លោកស្រីបានអះអាងថា ការព្រួយបារម្ភ ដែលគេបានលើកឡើងពាក់ព័ន្ធនឹងវិបត្តិសេដ្ឋកិច្ចសកលកាលពីឆ្នាំ២០២៣ កន្លងទៅ នឹងមិនកើតឡើងនៅលើពិភពលោក នាឆ្នាំ២០២៤ នេះទេ។ កំណើនសេដ្ឋកិច្ចពិភពលោក នឹងសម្រេចបាននៅក្នុងកម្រិត៣,១% ហើយអត្រាអតិផរណាក៏បានបង្ហាញពីការធ្លាក់ចុះផងដែរ។
លោកស្រី ជេនណេត យេឡេន រដ្ឋមន្រ្តីទទួលបន្ទុករតនាគារសហរដ្ឋអាម៉េរិក បានប្រាប់សន្និសីទសារព័ត៌មានមុនកិច្ចប្រជុំមន្ត្រីហិរញ្ញវត្ថុ នៃក្រុមប្រទេស G20 នៅសប្តាហ៍នេះនៅទីក្រុង សៅ ប៉ាឡូ (Sao Paolo) ប្រទេសប្រេស៊ីលថា អ្វីដែលមូលនិធិរូបិយវត្ថុអន្តរជាតិ និងអ្នកព្យាករណ៍ផ្សេងទៀតបានព្យាករណ៍ពីការធ្លាក់ចុះសេដ្ឋកិច្ចសកល ដែលមានមូលដ្ឋានទូលំទូលាយនៅឆ្នាំ២០២៣ ទំនងជាមិនបានកើតឡើងនោះទេ។ លោកស្រីអះអាងថា ផ្ទុយទៅវិញ កំណើនសេដ្ឋកិច្ចពិភពលោកអាចនឹងសម្រេចបានក្នុងកម្រិត៣,១% លើសពីការរំពឹងទុក ខណៈអត្រាអតិផរណានឹងធ្លាក់ចុះ ដោយតម្លៃរំពឹងថា នឹងបន្តធ្លាក់ចុះប្រហែល៨០%នៅឆ្នាំនេះ។
លោកស្រីបាននិយាយថា នៅក្នុងពេលខាងមុខនេះពិភពលោកនឹងបានដឹងអំពីហានិភ័យដែលប្រឈមមុខនឹងទស្សនវិស័យសកល ហើយបន្តតាមដានដោយប្រុងប្រយ័ត្ននូវបញ្ហាប្រឈមសេដ្ឋកិច្ចនៅក្នុងប្រទេសមួយចំនួន ប៉ុន្តែសេដ្ឋកិច្ចពិភពលោកនៅតែមានភាពធន់។
លោកស្រី យេឡេន បាននិយាយថា កម្លាំងសេដ្ឋកិច្ចរបស់សហរដ្ឋអាម៉េរិក បានគាំទ្រកំណើនពិភពលោក ដែលជំរុញដោយគោលនយោបាយរដ្ឋបាល លោក ចូ បៃដិន ដែលផ្តល់នូវការគាំទ្រដល់អាជីវកម្មដែលរងផលប៉ះពាល់យ៉ាងខ្លាំងពីវិបត្តិជំងឺរាតត្បាត COVID-19 និងការវិនិយោគលើការផលិតក្នុងស្រុក ថាមពលស្អាត និងហេដ្ឋារចនាសម្ព័ន្ធ។ ជាមួយគ្នានេះអត្រាអតិផរណារបស់សហរដ្ឋអាម៉េរិក ក៏បានធ្លាក់ចុះយ៉ាងខ្លាំងពីកម្រិតកំពូលរបស់វា ហើយទីផ្សារការងាររបស់សហរដ្ឋអាម៉េរិក មានភាពរឹងមាំជាប្រវត្តិសាស្ត្រឡើងវិញ។
លោក ព្យែ អូលីវីយេ ហ្គោរិនចាស់ ( Pierre-Olivier Gourinchas) ប្រធានក្រុមអ្នកសេដ្ឋវិទូនៅអង្គការរូបិយវត្ថុអន្តរជាតិបាននិយាយថា ទស្សនវិស័យសេដ្ឋកិច្ចពិភពលោកដែលបានធ្វើបច្ចុប្បន្នភាពរបស់អ្នកផ្តល់ប្រាក់កម្ចីពិភពលោកបានបង្ហាញពីការថយចុះនៃហានិភ័យ ប៉ុន្តែបានសង្កត់ធ្ងន់ថា កំណើនជារួម និងពាណិជ្ជកម្មសកលនៅតែទាបជាងមធ្យមភាគប្រវត្តិសាស្ត្រ៕
ដោយៈ សរ សុជាតិ
