លោកគ្រីសស្នា ស្រ៊ីនីវ៉ាសាន (Krishna Srinivasan) ប្រធាននាយកដ្ឋានប្រចាំតំបន់អាស៊ី និងប៉ាស៊ីហ្វិករបស់ IMF បានប្រាប់រ៉យទ័រក្នុងបទសម្ភាសន៍មួយកាលពីថ្ងៃអង្គារថា "ប្រទេសចិនគឺជាម្ចាស់បំណុលធំមួយ ហើយស្រីលង្កាត្រូវចូលរួមយ៉ាងសកម្មលើការរៀបចំរចនាសម្ព័ន្ធបំណុលជាមួយទីក្រុងប៉េកាំងឡើងវិញ»។
បើយោងតាមទិន្នន័យពីវិទ្យាស្ថានហិរញ្ញវត្ថុអន្តរជាតិ (IFF) បានប្រាប់ឲ្យដឹងថា ប្រទេសស្រីលង្កាបាននឹងជំពាក់ហិរញ្ញប្បទានរបស់ទីក្រុងប៉េកាំងប្រមាណ ៦,៥ ពាន់លានដុល្លារ រួមទាំងកម្ចីពីធនាគារអភិវឌ្ឍន៍ ធនាគារកណ្ដាលផងដែរ។
ជាក់ស្តែង ប្រទេសមហាយក្សសេដ្ឋកិច្ចធំជាងគេទីពីររបស់ពិភពលោកគឺប្រទេសចិននេះ បានវិនិយោគលើគម្រោងធំៗដូចជាផ្លូវហាយវេ កំពង់ផែ ព្រលានយន្តហោះ និងរោងចក្រថាមពលធ្យូងថ្ម ហើយប្រទេសជប៉ុន និងឥណ្ឌាក៏ជាម្ចាស់បំណុលទ្វេភាគីដ៏ធំរបស់ស្រីលង្កាផងដែរ។
ទាក់ទិននឹងការជំរុញរបស់ IMF ឲ្យរដ្ឋាភិបាលស្រីលង្កានិយាយជាមួយចិនពាក់ព័ន្ធនឹងរឿងបំណុលទ្វេភាគីនេះដែរ ក្រសួងការបរទេស និងធនាគារកណ្តាលរបស់ប្រទេសស្រីលង្កាមិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ហើយស្ថានទូតចិននៅស្រីលង្កា ក៏មិនបានឆ្លើយតបភ្លាមៗវិញដែរ។
អត្ថបទគួរអាន
ជាការពិត ប្រទេសកោះអាស៊ីខាងត្បូងមួយនេះ បានស្នើសុំផែនការជំនួយសង្គ្រោះពី IMF ដើម្បីទប់ស្កាត់វិបត្តិសេដ្ឋកិច្ចដ៏អាក្រក់បំផុតរបស់ខ្លួនចាប់តាំងពីទទួលបានឯករាជ្យនៅឆ្នាំ ១៩៤៨ មក ហើយប្រទេសនេះបាននិងកំពុងសងបំណុលកាលពីដើមឆ្នាំនេះ ដែលបំណុលក្រៅប្រទេសមានចំនួន ១២ ពាន់លានដុល្លាររបស់ខ្លួនជាមួយម្ចាស់បំណុលឯកជន។
សូមគូសបញ្ជាក់ថា ប្រទេសម៉ាល់ឌីវ និងឡាវ គឺជាឧទាហរណ៍ផ្សេងទៀត នៃបណ្តាប្រទេសក្នុងតំបន់ដែលកំពុងប្រឈមមុខនឹងស្ថានភាពបំណុលដ៏ធ្ងន់ធ្ងរនេះដែរ។
ចំពេលដែលប្រទេសមិនទាន់មានភាពស្រាក់ស្រាន្តនៅឡើយនោះ សមាជិកសភាស្រីលង្កាបាននិយាយកាលពីថ្ងៃពុធថា សភារបស់ខ្លួនបានអនុម័តការបន្តដាក់ប្រទេសក្នុងគ្រាអាសន្នរយៈពេលមួយខែទៀត ក្នុងគោលបំណង ដើម្បីគ្រប់គ្រងវិបត្តិនយោបាយ និងសេដ្ឋកិច្ចដែលកំពុងតែច្របូកច្របល់ ក្រោយពីប្តូរប្រធានាធិបតេយ្យថ្មី។
បន្ទាប់មកប្រធានាធិបតីស្តីទី លោក Ranil បានប្រកាសដាក់ប្រទេសក្នុងភាពអាសន្នម្តងរួចទៅហើយនៅថ្ងៃទី ១៧ ខែកក្កដាកន្លងទៅ ដោយបានអនុញ្ញាតឱ្យយោធាមានសិទ្ធិអំណាចក្នុងការឃុំខ្លួនមនុស្ស ទប់ទល់ការប្រមូលផ្តុំជាសាធារណៈ ដែលមានបំណងប្រឆាំងរដ្ឋាភិបាល ព្រមទាំងទ្រព្យសម្បត្តិឯកជនជាដើម។
បើយោងតាមប្រភពដដែលបានបន្ថែមថា ការពន្យារពេលបន្ថែមដាក់ប្រទេសក្នុងគ្រាអាសន្ននេះ វានឹងមានសុពលភាពបន្តរយៈពេលមួយខែទៀត បើមិនមានការផ្លាស់ប្តូរណាមួយថ្មីទេនោះ៕
