មូលនិធិវិនិយោគរបស់សហរដ្ឋអាម៉េរិក បានជួបប្រទះការដកទុនចេញយ៉ាងច្រើនបំផុតមិនធ្លាប់មានក្នុងពេល៤ឆ្នាំមកនេះ

បណ្ដាវិនិយោគិនបានដកទុនរហូតដល់ទៅ២,៥ពាន់លានដុល្លារ ពីមូលនិធិវិនិយោគរបស់សហរដ្ឋអាម៉េរិក គិតត្រឹមថ្ងៃទី៧ ខែសីហា។ ការសម្រុកដកទុនយ៉ាងគំហុកនេះបានកើតឡើង បន្ទាប់ពីទិន្នន័យស្ដីពីការងារនៅសហរដ្ឋអាម៉េរិក ដែលខ្សោយជាងការរំពឹងទុកបានធ្វើឱ្យមានការព្រួយបារម្ភកាន់តែខ្លាំងឡើងចំពោះវិបត្តិសេដ្ឋកិច្ច ដែលអាចជះផលប៉ះពាល់ដល់អ្នកខ្ចីដែលមានប្រវត្តិឥណទានមិនសូវល្អ។

ជាលទ្ធផល បណ្ដាវិនិយោគិននៅពេលនេះរំពឹងថា ធនាគារកណ្ដាលអាម៉េរិក នឹងបញ្ចុះអត្រាការប្រាក់បន្ថែមទៀត ដោយទីផ្សារនានាបានព្យាករថានឹងមានការបញ្ចុះអត្រាការប្រាក់៤លើក នៅត្រឹមដំណាច់ឆ្នាំ២០២៤ ដោយកើនឡើងពី២លើក ដែលត្រូវបានព្យាករកាលពីខែមុន។

ការដកទុនចេញពីមូលនិធិវិនិយោគ ETF បានគ្របដណ្ដប់រហូតដល់ទៅជាង៨០%នៃការដកទុនចេញពីមូលនិធិវិនិយោគខាងលើនេះ ដោយការដកទុនចេញពីមូលនិធិវិនិយោគ ETF ប្រចាំសប្ដាហ៍បានឈានដល់កម្រិតកំណត់ត្រា។

ទោះបីជាមូលនិធិវិយោគមិនសូវមានភាពទាក់ទាញខ្លាំងដោយសារផ្ដល់ផលចំណេញទាបយ៉ាងណាក្ដី ក៏ក្រុមអ្នកវិភាគបានធ្វើការកត់សម្គាល់ថា ការធ្លាក់ចុះនូវអត្រាការប្រាក់អាចផ្តល់ផលចំណេញច្រើនដល់បណ្ដាក្រុមហ៊ុនដែលជំពាក់បំណុលច្រើន ដោយសារថ្លៃចំណាយរបស់ពួកគេលើការប្រាក់ក៏ធ្លាក់ចុះទៅតាមនោះដែរ។

ទោះជាយ៉ាងណា ប្រសិនបើទស្សនវិស័យសេដ្ឋកិច្ចកាន់តែអាក្រក់ទៅៗ ឧស្សាហកម្មហិរញ្ញវត្ថុទាំងមូលនេះអាចនឹងរងផលប៉ះពាល់ ដែលនាំឱ្យបណ្ដាវិនិយោគិនងាកចេញពីទីផ្សារឥណទានដែលមានហានិភ័យ ហើយងាកទៅរកជម្រើសដែលមានសុវត្ថិភាពជាងមុន៕

ដោយ: តែម សុខុម