអង្គការសហប្រជាជាតិជាស្នូល។ ហើយប្រព័ន្ធនេះទៀតសោត គឺតំណាងឲ្យសណ្តាប់ធ្នាប់អន្តរជាតិដែលគាំទ្រដោយច្បាប់អន្តរជាតិ។ ច្បាប់អន្តរជាតិនោះ គឺសំដៅដល់ ធម្មនុញ្ញនៃអង្គការសហប្រជាជាតិ។
បុរសខ្លាំងរដ្ឋចិន លោកស៊ី បន្តទៀតថា៖ ដូច្នេះហើយពិភពលោក ត្រូវអនុលោមតាម ទ្រឹស្តីពហុភាគីនិយមពិតប្រាកដមួយ មិនគ្រាន់តែបាននិយាយ ហើយមិនអនុវត្តនោះទេ។
ការលើកឡើងក្នុងមហាសន្និបាតអង្គការសហប្រជាជាតិដូច្នេះធ្វើឡើងមិនយូរប៉ុន្មាន បន្ទាប់ពីអាមេរិក អូស្ត្រាលី និងអង់គ្លេស បានចុះកិច្ចសហប្រតិបត្តិការថ្មីមួយហៅកាត់ថា AUKUS ដើម្បីពង្រឹងវិស័យយោធាជើងទឹក ក្នុងតំបន់ឥណ្ឌូប៉ាស៊ីហ្វិក។
អត្ថបទគួរអាន
កិច្ចព្រមព្រៀងត្រីភាគីនេះ បានរងការរិះគន់យ៉ាងចាស់ដៃពីប្រទេសចិន ថាជាការគម្រាមកំហែងដល់សន្តិសុខ និងសណ្តាប់ធ្នាប់ក្នុងតំបន់ ហើយវាថែមទាំងបានប្រាស់ចាកពីទ្រឹស្តីពហុភាគីនិយមផងដែរ។
សូមជម្រាបថា នៅក្នុងការថ្លែងសុន្ទរកថាដដែលនេះ ភាគីចិនបានឆ្លៀតរំឭកដល់ពិភពលោកថា ចិននឹងមិនគំរាមកំហែងប្រទេសដ៏ទៃឡើយ ហើយក៏មិនដែលចង់ប្រជែងដណ្ដើមតំណែងជាអ្នកដឹកនាំពិភពលោកអ្វីនោះដែរ។ លោកស៊ី ជីងពីង បានទទូចឱ្យមេដឹកនាំប្រទេសទាំងអស់ចៀសវាងការប្រឈមមុខដាក់គ្នា ហើយងាកទៅរកកិច្ចសហប្រតិបត្តិការ និងការដោះស្រាយបញ្ហាដោយការសន្ទនាគ្នា និង សន្តិវិធីវិញ។ ការថ្លែងដូចនេះ របស់ក្រុងប៉េកាំងធ្វើឡើង ស្របពេលដែលទំនាក់ទំនងនៃមហាអំណាចទាំង២ គឺចិន និងអាមេរិកកំពុងស្ថិតក្នុងស្ថានភាពមួយដ៏តានតឹង ហើយត្រូវបានអ្នកតាមដានស្ថានការណ៍ពិភពលោក ឲ្យឈ្មោះថា ជាសង្គ្រាមត្រជាក់ ក្នុងទសវត្សន៍ទី២១នេះ។ យ៉ាងណាមិញ ភាគីទាំងពីបានអះអាងជារឿយៗ ថា នឹងមិនអនុញ្ញាតឲ្យមានសង្គ្រាមត្រជាក់កើតឡើងទៀតនោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
