ការលើកឡើងពីការឈានទៅសម្រេចគោលដៅការចាក់វ៉ាក់សាំងមុនផែនការកំណត់នេះ ធ្វើឡើងនៅក្នុងកិច្ចប្រជុំតាមរយៈប្រព័ន្ធ Video Conference ក្រោមអធិបតីភាព លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុនិងជាប្រធានគណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ១៩ (គ.ប.ក) ដោយមានការចូលពីលោកឃួង ស្រេង អភិបាលនៃគណៈអភិបាលរាជធានីភ្នំពេញនាល្ងាចថ្ងៃទី១៩ខែកក្កដា ឆ្នាំ២០២១នេះ នៅសាលារាជធានីភ្នំពេញ។
តាមរបាយការណ៍ពីក្រសួងសុខាភិបាល បានបង្ហាញថា មកទល់ពេលនេះ កម្ពុជាសម្រេចបាននូវការចាក់វ៉ាក់សាំងជំងឺកូវីដ១៩ ដូសទី១បានជាង ៦លានអ្នកមកហើយ ខណៈដែលអ្នកចាក់វ៉ាក់សាំងដូសទី២បានចំនួនជាង ៤លាននាក់។ រដ្ឋាភិបាលរំពឹងថា ការចាក់វ៉ាក់សាំងសម្រាប់សម្រាប់មនុស្ស១០លាននាក់នឹងត្រូវរួចរាល់ នៅក្នុងរង្វង់ខែតុលា ឬខែវិច្ឆិកាឆ្នាំ២០២១ ក៏ប៉ុន្តែដោយមានការសហការចូលរួមពីសំណាក់ប្រជាជននឹងបណ្ដាក្រុមគ្រូពេទ្យបានធ្វើនូវយុទ្ធនាការយ៉ាងខ្លាំងទៅលើកិច្ចការមួយនេះ កម្ពុជារំពឹងឃើញថានឹងអាចបញ្ចប់មុនផែនការរហូតដល់ ៧ ទៅ៨ខែឯណោះ។
អត្ថបទគួរអាន
របាយការណ៍ពីក្រសួងសុខាភិបាលកម្ពុជា បានបញ្ជាក់ឲ្យដឹងថា គិតត្រឹមថ្ងៃទី ២០ ខែកក្កដា ប្រជាពលរដ្ឋ ដែលបានចាក់វ៉ាក់សាំងការពារជម្ងឺកូវីដ-១៩ដូសទី១ មានចំនួនប្រមាណ ជាង៦លាននាក់ហើយ ស្មើនឹងប្រមាណ ៦០% នៃផែនការ។ ចំណែកឯ ប្រជាពលរដ្ធដែលបានចាក់ដូសលើកទី២ចំនួនប្រមាណជាង ៤លាននាក់។
ថ្មីៗនេះដែរ សម្តេច ហ៊ុន សែន នាយករដ្ឋមន្ត្រីនៃកម្ពុជា ក៏បានប្រកាសពីគម្រោងបើកយុទ្ធនាថ្មីនូវការចាក់វ៉ាក់សាំងដល់ កុមារ និងយុវវ័យដែលមានអាយុ ១២ឆ្នាំ ដល់ ១៨ឆ្នាំ ប្រមាណជាជិត ២លាននាក់ ដែលនឹង ត្រូវការវ៉ាក់សាំងប្រមាណជាជិត៤លានដូស។
បើតាមសម្ដេច ហ៊ុន សែន កម្ពុជានឹងមានវ៉ាក់សាំងគ្រប់ចំនួន២០លានដូស នៅត្រឹមខែសីហាខាងមុខនេះ ដើម្បីចាក់ជូនប្រជាពលរដ្ឋសរុប១០លាននាក់តាមគោលដៅដែលបានកំណត់។សូមបញ្ជាក់ថា តួលេខដែលបានបង្ហាញដោយក្រសួងសុខាភិបាលនៅថ្ងៃទី ១៩ខែ កក្កដា ឆ្នាំ២០២១បង្ហាញថា ករណីឆ្លងថ្មីដែលត្រូវបានរកឃើញមានចំនួន ៧៩០ករណី និងករណីស្លាប់ថ្មី មាន២២ករណី។ សរុបករណីឆ្លងកូវីដ-១៩ មានជិត៦ម៉ឺន៨ពាន់នាក់ និងអ្នកស្លាប់សរុបមានជាង១ពាន់១រយនាក់៕
អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
