ជប៉ុន និងសហភាពអឺរ៉ុប ព្រមព្រៀងបង្កើតវិធានរួម ដើម្បីគ្រប់គ្រងរំហូរយ៉ាងគំហុកនៃរថយន្តអគ្គិសនី និងបន្ទះសូឡាចិន

ប្រទេសជប៉ុន និងសហភាពអឺរ៉ុប នឹងឈានដល់ការព្រមព្រៀងគ្នានៅដើមខែឧសភា ក្រោយនេះដើម្បីបង្កើតវិធានទូទៅស្តីពីការគ្រប់គ្រងលើការឧបត្ថម្ភធនរបស់រដ្ឋាភិបាល និងលទ្ធកម្មដែលផ្តោតលើរថយន្តអគ្គិសនី (EV) និងបន្ទះសូឡាដែលមានតម្លៃថោករបស់ចិន។ ភាគីទាំងពីរមានបំណងបង្កើតខ្សែច្រវាក់ផ្គត់ផ្គង់ ដោយផ្អែកលើគោលការណ៍រួមដូចជានិរន្តរភាព តម្លាភាព និងភាពជឿជាក់ជាដើម។

ហើយទន្ទឹមនេះក្រុមហ៊ុនផលិតបន្ទះសូឡាធំៗបំផុតជាច្រើនរបស់សហរដ្ឋអាម៉េរិក ក៏កំពុងទាមទារឱ្យរដ្ឋាភិបាលអាម៉េរិក ចាត់វិធានការក្ដៅប្រឆាំងនឹងការនាំចូលបន្ទះសូឡាតម្លៃថោកៗរបស់ចិន ផងដែរ ដោយក្រុមហ៊ុនទាំងនោះបានដាក់ញត្តិប្ដឹងទៅក្រសួងពាណិជ្ជកម្មអាម៉េរិក ថា បណ្ដាក្រុមហ៊ុននៅក្នុងប្រទេសចំនួន៤ នៅអាស៊ី កំពុងនាំចូលបន្ទះសូឡាដែលទទួលបានឧបត្ថម្ភធនដោយចិន ក្នុងចំនួនយ៉ាងច្រើនសន្ធឹកសន្ធាប់ចូលទៅកាន់ទីផ្សារសហរដ្ឋអាម៉េរិក។

សហភាពអឺរ៉ុប ទទួលបានរំហូរចូលយ៉ាងគំហុកនូវរថយន្តអគ្គិសនី (EV) និងបន្ទះសូឡារបស់ចិន ដែលមានតម្លៃថោក ជាហេតុធ្វើឱ្យគណៈកម្មការអឺរ៉ុប មានការព្រួយបារម្ភកាន់តែខ្លាំងឡើង និងចង់ជំរុញការលើកកម្ពស់ឧស្សាហកម្មក្នុងតំបន់។

ទន្ទឹមនេះ ប្រទេសជប៉ុន ក៏ពឹងផ្អែកខ្លាំងលើផលិតផលចិន ដែលមានតម្លៃថោកៗសម្រាប់ឧបករណ៍ថាមពលកកើតឡើងវិញដូចជាបន្ទះសូឡាជាដើម។ កត្តានេះបានបង្កការព្រួយបារម្ភកាន់តែខ្លាំងឡើងថា ការឧបត្ថម្ភធនដើម្បីលើកកម្ពស់ការកាត់បន្ថយការបំភាយឧស្ម័នកាបូនមិនត្រូវបានប្រើប្រាស់ដើម្បីគាំទ្រដល់ឧស្សាហកម្មក្នុងស្រុក៕

ដោយ: តែម សុខុម