នាយប់ថ្ងៃទី ៥ ខែកញ្ញា ប្រទេសអង់គ្លេសបានប្រកាសពីជ័យលាភីម្ចាស់តំណែងនាយករដ្ឋមន្ត្រីថ្មីជំនួសលោកបូរីស ចនសុន នោះគឺលោកស្រី Liz Truss ដោយលោកស្រីបានយកឈ្នះអតីតរដ្ឋមន្ត្រីក្រសួងហិរញ្ញវត្ថុលោក Rishi Sunak នៅក្នុងការបោះឆ្នោតសមាជិកគណបក្សអភិរក្សដែលកំពុងកាន់អំណាចនៅអង់គ្លេស។ ការបោះឆ្នោតនោះ គឺលោកស្រី Liz Truss បានយកឈ្នះលើលោក Sunak ក្នុងសំឡេងគាំទ្រជាង ៨ ម៉ឺនសំឡេង ទល់នឹងជាង ៦ ម៉ឺនសំឡេង។
លោកស្រី Truss ក្នុងវ័យ ៤៧ ឆ្នាំនឹងចូលកាន់តំណែងជានាយករដ្ឋមន្ត្រីអង់គ្លេសជាផ្លូវការចាប់ពីថ្ងៃអង្គារនេះតទៅ ហើយតាមការស្ទង់មតិនៅមុនការបោះឆ្នោតសកលដែលគ្រោងនឹងធ្វើនៅខែមករា ឆ្នាំ២០២៥បានបង្ហាញថា គណបក្សអភិរក្សរបស់លោកស្រីមានការគាំទ្រច្រើនជាងគណបក្សពលករ ដែលជាបក្សប្រឆាំងនៅអង់គ្លេស។
ខណៈដែលបញ្ហាប្រឈមសេដ្ឋកិច្ចក្នុងស្រុកមួយចំនួនដូចជាការកើនឡើងនូវចំណាយលើថាមពលជាដើម ត្រូវបានជជែកស្ទើរតែគ្រប់វេទិកាក្នុងការប្រកួតប្រជែងតំណែងនាយករដ្ឋមន្ត្រី រយៈពេល៨សប្តាហ៍មកនេះ បេក្ខជនទាំងពីររូបនេះបានខំប្រឹងបង្កើតគោលជំហរដ៏តឹងរ៉ឹងមួយទៅលើប្រទេសចិននៅក្នុងគោលនយោបាយការបរទេសរបស់ក្រុមមេដឹកនាំមកពីគណបក្សអភិរក្សនិយមនេះ។
អត្ថបទគួរអាន
នាយករដ្ឋមន្រ្តីស្ត្រីទី៣របស់ចក្រភពអង់គ្លេសរូបនេះ មានភាពល្បីល្បាញថា ជាអ្នកពូកែខាងការជជែកតឹងសរសៃក ដែលពេលខ្លះហ៊ានស្រែកប្រឆាំងនឹងសម្ព័ន្ធមិត្តរបស់ខ្លួនដូចជាប្រទេសបារាំងជាដើម ហើយក៏ជាអ្នកតស៊ូមតិដ៏ក្លាហាន និងរ៉ឹងប៉ឹងផងដែរ។
ក្នុងអំឡុងធ្វើយុទ្ធនាការឃោសនារកសំឡេងគាំទ្រ គេបានរាយការណ៍ថាលោកស្រី Truss បានសន្យាក្នុងសភាថា លោកស្រីនឹងទទួលស្គាល់ជាសាធារណៈថា អំពើប្រល័យពូជសាសន៍កំពុងតែកើតឡើងទៅលើជនជាតិភាគតិច Uighur នៅក្នុងតំបន់ស្វយ័ត Xinjiangប្រទេសចិន ដែលវាបានធ្វើឱ្យចក្រភពអង់គ្លេសសម្ដែងការគាំទ្រយ៉ាងខ្លាំងជាមួយសហរដ្ឋអាមេរិកក្នុងការប្រឆាំងនឹងឥទ្ធិពលរបស់ប្រទេសចិន។
លោកស្រី Truss ក៏គ្រោងនឹងប្រកាសថា ប្រទេសចិនគឺជា«ការគំរាមកំហែង» ដោយហ៊ានទាំងប្រើភាសាដែលមានន័យថា ទីក្រុងប៉េកាំងគឺមានលក្ខណៈដូចគ្នាទៅនឹងប្រទេសរុស្ស៊ីអ៊ីចឹងដែរ។
សូមបញ្ជាក់ថា បច្ចុប្បន្ននេះ ប្រទេសចិនត្រូវបានចាត់ទុកថាជា«ដៃគូប្រកួតប្រជែងជាប្រព័ន្ធ»មួយរបស់ចក្រភពអង់គ្លេស។ នេះបើយោងតាមការពិនិត្យរួមគ្នាឡើងវិញពីគោលនយោបាយការបរទេស និងការការពារជាតិរបស់ក្រុមអភិរក្ស ហើយទង្វើនេះត្រូវបានអ្នកជំនាញចាត់ទុកថា ជាកាយវិការប្រកបដោយវោហាសាស្ត្រមួយ ក្នុងការប្រឆាំងនឹងការរះឡើងនៃឥទ្ធិពលរបស់ប្រទេសចិន៕
អត្ថបទ៖ សុខ ជា
