របាយការណ៍ដដែលបានបញ្ជាក់ថា ការជួញដូរអាវុធក្នុងលោកកាលពីឆ្នាំ ២០២១ បានកើនឡើងចំនួនជិត១% បើទោះបីជាពិភពលោកកាលនោះកំពុង ជួបប្រទះនឹងបញ្ហាសេដ្ឋកិច្ចដែលបង្កឡើងដោយមេរោគឆ្លងកូវីដ១៩ក៏ដោយ។ បើតាម វិទ្យាស្ថានស្រាវជ្រាវសន្តិភាពអន្តរជាតិស្តុកខម ហៅកាត់ថា Sipri ទឹកប្រាក់លក់អាវុធក្នុងពិភពលោកសម្រាប់ឆ្នាំ ២០២១ មានដល់ទៅជាង ២ទ្រីលានដុល្លារ។
របាយការណ៍ខាងលើបានរកឃើញថា នៅរវាងឆ្នាំ២០១១ ដល់២០១៤ ការចំណាយផ្នែកយោធា មានការធ្លាក់ចុះគួរឲ្យកត់សម្គាល់ ប៉ុន្តែចាប់ពីឆ្នាំ២០១៥ រហូតដល់ឆ្នាំ២០២១ ការចំណាយបានកើនឡើងជាបន្តបន្ទាប់ក្នុងរយៈពេល ៧ឆ្នាំជាប់ៗគ្នា។ បរិបទចុងក្រោយ គឺនៅបន្ទាប់ពីការលុកលុយយ៉ាងពេញទំហឹងរបស់រុស្ស៊ីទៅលើអ៊ុយក្រែន រដ្ឋាភិបាលប្រទេសតំបន់អឺរ៉ុបជាច្រើនបានសន្យាថា នឹងផ្លាស់ប្តូរការចំណាយ ដើម្បីបង្កើនសមត្ថភាពកងកម្លាំងយោធា អាវុធរបស់ពួកគេ។
ជាក់ស្តែង ប្រមុខរដ្ឋាភិបាលអាល្លឺម៉ង់ ដែលជាបងធំមួយរបស់សហភាពអឺរ៉ុប កាលពីខែកុម្ភៈបានប្រកាសធ្វើទំនើបកម្មវិស័យយោធា និងដំឡើងកញ្ចប់ថវិកាការពារជាតិប្រចាំឆ្នាំ ឱ្យច្រើនជាង ២%នៃផលិតផលក្នុងស្រុកសរុប បើទោះបីជាបំណុលជាតិត្រូវកើនឡើងក៏ដោយ។
បើតាមអ្នកជំនាញរបស់វិទ្យាស្ថានស្រាវជ្រាវសន្តិភាពអន្តរជាតិស្តុកខម ហៅកាត់ថា Sipri Sipri កំណើនថវិកាយោធាសកលដែលផ្តើមស្ទុះឡើងចាប់តាំងពីឆ្នាំ២០១៥មកនោះ មានមួយផ្នែកធំត្រូវបានជំរុញដោយខ្ទង់ចំណាយនៅតំបន់អឺរ៉ុប។ មិនខុសពីបច្ចុប្បន្នឡើយ គ្រានោះគឺដោយសារតែក្តីបារម្ភពីប្រទេសរុស្ស៊ីដូចគ្នា បន្ទាប់ពីក្រុងម៉ូស្គូបានបញ្ចូលឧបទ្វីបគ្រីមេ កាលពីឆ្នាំ២០១៤ ជាទឹកដីរបស់ខ្លួន។ ដំណាលគ្នានោះ រដ្ឋការលោកដូណាល់ត្រាំ បានដាក់សម្ពាធលើសម្ព័ន្ធមិត្តណាតូ ឱ្យចំណាយប្រាក់កាន់តែច្រើនលើកងកម្លាំងប្រដាប់អាវុធរបស់ពួកគេផងដែរ។
អត្ថបទគួរអាន
គួរជម្រាបថា ការចំណាយលើផ្នែកយោធារបស់អឺរ៉ុបក្នុងឆ្នាំ២០២១ តំណាងឲ្យ២០% នៃចំណាយសរុបរបស់ពិភពលោក ហើយថវិកាការពារជាតិរបស់ប្រទេសចិន ដែលជាប្រទេសមានសេដ្ឋកិច្ចធំទីពីររបស់ពិភពលោក ត្រូវបានគេប៉ាន់ស្មានថាមាន ១៤% នៃការចំណាយយោធាសរុបរបស់ពិភពលោក។
ដោយឡែក សហរដ្ឋអាមេរិកនៅតែជាអ្នកចំណាយច្រើនជាងគេបំផុត ដោយមានទឹកប្រាក់ចំនួន ៨០០ពាន់លានដុល្លារ។ ក្នុងមួយទស្សវត្សរ៍ចុងក្រោយនេះ ការចំណាយលើផ្នែកយោធារបស់សហរដ្ឋអាមេរិកបានកើនដល់ ៣៩% នៃការចំណាយសកល។ ទោះបីការបញ្ជាទិញសព្វាវុធរបស់អាមេរិកបានធ្លាក់ចុះក៏ពិតមែន តែមូលនិធិកាន់តែច្រើនត្រូវបានផ្តោតលើការស្រាវជ្រាវ និងការអភិវឌ្ឍន៍ផ្នែកយោធា។ ទាំងនេះបង្ហាញថា សហរដ្ឋអាមេរិកកំពុងផ្តោតការយកចិត្តទុកដាក់ខ្លាំង លើបច្ចេកវិទ្យាជំនាន់ក្រោយ និងកាន់តែទំនើប។
ចំណែកឯរុស្ស៊ីវិញ ឃើញថាការចំណាយលើផ្នែកយោធានេះបានកើនឡើងប្រមាណ៣% ក្នុងពេល ៣ឆ្នាំជាប់ៗគ្នា ក្នុងទឹកប្រាក់ប្រមាណជិត ៦៦ ពាន់លានដុល្លារ។ ការចំណាយលើវិស័យការពារជាតិរុស្ស៊ីស្មើនឹង ៤,១%នៃផលិតផលក្នុងស្រុកសរុប (GDP) របស់រុស្ស៊ី។ ប្រការនេះធ្វើឱ្យទីក្រុងម៉ូស្គូក្លាយជាអ្នកចំណាយលើវិស័យយោធាច្រើនជាងគេលំដាប់ទី៥នៅលើពិភពលោក។
សម្រាប់អ៊ុយក្រែនត្រូវបានវិទ្យាស្ថានស្រាវជ្រាវសន្តិភាពអន្តរជាតិស្តុកខម ហៅកាត់ថា Sipri Sipri បញ្ជាក់ថា ការចំណាយយោធាមានទឹកប្រាក់ចំនួន ជិត៦ពាន់លានដុល្លារ ពោលគឺបានធ្លាក់ចុះចំនួន ៨% ក្នុងឆ្នាំ២០២១។ តែបើគិតតាំងពីរុស្ស៊ីក្រសោបយកទឹកដីគ្រីមេក្នុងឆ្នាំ២០១៤មក ការចំណាយយោធារបស់អ៊ុយក្រែនបានកើនឡើងពីមួយឆ្នាំទៅមួយឆ្នាំក្នុងអត្រាសរុប ៧២%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
